Edhekiɛl 36 - JAM DE NHIALIC 2011

Athiɛɛi Thieei ë Nhialic Yithriɛl

¹ Go Bɛ̈nydït lueel an, “Mɛnh ë raan, jam we kur ke Yithriɛl ku lɛ̈kë keek bïk kë bä lɛ̈k lueel,

² Yɛn Bɛ̈nydït Awärjäŋ piŋ: kɔc ke ater ke Yithriɛl acïï tiɛɛl ke dɔm, ayek lueel an, ‘Ënɔɔnë kur thɛɛrkë ayek kakuɔ!’

³ “Cäärë, ëtɛ̈ɛ̈n, ku caalë kë luɛɛl Yɛn Bɛ̈nydït Awärjäŋ. Të le juöör thiɔ̈k we peec ku rumkï kur ke Yithriɛl, keek kedhie acïk Yithriɛl läät.

⁴ Ka ënɔɔnë piŋ kë luɛɛl Yɛn Bɛ̈nydït Awärjäŋ, lɛ̈kë ee kurkë ku kur kor, ku nyïïn ku wɛ̈k, ku ɣään cï nyääŋ piny ke ke cï riääk, ku pɛ̈ɛ̈nydït cï nyääŋ piny cï ke yak yiic, ku ye ke dɔl gup në juöör thiääk në week.

⁵ Acä lueel, Yɛn Bɛ̈nydït Awärjäŋ në tuöc de agönhdï wokë juöör thiääk në week, ku në Edom aläl. Në agɛɛt ku riääk, acïk pinydï rum ku nömkï ɣäänkɛn ke nyuäth.

⁶ “Cäärë në biäk de piny de Yithriɛl, lɛ̈kë kur ku kur kor ku nyïïn ke pïïu, ku wɛ̈k, kë luɛɛl Yɛn Bɛ̈nydït Awärjäŋ, aluɛɛl në tiɛɛl de agɔ̈th në biäk de kueer cïï juöör ke läät ku koorkï keek piny.

⁷ Yɛn Bɛ̈nydït Awärjäŋ yɛn cï kuëëŋ an juöör thiɔ̈k në week abïk nuan ë yaaŋ.

⁸ Ku në kur ke Yithriɛl nïïm tiim abïk bɛ ciɛl ku abïk yïth cil, ku lokkï në mïth në biäk de kɔckiën ke Yithriɛl. Wek bï bɛ̈n pinydun në ee nïnkë yiic.

⁹ Yɛn tɔ̈u në biäkdun, ku abä dhil tïŋ ë gɔk nɔn bïï pinydun bɛ puur ka kɔ̈th abïï ke com ëtɛ̈ɛ̈n.

¹⁰ Wek bä ke tɔ kuet, ka wek baai de Yithriɛl abï juëc, pɛ̈ɛ̈nydït abï ke cieŋ ku yiɛ̈kkï këriëëc wään cï riɔ̈ɔ̈k ëbɛ̈n.

¹¹ Yɛn bï kɔc ku ɣɔ̈k tɔ kuet abïk juëc. Wek bï juëc ka wek bï täuduön thɛɛr wuöör, ku wek bï dɛk mïth juëc. Wek bä ke tɔ rɛ̈ɛ̈r ëtɛ̈ɛ̈n cït man wään rɛ̈ɛ̈r wek, ku wek bä ke tɔ kueth në kajuëc awär täuduön wään thɛɛr. Ëtɛ̈ɛ̈n abäk jɔ ŋic nɔn ee Yɛn Bɛ̈nydït.

¹² Wek bä ke bɛ̈ɛ̈i kɔckiën ke Yithriɛl, dɔ̈k wenïïm bäk bɛ bɛ̈n rëër në piny yic. Abï aa pinydun, ku acïï mïthkun bï bɛ tɔ nɛ̈k cɔk.

¹³ “Aya lueel Yɛn Bɛ̈nydït Awärjäŋ: Ee yic yen ye kɔc lueel an piny ee kɔc cam, ku ee jur rum në mïthke.

¹⁴ Ku gɔl ënɔɔnë le tueŋ acïï bï bɛ ŋoot ke cam kɔc, ku cïï jurdun bï rum në mïth. Acä lueel, Yɛn Bɛ̈nydït Awärjäŋ.

¹⁵ Piny acïï bï bɛ ŋoot ke piŋ ka lueel juöör dɔl kek yeguöp ku nɔn buikï guöp. Piny acïï bï bɛ ŋoot ke rum jur në mïthke. Acä lueel, Yɛn Bɛ̈nydït Awärjäŋ.”

Pïïr ë Yithriɛl ë Piac Bɛ̈n

¹⁶ Go jam de Bɛ̈nydït bɛ̈n tëde yɛn an:

¹⁷ “Mɛnh ë raan, wään ceŋ ë baai de Yithriɛl pinyden, acïk bɛ̈n dhiöök në kueer ye kek pïïr ku të ye kek käŋ luɔi thïn. Yɛn cï luɔiden bɛ̈n tïŋ ke cïï yic ɣer në biäk de ciɛɛŋ, cït man ye tik tɔ̈u në aköölkɛn ke thɛ̈k.

¹⁸ Abä ke tɔ yök tuöc de agönhdï thok, në biäk de kɔc wään cïk nɔ̈k pinyde Yithriɛl, ku në biäk de yiëth wään cï kek ye dhiöök.

¹⁹ Acä ke bɛ̈n jɔ̈ɔ̈ny në kueerdɛn ye kek pïïr ku të ye ke kaken luɔɔi thïn, guɔ ke thiäi piny në juöör ke piiny lei yiic.

²⁰ Të cï kek lɔ ë juöör yiic, ayek ayäär yiɛ̈n rinkiën ɣer yiic, në biäk bïï kɔc en lueel an, ‘Kakë ayek kɔc ke Bɛ̈nydït Awärjäŋ ku acïk pinyde dhil nyääŋ piny.’

²¹ Ku Yɛn diɛɛr në biäk de rinkiën ɣer yiic, ë luɔi cï baai de Yithriɛl ke tɔ yäär në juöör ë bïï kek thïn ëbɛ̈n.

²² “Ënɔɔnë gämë baai de Yithriɛl jam luɛɛl Yɛn Bɛ̈nydït Awärjäŋ në biäkden: kë bä lɔ looi acie biäkdun wek ke baai de Yithriɛl, ee biäk de Rinkiën ɣer yiic, rin cäk keek yɔ̈ɔ̈r në juöör yiic ëbɛ̈n ɣään cä wek lɔ thïn.

²³ Të lan juöör nyuöth ɣɛɛr ë yic de rinkiën dït, rin cäk yɔ̈ɔ̈r në keyiic, ëtɛ̈ɛ̈n abïk jɔ ŋic nɔn ee Yɛn Bɛ̈nydït. Acä lueel, Yɛn Bɛ̈nydït Awärjäŋ. Wek bä keek luööi aguɔ nyuöth juöör ŋic nɔn ɣɛɛr Yɛn yic.

²⁴ Wek bä ke jɔt në juöör yiic ëbɛ̈n, ku bɛ̈ɛ̈i week ciëën pinydun.

²⁵ Wek bä ke wiëth gup pïïu lɔ kïr, ku wek bä waak gup në karɛckun ëbɛ̈n, ku gël week në yiëthkun ku këriëëc cï we dhiöök ëbɛ̈n.

²⁶ Wek bä ke gäm piɔ̈ɔ̈th cï piac cak ku nïïm cï piac looi. Yɛn bï riɛl ë nɔmduön cït kuur nyaai ku gäm week piɔ̈n de riëëu.

²⁷ Yɛn bï wëikï tääu në weyiic, ku akaar bä tïŋ ke we kuany lööŋkï cök ku dötkï ka cä ke lɛ̈k week kedhie.

²⁸ Ku ëtɛ̈ɛ̈n we bï jɔ rëër piny cä gäm kuarkun,. Wek bï aa kɔckï, ku Yɛn bï ya Nhialicdun.

²⁹ Wek bä ke kony në këriëëc ee we dhiöök ëbɛ̈n. Yɛn bï rap yɔ̈ɔ̈k bïk juëc ke we cïï nïïm bï bɛ dɛk cɔk.

³⁰ Yɛn bï mïth ke tiim ee luɔk ŋuak nyïïn ku duumkun, ke cïï bï bɛ dɛk cɔŋ bï week yɔ̈ɔ̈r në juöör yiic.

³¹ Wek bï karɛc ë ya looi aa tak, ku awɛ̈ɛ̈c cäk looi ë röt wapäc, ku wek bï gup riɔ̈ɔ̈c në biäk de awɛ̈ɛ̈ckun ku karɛckun.

³² Baai de Yithriɛl, akaar bäk ŋic nɔn cän ee kakë loi në biäkdun. Akaar bäk ayäär yök ku bäk gup riɔ̈ɔ̈c në biäk de ka luɔikï. Acä lueel, Yɛn Bɛ̈nydït Awärjäŋ.”

³³ Aye Bɛ̈nydït Awärjäŋ lueel an, “Të lan week tɔ piɛth në awɛ̈ɛ̈ckuön cäk ke looi kedhie, wek bä ke bɛ tɔ rɛ̈ɛ̈r në pɛ̈ɛ̈nydïtkun yiic ku bɛ week tɔ yïk kakuön cï riääk yïk.

³⁴ Raan ëbɛ̈n raan ee ye tëëk në duumkun lɔ̈m, aaye wal cï dït tïŋ, ku wek bä bɛ tɔ com duumkun.

³⁵ Abïï raan ëbɛ̈n aa lueel an, tïŋ piny wään cï kɔn aa jɔ̈ɔ̈r, acï ciët dom de Eden, ku tïŋ pɛ̈ɛ̈nydït wään cï riɔ̈ɔ̈k, ku pec keyiic ku nyiëëŋë keek piny ke ke cï riääk, ënɔɔnë acï keek bɛ ɣap ku gël keek.

³⁶ Ëtɛ̈ɛ̈n abïï juöör thiɔ̈k wään cï poth, abïk jɔ ŋic nɔn ee Yɛn Bɛ̈nydït, ee yɛn ë be pɛ̈ɛ̈nydït cï riɔ̈ɔ̈k nyɔk ë yïk ku bɛ duum cï riääk com. Yɛn Bɛ̈nydït Awärjäŋ, acä lueel nɔn bän ee kënë looi, ku abä looi.”

³⁷ Aye Bɛ̈nydït Awärjäŋ lueel an, “Yɛn bï baai de Yithriɛl bɛ tɔ thiëc Yɛn në kuɔɔny, ku abä ke tɔ kuënden ŋuak nyïïn, cït luny de amɛ̈l.

³⁸ Kek pɛ̈ɛ̈nydït tɔ̈u ke ke cï riääk ënɔɔnë, abïk bɛ thiäŋ në kɔc, cït man wään ye Jeruthalem thiäŋ ke amɛ̈l ye keek gam ke ke ye miɔ̈c näk në dhuëŋ yiic. Ëtɛ̈ɛ̈n abïk jɔ ŋic nɔn ee Yɛn Bɛ̈nydït.”