Edhekiɛl 43 - JAM DE NHIALIC 2011

Bɛ̈nydït Apuk rɔt Luaŋdït

¹ Go raan ya lɛɛr në kal thoŋ lɔ aköl amiäk,

² ku ëtɛ̈ɛ̈n guɔ ɣɛɛr dhuëëŋ de Nhialic de Yithriɛl tïŋ ke bɔ̈ në biäk të lɔ aköl amiäk. Awuööu de bɛ̈nde acït pïïu juëc, ku jɔ piny riau në dhuëëŋde.

³ Yen ë nyuuthë acït kë wään bä kɔn tïŋ, wään bïï Nhialic Jeruthalem bɛ̈n riɔ̈ɔ̈k, ku cït kë wään tiëŋ në kiir de Cebar yɔu. Na wën ke ya cuɛt rɔt piny ke ya gut yanɔm piny.

⁴ Go ɣɛɛr riau tëëk në thoŋ ë kal të lɔ aköl amiäk ku leer ë Luaŋdïtic.

⁵ Go Wëi ya gap nhial, ku leer yɛn në kal yic thïn, të wën ë tiëŋ yɛn dhuëëŋ de Bɛ̈nydït ke cï Luaŋdït thiɔ̈ɔ̈ŋ.

⁶ Go raan kɔ̈ɔ̈c në yalɔ̈ɔ̈m ëtɛ̈ɛ̈n, ku piɛŋ Bɛ̈nydït ke jam ke yɛn biic Luaŋdït kɔ̈u: an,

⁷ “Yïn Mɛnh ë raan, kënë ee thöönydï. Yɛn bï rëër eenë në baai de Yithriɛl yic, ku bä tɔ̈u ë kenïïm aɣet athɛɛr. Ku acïn raan bï rinkiën ɣeriic bɛ yɔ̈ɔ̈r gup, në läm ye kek yiëth kɔ̈k lam, ku nɔn tɔ̈ukï gup ke meliikkɛn cï thou eenë, në kɔc ke Yithriɛl yiic ku nɔn yen meliikken.

⁸ Meliik ayek thook ke ɣöötken ku göl ke ɣöötken yiɛ̈k në ɣöndï kɔ̈u ku gɔ̈ɔ̈ldï kɔ̈u, ago jɔ aa päny yetök yen nu në kaamda. Acïk rinkiën ɣeriic yɔ̈ɔ̈r në karɛckɛn yek looi ëbɛ̈n, aguɔ keek riɔ̈ɔ̈k në agönhdï.

⁹ Ënɔɔnë ë ke jɔ läm de yiëth kɔ̈k pɔ̈l ku nyiɛɛikï gup ke meliikkɛn cï thou. Na lek lɔ looi, ke Yɛn bï rëër në keyiic aɣet athɛɛr.”

¹⁰ Ku ŋoot Bɛ̈nydït ke jam an, “Mɛnh ë raan, lɛ̈kë baai de Yithriɛl në biäk de Luaŋdït, ku takï ke tak kïïtde. Tɔ ke yäär gup në biäk de karɛc cïk looi.

¹¹ Na cïk gup jɔ yäär në karɛc cïk looi, ke jɔ ke guiëër kïït de Luaŋdït: kïïtde, kueerdɛn ë lɔ thïn ku bɛ̈n biic, täude, guiɛɛr de këriëëc ëbɛ̈n, ku lööŋke ku wëëtde. Gäärë ee kakë piny ëbɛ̈n në biäkden, agokï tïŋ yen luɔi cïï ë käŋ guiir ku kueer bïï kek ee lööŋkë luɔi thïn.

¹² Kënë ee löŋ de Luaŋdït: piny thiääk ke Luaŋdït ëbɛ̈n, në kuur nɔm nhial ee tëɣeric.”

Yïk

¹³ Kakë ee thëm de yïk, ku kek ee kak ë them kek Luaŋdït. Në yïk kɔ̈u ëbɛ̈n ade awuöl ye thuthde thɛntimitïïr kathiërdhïc, ku dïtde ee thɛntimitïïr kathiërdhïc, ku ye dhïl de yethok biic ke bäär ke lɔ nhial thɛntimitïïr kathiërrou ku dhïc.

¹⁴ Biäk piny de yïk, gɔl në awuöl nɔm piny, aaye mitïr tök ke lɔ nhial. Ku biäk däŋë acï kan kɔ̈u, në yekëc të ye thëmde thɛntimitïïr kathiërdhïc në yekɔ̈u ëbɛ̈n, ku bɛ̈ɛ̈rde ke lɔ nhial aaye mitïïr kaarou. Ku biäk däŋ lɔ ee kënë cök acï kan në yekëc aya, të ye thëmde thɛntimitïïr kathiërdhïc në yekɔ̈u ëbɛ̈n.

¹⁵ Yen ee biäk nhialë, të wën ye miɔ̈c näk nyop ë yenɔm, aaye bɛ̈ɛ̈rde ke lɔ nhial mitïïr kaarou. Këërkëërde në aguuk kaŋuan aa bäär ke lɔ nhial awär yïk nɔm ëbɛ̈n.

¹⁶ Yïk nɔm nhial ade aguuk kaŋuan, aguk biäk tök ee mitïïr kadhetem.

¹⁷ Biäk nu cil aade aguuk kaŋuan aya, aguk biäk tök ee mitïïr kadhorou, ku adhïl thok në yekëc në biäk biic, bɛ̈ɛ̈rde ke lɔ nhial ee thɛntimitïïr kathiërrou ku dhïc. (Ku dït de awuöl ee thɛntimitïïr kathiërdhïc.) Ku kuc ye kɔc lɔ në yïk nɔm aake tɔ̈u në baŋ të lɔ aköl amiäk.

Gɛm de Yïk

¹⁸ Go Bɛ̈nydït Awärjäŋ ya yöök an, “Mɛnh ë raan, piŋ kë lɛ̈k yïn. Të cïï ë yïk yïk, yïn bï yïk gam në luɔi bï yïn miɔ̈c ye nyop ëbɛ̈n nyop ë yïk nɔm, ku në luɔi bï yïn riɛm de läi cï nɔ̈k wiɛ̈ɛ̈th në yenɔm.

¹⁹ Bäny ke kake Nhialic ke dhiën ke Lebai de baai de Dhadok ee keek kapäc kek abï aa bɛ̈n të täu ɛn thïn, bïk a bɛ̈n luööi. Ee Yɛn Bɛ̈nydït Awärjäŋ Yɛn aa luel ee kënë. Abä ke gäm miɔɔr atiëëk bïk nɔ̈k ke ye miɔ̈c de kërac.

²⁰ Yïn bï biäk thiin ë riɛm nööm ku tääuwë në yïk tuŋ, ku tääuwë në aguuk kaŋuan ke yïk nɔm, ku në aguuk kaŋuan tɔ̈u ë yïk nɔm cil, ku ë yïk kɔ̈u ëbɛ̈n. Në ee kueerë yïn cï yïk jɔ tɔ piɛth ku jɔ teem guöp.

²¹ Yïn bï miɔɔr wën cï gam ke ye miɔ̈c de kërac nööm, ku nyop, të cï kɔn lueel, të nu ë Luaŋdït kɔ̈u biic.

²² Në kööl däŋë ke yï nöm nyɔɔŋ bou cïn guöp tëdak, ku näk ke ye miɔ̈c de kërac. Ku jɔ yïk tɔ ɣeric në riɛmde, në kueer wään cï kɔn luöi miɔɔr.

²³ Na cäk ee kënë thöl në luɔi, nöm miɔɔr atiëëk, ku nyɔɔŋ amääl, keek kaarou ke ke cïn gup tëdak

²⁴ ku yiɛ̈në keek yɛn. Bɛ̈ny ke kake Nhialic abïk amilɔ pɔɔr ë kekɔ̈ɔ̈th, ku nyopkï keek ke ke ye miɔ̈c gëmkï Yɛn.

²⁵ Në kööl tök yic në nïn yiic kadhorou yïn bï nyɔɔŋ bou, ku miɔɔr, ku nyɔɔŋ amääl aa gam ke ke ye miɔ̈c de kërac. Keek kedhie abïk gup dhil ciɛ̈n tëdak

²⁶ Në nïn kadhorou bäny ke kake Nhialic abïk yïk dhil aa teem guöp ku tɔkï lɔ wai, ku jɔkï kiëët në biäk de luɔi.

²⁷ Na ɣɔn cï nïn kadhorou tëëk, bäny ke kake Nhialic, abïk gɛm de miɔ̈c gɔl në yïk nɔm, miɔ̈c ye nyop ëbɛ̈n, ku miɔ̈c de mät. Ëtɛ̈ɛ̈n, yɛn bï piɔ̈u miɛt wo week wedhie. Acä lueel, Yɛn Bɛ̈nydït Awärjäŋ.”