Edhekiɛl 38 - JAM DE NHIALIC 2011

Gok ee këde Nhialic

¹ Go jam de Bɛ̈nydït bɛ̈n tëde yɛn an:

² “Mɛnh ë raan, rɛɛcë Gok, bɛ̈ny tueŋ de cieŋ juöör ke Mecek ku Tubal nu piny de Magɔk, rɛɛcë,

³ ku lɛ̈kë yen an, Yɛn Bɛ̈nydït Awärjäŋ, Yɛn ee raan de aterde.

⁴ Abä wɛl nɔm ciëën, ku tääu alabithɔ në yegëm ku ja thɛl wei kekë remdɛn ë tɔŋ kedhie. Remdɛn ë tɔŋ kekë jöŋgöörke, ku kɔckɛn kuath keek ke ke ceŋ ka ke thöŋ gup, ee këdïït ë gäi, ku rem de tɔŋ ëbɛ̈n, keek kedhie abïk kööt ku abätɛ̈ɛ̈u muk.

⁵ Kɔc ke Perthia, ku Kuc, ku Libya atɔ̈ukï në keek kedhie, ku adekï kööt ku akuup ke tɔŋ.

⁶ Kɔc ke tɔŋ de piny de Gomer ku Beth Togama tɔ̈u të lɔ rut atɔ̈ukï në yen, ku yen ee täu de röör ke juöör kɔ̈kë ëbɛ̈n.

⁷ lɛ̈kë yen bïï rɔt coc kekë remdɛn ë tɔŋ ke ke tit yöökdɛn bïï yen ke yɔ̈ɔ̈k.

⁸ Të lee run juëc wan abä yɔ̈ɔ̈k bïï baai lɔ peec, të wään cï ë kɔc bɛ̈ɛ̈i ciëën tëtök, në juöör juëc yiic ku rëërkï ke cïn riɔ̈ɔ̈c de tɔŋ. Abï kur ke Yithriɛl peec, kur wään cï nyääŋ piny ɣɔn thɛɛr, ku ënɔɔnë kac arëërkï ke ke cïn riɔ̈ɔ̈c.

⁹ Yen kekë remdɛn ë tɔŋ ku jɔ ya juöör kɔ̈k tɔ̈u në yen ëtök, abïk kɔc mak cït man amaŋ ku kum piny cït luäät.”

¹⁰ Yen kë cïï Bɛ̈nydït Awärjäŋ lɛ̈k Gok ka: “Të le köölë bɛ̈n yïn bï täŋ de kiɛɛr rac gɔl.

¹¹ Yïn bï piny cïn riɛl lɔ peec, të rëër ë kɔc në mät ku cïn riɔ̈ɔ̈c, bɛ̈i cïn nïïm kɛ̈l ku cïn thook cï gël.

¹² Wek bï kɔc rɛ̈ɛ̈r në pɛ̈ɛ̈nydït cï kɔn riɔ̈ɔ̈k rum ku yakï keek. Acïk keek määt yiic në juöör yiic, ku ënɔɔnë acïk dɛk kajuëc ke ɣɔ̈k ku rëërkï në apɔ̈k kuɛɛr ke pinynɔm.

¹³ Kɔc ke Ceba ku Dedan ku kɔc ke bɛ̈i ke Tarcic ee käŋ ɣaac, abïk yïn aa thiëëc an, “Ee yï mɛ̈ɛ̈t remduön ë tɔŋic makë kɔc, në luɔi bï yïn rum ku yak kɔc? Ee yï kɔɔr bä adhɛ̈p, ku atek, ku kajuëc ku ɣɔ̈k yök, ku bä jɔ jäl wek ee kakë kedhie?”

¹⁴ Ka yïn mɛnh ë raan lɔ lɛ̈kë Gok an: “Kë lueel ë Bɛ̈nydït Awärjäŋ kï an ënɔɔnë të rëërë kɔckiën ke Yithriɛl ke cïn riɔ̈ɔ̈c, yïn bï rɔt jɔt

¹⁵ tëdu në biäk të lɔ rut ke yï cath we remdïït ril de tɔŋ, rem bɔ̈ në juöör juëc yiic, keek kedhie aciɛthkï në jöŋgöör kɔ̈ɔ̈th.

¹⁶ Wek bï kɔckiën ke Yithriɛl mak cï amaŋ tem piny kɔ̈u. Të cï köölë bɛ̈n, wek bä ke tooc bäk pinydï lɔ peec, ke bä nyuöth juöör ya ŋa, bä ɣɛɛr de yɛn yic nyuɔɔth në kë bä looi në kueerdun.

¹⁷ Wek aye kɔc ɣɔn thɛɛr jaam Yɛn në biäkden, wään caal ɛn en në kueer de awuutkï, tit ke Yithriɛl, në akööl bï bɛ̈n tueŋë, yɛn bï kɔc bï Yithriɛl bɛ̈n mak bɛ̈ɛ̈i.” Acïï Bɛ̈nydït Awärjäŋ lueel.

Nhialic Alui Gok Këtuc

¹⁸ Aye Bɛ̈nydït Awärjäŋ lueel an, “Në kööl bïï Gok Yithriɛl peec, yɛn bï gɔ̈th.

¹⁹ Acä bɛ̈n lueel në tuöc de agönhdï, në ye köölë piny abï rɔt nieeŋ aläl piny de Yithriɛl.

²⁰ Rɛ̈c ku dit ëbɛ̈n, ayï läi dït ku läi kor, ayï mɛnh ë raan tɔ̈u në pinynɔm abï lath në riɔ̈ɔ̈c riɔ̈ɔ̈c en në yɛn. Kur abïk löny, ayï kur nïïm abïk röt kuem, ku wiëëk pɛ̈ɛ̈ny ëbɛ̈n.

²¹ Yɛn bï Gok riääc në kuat de riääk tuc thok. Acä lueel, Yɛn Bɛ̈nydït Awärjäŋ. Kɔcke abïk abätɛ̈ɛ̈uken pɔ̈k röt kapäc.

²² Abä ke luöi këtuc në juäi ku kuëër de riɛm. Rel de deŋ ku deŋ kɔɔi, kedhie në mac ku thulpur, abïk röt wäl në yenɔm kekë remdɛn ë tɔŋ, ku rɛm ke tɔŋ ke juöör kɔ̈k tɔ̈u në biäkde.

²³ Në ye kueerë abä jɔ nyuöth juöör ëbɛ̈n, luɔi diëët Ɛn, ku ɣɛɛr yic. Abïk jɔ ŋic ëtɛ̈ɛ̈n nɔn ee Yɛn Bɛ̈nydït.”