Edhekiɛl 40 - JAM DE NHIALIC 2011

Nyuuth në biäk de Luaŋdït de Wadäŋ ( 40:1–48:35 ) Edhekiɛl acï Lɛɛr Jeruthalem

¹ Aa ye kööl de thiëër, de ruöön ë piac bɛ̈n, ku ye ruöön ye runkuɔn ke pɛ̈c thiërrou ku dhïc, ku ye ruöön de thiëër ku ŋuan në dɔ̈m de Jeruthalem cök. Në ye köölë yɛn cï riɛldïït de Bɛ̈nydït yök në yaguöp, ku jɔt yɛn wei.

² Në nyuuth yic Nhialic acï ya jɔt leer ɛn piny de Yithriɛl ku tɛ̈ɛ̈u a piny në kuur bäär nɔm. Guɔ ɣööt juëc tïŋ në yanɔm tueŋ ke ke cït pänydït cï yïk

³ Go ya lɛɛr të thiɔ̈k, guɔ raan lɔ riauriau cï maläŋ tïŋ. Amuk alanh de linɔn ku thieny ye käŋ them, ku yen akääc në kueer thok.

⁴ Go lɛ̈k ɛn an, “Daaiyë në yïnyin, mɛnh ë raan. Piëŋë apiɛth, ku kët yïyic ke yï cï rɔt päl piny ku woi këriëëc bä nyuöth yïn ëbɛ̈n, në biäk ë bïï yïn ee tënë në biäk de ee kënë. Yïn bï baai de Yithriɛl lɔ lɛ̈k këriëëc cï tïŋ ëbɛ̈n.”

Kal Thoŋ të lɔ Amiäk

⁵ Kë cä tïŋ ee Luaŋdït, ku aade päny cï ye gɛɛu cil. Go raan thienydɛn de thëm nööm, bɛ̈ɛ̈r de yenkɔ̈u aaye mitïïr kadiäk, ku them päny. Go aa mitïïr kadiäk ke lɔ nhial ku ye dhïlde mitïïr kadiäk.

⁶ Ëtɛ̈ɛ̈n go lɔ në kal thoŋ wel rɔ të lɔ aköl amiäk. Go lɔ nhial në kuc ke cäth, na wën ke jɔ kal thok lɔ them nhial, go thuthde yök ke ye mitïïr kadiäk.

⁷ Ku ade kueer në yekɔ̈u ciëën, kueer de yic ɣööt kadiäk de kɔc ee tïït, biäkë ku biäkë. Ɣön tök në keyiic aaye yic arɔm, mitïïr kadiäk biäkë ku biäkë, ku päny nu ë kɛmken yiic aaye dhïlde mitïïr kaarou ku biäkde. Ku në ɣööt ke kɔc ee tïït kɔ̈ɔ̈th ciëën ade kueer ye bɛ̈ɛ̈rde mitïïr kadiäk, kueer ee lɔ ë ɣön tuööm nɔm ke Luaŋdït.

⁸ Go ee ɣönë them go yök thuthde ke ye mitïïr kaŋuan.

⁹ Yen aa cak kueer ee lɔ thoŋ thiääk ke Luaŋdït, ku yethar ciëën të lɔ päny dhïlde aaye mitïr tök.

¹⁰ (Ku ade ɣööt ke kɔc ee tïït nu biäk lɔ aköl amiäk në kueer këc, në biäk kedhie akïtkï yiic kedhie, ku dhïl de päny nu në kɛmkɛn akït aya.)

¹¹ Na wën ke raan ë be dït de kueer yic them. Go yök ke ye mitïïr kadhetem ëbɛ̈n, ku kaam ɣɔ̈ɔ̈r tɔ̈u në kaamden de kal thoŋ liɛp aaye mitïïr kadhïc.

¹² Në ɣööt ke kɔc ee tïït nïïm tueŋ, ade päny ciek ye bɛ̈ɛ̈rde ke lɔ nhial thɛntimitïïr kathiërdhïc, ku ye dhïlde thɛntimitïïr kathiërdhïc. (Ɣööt aake ye dït de keyiic mitïïr kadiäk, keek kedhie.)

¹³ Na wën ke them kaam gɔl në päny de ɣön tök kɔ̈u ciëën në kueer kɔ̈u, go yök ke ye mitïïr kathiëër ku rou.

¹⁴ Ɣön mec tɔ̈u të lɔ baai kɔ̈u ciëën acï ee ɣönë them. Go dït de yen yic lɔ yök ke ye mitïïr kathiëër.

¹⁵ Bɛ̈ɛ̈r de kal thok ëbɛ̈n gɔl në päny de biäk biic, leer të mec tɔ̈u në ɣön nu ciëën kɔ̈u, aaye mitïïr kathiërrou ku diäk.

¹⁶ Aade të ɣɔ̈ɔ̈r ë tɔ̈u në pɛ̈ɛ̈ny ke ɣööt kɔ̈ɔ̈th biic kedhie, ku në kɛm ke pɛ̈ɛ̈ny ke ɣööt yiic thïn aya. Aade tiim ke akööt cï ke guaŋ ë pɛ̈ɛ̈ny yiic ë biäk thïn, ke ke wel röt kueer.

Kal Kɔ̈u Biic

¹⁷ Go raan ɛn jɔt tëëk ɛn në kal thok leer ɛn në kal yic. Aade ɣööt kathiërdiäk cï ke yiëk ë päny kɔ̈u biic, ku në kenïïm tueŋ ade të thiin cï yiu në kur,

¹⁸ ee ɣet në kal yic ëbɛ̈n. Ku yen ee kal tɔ̈u ë biicë, aaye ke tɔ ciek awär biäk nu ë kal yic thïn.

¹⁹ Aade kal thoŋ në biäk thöny ee lɔ në kal yic thïn. Go raan kaam de kɛ̈l thook kaarou them, go lɔ yök ke ye mitïïr kathiërdhïc.

Kal Thoŋ të lɔ Rut

²⁰ Go raan kal thoŋ nu të lɔ rut them, biäk ee lɔ në kal biäk biic.

²¹ Ɣööt kadiäk ke kɔc ee tïït nu në kueer këc, ku pɛ̈ɛ̈ny nu në kaamden, ku kueer ee lɔ ɣöt, keek kedhie thëmden akït, acïtkï ka kɔ̈k tɔ̈u në kal thoŋ të lɔ amiäk. Bɛ̈ɛ̈r de kal thok ëbɛ̈n aaye mitïïr kathiërrou ku diäk, ku ye dïtde mitïïr kathiëër ku rou ku biäk.

²² Kueer lɔ ɣöt, ku awëër, ku tiim ke akööt cï ke guaŋ ë päny kɔ̈u, akïtkï në ka nu në thoŋ lɔ aköl amiäk. Kuc ke cäth kadhorou ayek kɔc lɛɛr në kal thok nhial, ku kueer lɔ ɣöt awel rɔ ë kal yic.

²³ Në kal baŋ tui në kal thoŋ të lɔ rut, ade kal thoŋ däŋ ee lɔ në kal yic thïn, cït man de kë tɔ̈u të lɔ biäk lɔ aköl amiäk. Go raan kaam de kɛ̈l thook them, go yök ke ye mitïïr kathiërdhïc.

Kal Thoŋ të lɔ Wöuwic

²⁴ Na wën go raan ɛn bɛ lɛɛr në thoŋ të lɔ wöuwic, ku ëtɛ̈ɛ̈n goku thoŋ däŋ tïŋ. Go pɛ̈ɛ̈ny ke biäk thïn them ku kueer lɔ ɣöt thïn, go keek yök acït kɔ̈kkë.

²⁵ Aade awëërnyïïn në ee ɣöötkë yiic aya, cït man de ɣööt kɔ̈kkë. Bɛ̈ɛ̈r de kal thok ëbɛ̈n aaye mitïïr kathiërrou ku diäk, ku ye dïtde mitïïr kathiëër ku rou ku biäk.

²⁶ Kuc kadhorou ke cäth ayek lɔ nhial tëde, ku kueer lɔ ɣöt thar ciëën awel yethok në kal yic. Ade tiim ke akööt cï guaŋ ë pɛ̈ɛ̈ny kɔ̈ɔ̈th në biäk thïn atuumkï nïïm në kueer.

²⁷ Tënë aya ade thoŋ lɔ në kal yic thïn. Go raan kaam thoŋ ë rou them, go yök ke ye mitïïr kathiërdhïc.

Biäk Thïn de Thoŋ të lɔ Wöuwic

²⁸ Go raan a tɛ̈ɛ̈k në thoŋ të lɔ wöuwic leer ɛn ë kal yic thïn. Go kal thok them, ke le yök ke kït ke thëm de kal thok në päny kɔ̈u biäk biic.

²⁹ Ku ɣöötkɛn ke kɔc ee tïït, ku kuɛɛr lɔ ɣöt, ku pɛ̈ɛ̈ny tɔ̈u në biäk thïn aake kït në thook kɔ̈kkë. Aake ye bɛ̈ɛ̈r de kekɔ̈ɔ̈th mitïïr kathiërrou ku diäk, ku ye dït de kek yiic mitïïr kathiëër ku rou ku biäk.

³⁰ Aade awëërnyïïn nu në ɣööt ke thoŋë. Bɛ̈ɛ̈rde ëbɛ̈n aaye mitïïr kathiërrou ku dhïc, ku ye dïtde mitïïr kathiëër ku rou ku biäk.

³¹ Kueer lɔ ɣöt awël yethok ë kalic, ku tiim ke akööt acï ke guaŋ në kal kɔ̈u në kueer këc. Kuc kabɛ̈t ayek kɔc lɛɛr nhial në ee thoŋë.

Biäk Thïn de Thoŋ të lɔ Amiäk

³² Go raan a tɛ̈ɛ̈k në thoŋ të lɔ aköl amiäk leer yɛn ë kal yic thïn. Go kal thok them, ku yök ke thööŋ ke kɔ̈kkë.

³³ Ɣöötkɛn ke kɔc ee tïït, ku thook ke ɣööt, ku pɛ̈ɛ̈nykɛn nu ë biäk thïn, thëmden akït ke thëm de thook kɔ̈kkë. Aade awëër nyïïn cï ye gɛɛu cil, ku në ɣööt thook thïn aya. Bɛ̈ɛ̈rde ëbɛ̈n aaye mitïïr kathiërrou ku diäk, ku ye dït de kek yiic mitïïr kathiëër ku rou ku biäk.

³⁴ Ɣön ee kɔc lɔ thïn awël yethok ë kalic. Tiim ke akööt acï ke guaŋ pɛ̈ɛ̈ny kɔ̈ɔ̈th në biäk thïn në kueer këc. Kuc ke cäth kabɛ̈t ayek lɛɛr nhial në ee thoŋë.

Biäk Thïn de Kal: Thoŋ të lɔ Rut

³⁵ Go raan a jɔt leer ɛn në thoŋ të lɔ rut. Go them, go yök ke kït ke thook kɔ̈kkë.

³⁶ Acït keek aya, ade yic ɣööt ke kɔc ee tïït, pɛ̈ɛ̈ny cï giɛt kɔ̈ɔ̈th në biäk thïn, ku awëër nyïïn cï ye gɛɛu cil ëbɛ̈n. Bɛ̈ɛ̈rde ëbɛ̈n aaye mitïïr kathiërrou ku diäk, ku ye dïtde yenyic mitïïr kathiëër ku rou ku biäk.

³⁷ Ɣön ee tëëk ke lɔ thïn, awel yethok kal biäk biic. Tiim ke akööt acï ke guaŋ ë pɛ̈ɛ̈ny kɔ̈ɔ̈th në kueer këc. Ku ade kuc ke cäth kabɛ̈t ye kɔc lɔ nhial ee thoŋë.

Ɣööt Thiääk në Thoŋ të lɔ Rut

³⁸ Në kal baŋ biic, ade gɔ̈ɔ̈l cï nuat ë kal thoŋ biäk thïn të lɔ rut. Ee rɔt liɛp ɣön wel yethok kal yic, ku ayek wai ke läi bï gam ke ke ye miɔ̈c ye nyop ëbɛ̈n waak ëtɛ̈ɛ̈n.

³⁹ Ku gɔ̈ɔ̈lë ade yic pɛɛm kaŋuan, rou ayek nu ë biäk töŋ de ɣöt. Ayek läi bïï gam ke ke ye miɔ̈c nɔ̈k ee pɛɛmkë nïïm, na ee läi bï nyop ëbɛ̈n, ku nɔn ee läi ke miɔ̈c de kërac, ku nɔn ee miɔ̈c de awäc.

⁴⁰ Në ɣöt thok biic ade pɛɛm kaŋuan cït keek, rou ayek nu në biäk töŋ de kal thoŋ të lɔ rut.

⁴¹ Cakaa nɔn de yen pɛɛm kabɛ̈t ye ë läi ke miɔ̈c näk nɔ̈k: ŋuan në ɣöt yic thïn ku ŋuan në kal yic biic.

⁴² Pɛɛm kaarou nu në gɔ̈ɔ̈l yic, aye ke miɔ̈c ye nyop ëbɛ̈n guiir thïn, të de kur cï tɛm. Bɛ̈ɛ̈rden ke lɔ nhial aaye thɛntimitïïr kathiërdhïc, ku kenïïm aake ye thɛntimitïïr kathiërdhorou ke ke kït. Ka ye ke läi ke miɔ̈c näk kiëët ëbɛ̈n aye keek tɔ̈ɔ̈u në ee pɛɛmkë nïïm.

⁴³ Kake muk ye dïtden milimitïïr kathiërdhorou ku dhïc, aake kuɛɛr kɔ̈ɔ̈th në pɛɛm thook ëbɛ̈n. Rïŋ ëbɛ̈n rïŋ bïï gam ke ye miɔ̈c aaye tääu në pɛɛm nïïm.

⁴⁴ Na wën ke bïï yɛn ë kal yic biäk thïn. Aade ɣööt kaarou wel kethook ë kalic ëtɛ̈ɛ̈n, tök awel yethok wöuwic tëthiääk ke thoŋ të lɔ rut, ku däŋë awel yethok të lɔ rut tëthiääk ke thoŋ lɔ wöuwic.

⁴⁵ Go raan ya yɔ̈ɔ̈k an ɣön wel yethok wöuwic ee këde bäny de kake Nhialic ee lui Luaŋdït,

⁴⁶ ku ɣön wel yethok të lɔ rut, ee këde bäny ke kake Nhialic ee lui në yïk kɔ̈u. Bäny ke kake Nhialic kedhie ayek kuat de Dhadok, ee kek kɔc ke dhiën de Lebai cï päl luɔi bï kek aa lɔ në Bɛ̈nydït nɔm kapäc, bïk lɔ luööi.

Kal Biäk Thïn ku Luaŋdït

⁴⁷ Go raan biäk thïn de kal them, go yök ke ye mitïïr kathiërdhïc në aguuk kaŋuan ëbɛ̈n. Luaŋdït aa tɔ̈u në biäk të lɔ athɛ̈i, ku në yenɔm tueŋ ade yïk.

⁴⁸ Go yɛn lɛɛr ɣön tɔ̈u Luaŋdït yic thïn. Go thoŋde them: Go thuthde aa mitïïr kaarou ku biäk, ku ye dïtde mitïïr kadhorou, ku ye dhïl de pɛ̈ɛ̈nyke mitïr tök ku biäk në biäk kedhie.

⁴⁹ Kuc ke cäth ayek kɔc lɛɛr nhial, aake ye dïtden mitïïr kathiëër ku thuthden mitïïr kadhetem. Ku aade aber kaarou, tök në thoŋ biäkë ku däŋ në thoŋ biäkë.