Edhekiɛl 34 - JAM DE NHIALIC 2011

Tïn de Yithriɛl

¹ Go jam de Bɛ̈nydït bɛ̈n tëde yɛn an:

² “Mɛnh ë raan, rɛɛcë bäny ke Yithriɛl. Cäär tëde keek, ku lɛ̈kë keek kë luɛɛl Yɛn Bɛ̈nydït Awärjäŋ: lɛ̈kë keek: Amawoou në week, wek tïït ke Yithriɛl! Wek ee röt muk apiɛth ku wek cïï thök ee kɔn tiit.

³ Wek ee dek në ca, ku ciɛŋkï lupɔɔ cï cuëëc në nhïm, ku näkkï ku cuetkï thɔ̈ɔ̈k piɛth ë thök yiic. Ku wek cïï thök ee kɔn tiit.

⁴ Wek kën ka kɔ̈c kɔn tïït, ku takï ka tök gup piɔl, ku kɛ̈nkï ɣään töök ke ka de gup bɔ̈ɔ̈t duut, ku kɛ̈nkï thök cï määr lɔ puk nïïm ciëën, ku nɔn lak ka cï määr kɔɔr, ayak keek luööi ke ke yaŋkï keek.

⁵ Në biäk cïn ë thök nïïm raan ee ke tiit, acïk thiäi, ku lɔ läi roor ke nɔ̈k ku cuet keek.

⁶ Ka thökkï ayek tai në kur nïïm ku kur kor thöny nïïm. Acï keek thiäi në piny yic ëbɛ̈n ku acïn raan ee keek kɔɔr ku bïï keek lɔ bɛ̈ɛ̈i.

⁷ “Ënɔɔnë, wek tïït, piɛŋkï kë lɛ̈k week, yɛn Bɛ̈nydït.

⁸ Në yic ke ya ye Nhialic pïïr, apiɛth bäk kë lɛk week piŋ. Thökkï acïï läi roor ke näk ku cuet keek në biäk cïn en tïn ee keek tiit. Tïn de thökkï akën them bïï thök lɔ kɔɔr. Aake ye röt muk kapäc ku acie thök kek ë titkï.

⁹ Ka piɛŋkï kë luɛɛl wek tïït.

¹⁰ Yɛn Bɛ̈nydït Awärjäŋ, acä lueel nɔn ee Yɛn raan de ater wo tïït ke thök. Yɛn bï amɛ̈lkï nööm tëde week, ku cä week bï bɛ tɔ ee tïït ke thök, wek cä ke bï bɛ tɔ muk röt wapäc. Yɛn bï amɛ̈lkï luäk bei në wecin, ku cä week bï bɛ tɔ cuet thök.

Tïn piɛth

¹¹ “Yɛn Bɛ̈nydït Awärjäŋ, alɛ̈k week nɔn bän amɛ̈ldiën cï määr kɔɔr në yɛn ku tiɛɛt keek në yɛn

¹² cït man ye tïn de thök amɛ̈l ŋiëc muk të cï kek thiäi, aye ke bɛ lɔ määt yiic. Abä ke lɔ pɔ̈k nïïm ciëën në ɣään wään cï kek thiɛ̈i thïn në kööl ɣɔn de mɔ̈ɔ̈th ë riääk.

¹³ Abä ke lɔ bɛ̈ɛ̈i bei në piiny ke alɛi yiic, ku määt ke yiic tëtök, ku ja ke pɔ̈k nïïm pinyden. Abä ke wat ciëën ku pɔ̈k kenïïm në kur nïïm ku në nyïïn ke pïïu ke piny de Yithriɛl yiic, ku cääm keek në ɣään ke wal piɛth.

¹⁴ Abä ke tɔ nyuäth ke ke cïn riɔ̈ɔ̈c në kur nïïm të piɛth cï päl keek ke ye tëde nyuäth, në wɛ̈k yiic ku në ɣään tɔ̈c ke piny de Yithriɛl yiic ëbɛ̈n.

¹⁵ Yɛn guöpdï Yɛn bï aa tïn de amɛ̈lkï, ku abä ke kɔ̈ɔ̈r të bïï kek lɔ̈ŋ. Acä lueel, Yɛn Bɛ̈nydït Awärjäŋ.

¹⁶ “Yɛn bï ka cï määr lɔ kɔɔr, ku pɔ̈k ka cï tai roor nïïm ciëën, ku dɛɛr ɣään töök ke thök de gup bɔ̈ɔ̈t, ku ta ka de gup jɔɔk dem, ku ka cuai ku rilkï abä keek riɔ̈ɔ̈k, në biäk ee Yɛn tïn ee kë yic looi.

¹⁷ “Ku ënɔɔnë, lunydï, Yɛn Bɛ̈nydït Awärjäŋ alɛ̈k week nɔn bän löŋ de raan ëbɛ̈n guiir në we yiic, ku pääk këpiɛth kekë kërac, ku pääk amɛ̈l kekë nyök bɔɔth.

¹⁸ Kɔc kɔ̈k ë wek yiic, akënkï piɔ̈ɔ̈th röŋ në cäm de wal piɛth, wek ee wal kënkï cam dum yiic në wecök! Wek ee pïïu lɔ nyïïn top dek, ku dhuöthkï ka kɛ̈nkï keek dek në tiɔ̈k!

¹⁹ Amɛ̈lkiën kɔ̈k abïk wal cäk keek dum yiic dhil nyuööth, ku dekkï pïïu cäk keek dhuth në tiɔ̈k.

²⁰ “Ka ënɔɔnë, Yɛn Bɛ̈nydït Awärjäŋ alɛ̈k week nɔn bän löŋ guiir në kaamdun wek amɛ̈l ril ku amɛ̈l kɔ̈c.

²¹ Wek ee thök tök gup jäp wei ku cuɔpkï ke wei në thök yiic.

²² Ka yɛn bï amɛ̈lkï luök ku acä ke bï bɛ tɔ kucë ceŋ. Yɛn bï löŋ de amɛ̈lkï guiir ëtök tök, ku ja këpiɛth pääk kekë kërac.

²³ Abä ke gäm melik cït awundiën Debid bï ya tïndɛn tök, ku abï ke gël.

²⁴ Yɛn Bɛ̈nydït Awärjäŋ, Yɛn bï ya Nhialicden, ku melik cït awundiën Debid abï aa bɛ̈nyden. Acä lueel.

²⁵ Yɛn bï mät looi wo keek, män bï rëërdɛn tɔ tiëc. Yɛn bï läi rac tɔ̈u roor në piny yic nyaai, ago amɛ̈lkï ciën kë bï ke bɛ cam në duum yiic ku yek nïn roor.

²⁶ “Abä ke thieei ku ta ke rɛ̈ɛ̈r në kuurdiën ɣeric lɔ̈ɔ̈m. Abä ke jɔ thieei në nyieer ke deŋ ëtɛ̈ɛ̈n të kɔɔr kek en.

²⁷ Tiim abïk luɔk ë mïth, ku duum abïk luɔk në rap, ka raan ëbɛ̈n abï rëër ke cïn kë riɔ̈ɔ̈c en pinyde. Të lan kuat rek ë kɔckï tueny, gäm ke nɔm lääu tëde kɔc cï keek tɔ ee lïïm, ëtɛ̈ɛ̈n abïk jɔ ŋic nɔn ee Yɛn Bɛ̈nydït.

²⁸ Acïï juöör kuc Nhialic keek bï bɛ yak, ku acïï läi roor keek bï bɛ nɔ̈k ku cuet keek. Abïk jɔ rëër të cïn riɔ̈ɔ̈c, ku acïn raan bï ke bɛ riääc.

²⁹ Abä ke gäm duum ee ŋiëc luɔk, ku ta cɔk kääc ë piny yic. Acïï juöör kɔ̈k keek bï bɛ aa dhɔ̈l gup

³⁰ Abï raan ëbɛ̈n ŋic nɔn gɛ̈l ɛn baai de Yithriɛl, ku nɔn ye kek kɔckï. Acä lueel, Yɛn Bɛ̈nydït Awärjäŋ.

³¹ Aye Bɛ̈nydït Awärjäŋ lueel an. “Wek, amɛ̈lkï, luny ya cääm, wek ee kɔckï, ku yɛn ee Nhialicden.