Edhekiɛl 42 - JAM DE NHIALIC 2011

Ɣööt Kaarou Thiääk ë Ɣön de Bɛ̈nydït

¹ Go raan yɛn lɛɛr biic në kal yic, ku leer yɛn të lɔ rut de Luaŋdït, acïï mec ke ɣön nu ë biäk të lɔ aköl athɛ̈i de Luaŋdït.

² Ɣönë aaye bɛ̈ɛ̈rde mitïïr kathiërdhïc ë baŋ lɔ rut, ku ye dhïlde biäk de mitïr, ku ye dïtde mitïïr kathiërrou ku diäk.

³ Në biäk tök awel yethok të ɣɔ̈ɔ̈r de mitïïr kathiëër tɔ̈u në Luaŋdït lɔ̈ɔ̈m, ku biäk däŋë awel yethok të cï yiu në kal kɔ̈u biic. Acï yïk në aber ee yic diäk, kënë aye yïk ke mec ke däŋ nu në yethar piny.

⁴ Në biäk de ɣöt të lɔ rut, ade kueer ye dïtde mitïïr kadhïc, ku ye bɛ̈ɛ̈rde mitïïr kathiërdhïc, në kueer ee kɔc tëëk në biäkë.

⁵ Ɣööt tɔ̈u në biäk nhial akoorkï yiic, awɛ̈ɛ̈r ë ɣööt tɔ̈u cil ku ɣööt nu piny keek, në biäk cïï ë keek tääu ciëën.

⁶ Ku ɣööt aye bɛ̈ɛ̈rden yic diäk, ku acïnkï mën muk keek nhial cït ɣööt kɔ̈k tɔ̈u në kal yic.

⁷ Në biäk piny de päny kɔ̈u biic, aye thëmde ëbɛ̈n mitïïr kathiërrou ku dhïc, ee biäk töŋ de bɛ̈ɛ̈rde, ku ade ɣööt nu në biäk däŋ de mitïïr kathiërrou ku diäk cï döŋë yic.

⁸ Në yenɔm nhial aa de ɣööt cï yiëk në päny de luaŋdït kɔ̈u ëbɛ̈n, aye bɛ̈ɛ̈rden mitïïr kathiërrou ku diäk.

⁹ Në ɣööt kaarou thäär piny në biäk të lɔ aköl amiäk, të ye päny de kal rɔt gɔl, ade kueer ee lɔ në kal yic.

¹⁰ Në biäk lɔ aköl amiäk de Luaŋdït, aa de ɣööt cï röt rɛk piny cït acuek, acïkï mec në ɣön tɔ̈u në biäk të lɔ aköl athɛ̈i de Luaŋdït.

¹¹ Ade kueer nu në ɣööt thook tueŋ, cït man de kueer nu në biäk të lɔ rut. Ade thëmdɛn töŋë, ku täudɛn töŋë, ku kueerdɛn töŋë.

¹² Ade thoŋ nu ë ɣööt thäär piny tɔ̈u në ɣöt biäk të lɔ wöuwic, në yethar ciëën ë biäk të lɔ aköl amiäk të ye päny rɔt gɔl.

¹³ Go raan lɛ̈k ɛn an, “Ku ɣööt kaarou ɣeer yiic nu ë baŋ lɔ rut ku baŋ lɔ wöuwic, ee të ye bäny ke kake Nhialic miɔ̈c ɣeriic lɔ cam thïn ë Bɛ̈nydït nɔm. Ku në biäk ɣeer ë ɣööt yiic bäny ke kake Nhialic ayek miɔ̈c ɣer yiic aläl tɔ̈ɔ̈u ëtɛ̈ɛ̈n: miɔ̈c ë rap, ku miɔ̈c de kërac ku miɔ̈c de awäc de tëɣeric.

¹⁴ Na cï bäny ke kake Nhialic bɛ̈n tëɣeric, ku kɔɔrkï luɔi bï kek lɔ në kal yic biic, abïk lupɔɔ ɣeriic wën ceŋkï të wën luui kek dhil nyääŋ piny ee ɣöötkë yiic. Abïk lupɔɔ kɔ̈k dhïl tääu në kekɔ̈ɔ̈th, ke ke kën kɔn lɔ biic të cï kɔc kenïïm mat thïn.”

Them de Pëër de Luaŋdït

¹⁵ Na wën cï raan thëm de biäk thïn de Luaŋdït thöl, go ya lɛɛr biic në thoŋ nu të lɔ aköl amiäk, ku them biäk biic.

¹⁶ Go thieny de thëm nööm ku them biäk të lɔ aköl amiäk, go yök ke ye mitïïr bot kaarou ku thiërdhïc.

¹⁷ Go biäk të lɔ rut them, go yök ye mitïïr bot kaarou ku thiërdhïc,

¹⁸ ku them biäk të lɔ wöuwic, go yök ye mitïïr bot kaarou ku thiërdhïc,

¹⁹ ku biäk të lɔ aköl athɛ̈i, go yök ye mitïïr bot kaarou ku thiërdhïc, ku thëmden akït në biäk kedhie,

²⁰ go them në biäk kaŋuan kedhie, go yök ye mitïïr bot kaarou ku thiërdhïc, në biäk kedhie. Päny acï rɔt looi ke ye gëlgël në kaam de kë ɣeric kekë kë cïï yic ɣer.