Edhekiɛl 4 - JAM DE NHIALIC 2011

Edhekiɛl Anyooth Gɛ̈u de Jeruthalem

¹ Go Bɛ̈nydït lueel an, “Mɛnh ë raan, nöm thob, tääuwë në yïnɔm tueŋ, ku giɛtë kɔ̈u giɛɛt kɛ̈ɛ̈r pänydït de Jeruthalem.

² Ku tääuwë gɛ̈u në kal kɔ̈u, ku wec puöl, ku tiɔp, ku pɛɛny ku nyök ke amɛ̈l riŋ në yelɔ̈ɔ̈m.

³ Nöm aduŋ de wëëth, ku tääuwë cï päny de wëëth në kaamdu we pänydït. Wɛlë yïnɔm pänydït. Acï gɛɛu cil, ku ee yïn geeu en cil. Kënë abï aa kïït tëde baai de Yithriɛl.

⁴ “Ëtɛ̈ɛ̈n tɔ̈c në biäk camdu, ku yɛn bï awäny de baai de Yithriɛl tääu në yïyeth.

⁵ Në bot kadiäk ku thiërdhoŋuan ke nïn, yïn bï tɔ̈u ëtɛ̈ɛ̈n ke yï gum në biäk de awänyden. Yïn cï mäc kööl tök ë ruöönic ke ye lui këtuc baai de Yithriɛl.

⁶ Na lɔ ee kënë lɔ thöl, ke yï pɔ̈k rɔt në biäk cuëc, ku be awäny de Juda guum, në nïn kathiërŋuan, kööl tök ë ruöön yic ke ye këtuc luiyë keek.

⁷ “Tääuwë yïnyin piny në gɛ̈u de Jeruthalem guöp. Nyooth pänydït ë yïcin ku jɔ këtuc caar ë yeguöp.

⁸ Yïn bä duööt nhial, ke yï cïï rɔt bï bɛ aa pɔ̈k tɛ̈n ku tɛ̈n, agut të bïï ë gɛ̈u ë pänydït thök.

⁹ “Ënɔɔnë nöm agamɔ, ku barli, ku akuem, ku tɔɔŋ piny, ku rap, ku awuööu. Liääpë keek tëtök, ku loi kuïn cï pam. Yen kë bä ya cam ka, në nïn bot kadiäk ku thiërdhoŋuan (390) yiic, ke yï cï tɔ̈c në biäk cam.

¹⁰ Yïn bï päl bot kaarou ku thiërdiäk de kuïn cï pam në kööl tök, ku abï tɔ̈u aɣet cï kööl däŋë.

¹¹ Yïn bï aa dek aya në pïïu cï thɔ̈ɔ̈ŋ, cuöp kaarou në kööl tök.

¹² Ku abäk cam cï kuïn cï pam de barli, ku jɔ cam ke woi kɔc ëbɛ̈n, ku abï nyop në many de ceth ke kɔc cï riɛl.”

¹³ Go Bɛ̈nydït lueel an, “Kënë anyooth kueer bïï kɔc ke Yithriɛl dhil aa cam në këcam cïï ë löŋ pëën, të lan ke thiäi në juöör yiic.”

¹⁴ Guɔ bɛ̈ɛ̈r an, “Bɛ̈nydït Awärjäŋ, Yɛn kën rɔt dhiöök ëcaŋɣɔn aa yɛn meth, yɛn kën rïŋ de lɛ̈n cï thou kɔn cam, lɛ̈n ë thou yetök ku nɔn ë ciɛm lɛ̈n däŋ, yɛn kën kɔn cam në kacaam ke acuɔl.”

¹⁵ Go Nhialic lueel an, “Apiɛth arëët. Yïn bä tɔ nyop kuïn cï pam në wär ke ɣɔ̈k.”

¹⁶ Go bɛ lueel an, “Mɛnh ë raan, Yɛn lɔ kueer ee kacaam bɛ̈ɛ̈i Jeruthalem teem kɔ̈u. Kɔc tɔ̈u ëtɛ̈ɛ̈n abïk piɔ̈ɔ̈th jiɛth ku diɛɛrkï të le kek kuïn camkï aa them, ku themkï pïïu yek dek.

¹⁷ Abïk nïïm ciɛ̈n kuïn cï pam ku pïïu dekkï, abïk diɛɛr aläl, ku jɔkï riëër wei, në biäk de awɛ̈ɛ̈cken.”