Edhekiɛl 41 - JAM DE NHIALIC 2011

¹ Na wën, ke raan ë be yɛn lɛɛr ɣön nu cil, Të Ɣeric. Go kueer lɔ thïn them. Go thuthde yök ke ye mitïïr kadiäk

² ku dïtde ee mitïïr kadhïc, ku ye dhïl de pɛ̈ɛ̈ny mitïïr kadiäk ë biäk kedhie. Go ɣöt them guöpde: go yök ke ye mitïïr go bɛ̈ɛ̈rde yök ke ye mitïïr kathiërrou, ku ye dïtde mitïïr kathiëër.

³ Ëtɛ̈ɛ̈n go lɔ nu thïn. Go kueer lɔ thïn them. Go thuthde yök ke ye mitïr tök, ku ye dïtde mitïïr kadiäk, ku lɔ pɛ̈ɛ̈ny ye dhïlden mitïïr kadiäk ku biäk në biäk kedhie.

⁴ Go ɣöt bɛ them guöpde, go yök ke ye mitïïr kathiëër në aguuk kaŋuan. Yen ee ɣönë atɔ̈u në ɣön nu cilë kɔ̈u. Na wën, ke lɛ̈k ɛn an, “Kënë ee tëɣeric aläl.”

Ɣööt cï Yïk në Päny de Luaŋdït Kɔ̈u

⁵ Go raan dhïl de päny de Luaŋdït ë biäk thïn them, go yök ke ye mitïïr kadiäk. Në ye pänyë kɔ̈u, në Luaŋdït kɔ̈u ëbɛ̈n, ade ɣööt kor juëc ye dïtden mitïïr kaarou.

⁶ Kek ee ɣöötkë aake tɔ̈u në ɣööt kadiäk nïïm nhial, ku de ɣööt kathiërdiäk ë biäk tök, ke ke tɔ̈u ë päny de luaŋdït kɔ̈u.

⁷ Ku biäk biic de päny de Luaŋdït aaye yem në ɣön nu piny, ago ɣööt nyuc në päny kɔ̈u ke ke cïï be ë rɛk ë ke kɔ̈ɔ̈th.

⁸ Ade të ye kɔc kɔ̈ɔ̈c në këërkëër de luaŋdït kɔ̈u ëbɛ̈n, ku päny de ɣööt në biäk biic aye dhïlde mitïïr kaarou ku biäk,

⁹ ku ade thoŋ tök nu të lɔ rut de Luaŋdït, thoŋ lɔ në ɣööt yiic, ku biäk däŋ lɔ thïn ë biäk të lɔ wöuwic.

¹⁰ Yɛn cï gëlgël cï looi Luaŋdït kɔ̈u ëbɛ̈n tïŋ ëtɛ̈ɛ̈n, dïtde ee mitïïr kaarou, ku bɛ̈ɛ̈rde ke lɔ nhial ee mitïïr kadiäk, ku acï kiëët nɔm kekë këërkëër de ɣööt nu ë päny de Luaŋdït kɔ̈u.

¹¹ Në kaam de gëlgël kekë ɣön ye bäny ke kake Nhialic lui thïn, ade të ɣɔ̈ɔ̈r ye thëmde mitïïr kathiëër ë baŋ të lɔ rut, ku däŋ ë baŋ lɔ wöuwic në Luaŋdït këc ëbɛ̈n.

Ɣööt nu të lɔ Akɔ̈l Athɛ̈i

¹² Në biäk mec tɔ̈u të lɔ aköl athɛ̈i de Luaŋdït, ade ɣön ye bɛ̈ɛ̈rde mitïïr kathiërŋuan ku dhïc ku ye dïtde mitïïr kathiërdiäk ku dhïc, ku ye dhïl de pɛ̈ɛ̈nyke mitïïr kaarou ku biäk në biäk kedhie.

Thëm de Luaŋdït

¹³ Go raan biäk biic de Luaŋdït them, go bɛ̈ɛ̈rde yök ke ye mitïïr kathiërdhïc. Ku në ye kɔ̈u ciëën të ɣɔ̈ɔ̈r nu të mec tɔ̈u të lɔ aköl athɛ̈i, kaamde ee mitïïr kathiërdhïc aya.

¹⁴ Kaam nu ë Luaŋdït nɔm baŋ lɔ aköl amiäk, mɛt biäk ɣɔ̈ɔ̈rë thïn, aaye mitïïr kathiërdhïc aya.

¹⁵ Acï bɛ̈ɛ̈r de Luaŋdït them ë biäk të lɔ aköl athɛ̈i, ayï kuɛɛr ee tëëk ë biäk kaarou, ago yök ke ye mitïïr kathiërdhïc aya. Kueer lɔ Luaŋdït, Tëɣeric, ku Tëɣeric aläl

Tän de Luaŋdït

¹⁶ Ku ɣään ye kɔc kɔ̈ɔ̈c luaŋdït acï ke cuëëc ë tiim ë bɛ̈n, gɔl piny leer në awëër nyïïn. Kek awëër nyïïnkë aduëër ë keek kum.

¹⁷ Në pɛ̈ɛ̈ny ke Luaŋdït ë biäk thïn leer nhial, acï ke kum kɔ̈ɔ̈th në giɛɛt de tiim

¹⁸ ke akööt ku cerubiim. Tiim ke akööt cï mat ë läi pïïr, kënë akuany kënë cök, në kueer yic ɣööt yic ëbɛ̈n. Lɛ̈n tök ade nɔm nïïm kaarou:

¹⁹ nɔm de raan acï wɛ̈l tiim ke akööt në biäk tök, ku nɔm de köör acï wɛ̈l tiim në biäk däŋë. Yen ee täu de ka në päny ë luaŋdït kɔ̈u ëbɛ̈n,

²⁰ gɔl në tiɔp nɔm piny leer ë ɣöt thok nhial, cerubiim ku akööt acï ke giɛɛt ë päny kɔ̈u.

²¹ Ɣön Thoŋ de Tëɣeric ade aguuk kaŋuan. Në kueer ee tëëk ke lɔ Tëɣeric aläl, ade kë ye tïŋ ke cït

Yïŋ de Tim

²² yïïŋ de tim. Aa ye bɛ̈ɛ̈rde ke lɔ nhial mitïr tök ku biäk, ku ye dïtde mitïr tök. Aguukke, ku këërkëër, ku ye këc aake loi ëbɛ̈n në tiim. Go ë raan lɛ̈k yɛn an, “Kënë ee pam ee kɔ̈ɔ̈c të tɔ̈u ë Bɛ̈nydït.”

Thook ke Tëëk

²³ Aade thoŋ ee tëëk nu kueer thar ciëën, kueer ee lɔ Tëɣeric, ku thoŋ däŋ ee tëëk ke lɔ Tëɣeric aläl.

²⁴ Aake ye thook kaarou, ee rɔt liep cil.

²⁵ Aade tiim ke akööt ku cerubiim cï giɛɛt ë päny kɔ̈u. Ku ade tiim cï giɛɛt në yekɔ̈u në biäk biic de kueer ee tëëk ke lɔ ɣöt.

²⁶ Në biäk ee ɣönë ade awëër nyïïn, ku päny acï giɛɛt kɔ̈u në tiim ke akööt.