Edhekiɛl 35 - JAM DE NHIALIC 2011

Këtuc cï Nhialic Luöi Edom

¹ Go jam de Bɛ̈nydït bɛ̈n tëde yɛn an:

² “Mɛnh ë raan, rɛɛcë piny de Edom.

³ lɛ̈kë kɔc kë luɛɛl Yɛn Bɛ̈nydït Awärjäŋ: Yɛn ee raan de aterdun wek kur ke Edom! Wek bä tɔ ee të cï pɔ̈l.

⁴ Yɛn bï pɛ̈ɛ̈nydïtku nyääŋ piny ke ke cï riɔ̈ɔ̈k, ku cï pinydun pɔ̈l, Ëtɛ̈ɛ̈n abä jɔ ŋic nɔn ee Yɛn Bɛ̈nydït.

⁵ “We aaye kɔc ke ater de Yithriɛl ë caŋɣɔn, ku takï kɔcke temë röt në akööl ke riääkde yic, akööl ciëën ke këtuc cï luöi yen në biäk de awɛ̈ɛ̈cke.

⁶ Ka ënɔɔnë, ee yic, ke ya ye Bɛ̈nydït Awärjäŋ, yɛn ee Nhialic pïïr, thuɔɔu yen ee këdun, ku acäkï bï ban. Wek de gup awäny de nääk, ku nääk, abï we kuany cök.

⁷ Yɛn bï piny de kur de Edom tɔ ye piny cï pɔ̈l, ku näk raan ëbɛ̈n raan ee tëëk në ye kueerë yic.

⁸ Yɛn bï kur thiɔ̈ɔ̈ŋ nïïm në gup ke kɔc cï thou, ku gup ke kɔc ë näk ë tɔŋic, abïk kur kor ku wɛ̈k kum nïïm.

⁹ Yïn bä tɔ cïn yic kɔc aɣet athɛɛr, ku acïn raan bï bɛ rëër në pɛ̈ɛ̈nydïtku yiic. Ëtɛ̈ɛ̈n abä jɔ ŋic nɔn ee Yɛn Bɛ̈nydït.

¹⁰ “Acï lueel an ye juöör kaarou, Juda kekë Yithriɛl ayï pinyden ëtök, ayek kaku ku aduëërë ke nööm, cakaa nɔn ee Yɛn Nhialicden, Yɛn Bɛ̈nydït.

¹¹ Ka ënɔɔnë, ee yic, ke ya ye Bɛ̈nydït Awärjäŋ, yɛn ee Nhialic pïïr, wek bä cuöl agönhdun, ku tiɛɛldun, ku män maan wek kɔckï. Abïk ŋic nɔn luöi Ɛn week këtuc në biäk de kë cäk luöi keek.

¹² Ku ëtɛ̈ɛ̈n abäk jɔ ŋic nɔn ee Yɛn Bɛ̈nydït Awärjäŋ, raan cï ye piŋ ke yak lueel në agɔ̈th an cï kur ke Yithriɛl pɔ̈l ku yek kakuön bäk cam.

¹³ Yɛn cï jam rɛɛc de lɛc ya wek ya jääm guöp piŋ.”

¹⁴ Aye Bɛ̈nydït Awärjäŋ lueel an, “Wek bä tɔ ee piny cï pɔ̈l, ka pinynɔm ëbɛ̈n abï piɔ̈u në wïïkdu,

¹⁵ cït man wään cä wek piɔ̈ɔ̈th miɛt në riäŋ baai de Yithriɛl, kɔc ke nɔmdï. Kur ke Theyir, piny de Edom ëbɛ̈n, abï yic ciën kɔc. Ëtɛ̈ɛ̈n abïï raan ëbɛ̈n ŋic nɔn ee Yɛn Bɛ̈nydït.”