Edhekiɛl 33 - JAM DE NHIALIC 2011

Nhialic Acï Edhekiɛl lɔc ke ye Tïït

¹ Go jam de Bɛ̈nydït bɛ̈n tëde yɛn an:

² “Mɛnh ë raan, lɛ̈kë kɔcku kën ee tuöl të bɛ̈ɛ̈i tɔŋ ë piny yic. Kɔc ke ee pinyë ayek raan töŋ ë kɔcken kuany ke ye tïït.

³ Të cïï yen kɔc ka ater tïŋ abɔ̈, raanë ee kaaŋ kooth lëk en kɔc.

⁴ Na de raan cï ye piŋ ku kën tääu në yepiɔ̈u nɔn ee yen kaaŋ de tɔŋ, ku lɔ kɔc ke ater bɛ̈n ku nɛ̈kkï yen, ke gääk de thonde abï tɔ̈u në yeyeth.

⁵ Thonde atɔ̈u në yeyeth ke ye awänyde, në biäk kën en lëk cï ë kɔc lɛ̈k tääu në yepiɔ̈u. Na ë cï tääu në yepiɔ̈u adï cï rɔt kual.

⁶ Ku na cï tïït kɔc ke ater tïŋ ke ke bɔ̈ ku cïï kaaŋ koth, ke kɔc ke ater abïk bɛ̈n bïk kɔc de gup awɛ̈ɛ̈cë bɛ̈n nɔ̈k, ku yɛn bï gääk tääu në tïït yeth në biäk de thon ee kɔckë.

⁷ Ënɔɔnë, mɛnh ë raan, yïn luɔi ke ye tïn de baai de Yithriɛl. Yïn bï jäny cä lɛ̈k yïnë dhil lɛ̈k keek.

⁸ Na luɛɛl en an raan ee karɛc looiyë abï thou, ku akënë lɔ jɔ̈ɔ̈ny bïï kueerdɛn ë pïïr waar yic ago kony wëi ke cïï bï thou, ke raanë abï thou ke ye de guöp awɛ̈ɛ̈c, ku yïn gɔ̈k në këde thon ee raanë.

⁹ Na jäny raan ee karɛc looi ku cïï luɔidɛn de awɛ̈ɛ̈c päl, abï thou ke ŋoot ye raan ke ye raan de guöp awɛ̈ɛ̈c, ku wëiku abï ke gël.”

Luɔi de Raan

¹⁰ Go jam de Bɛ̈nydït bɛ̈n tëde yɛn an. “Mɛnh ë raan, nyɔk kënë yic baai de Yithriɛl kë yek lueelë an: ‘Wok cïï duɔɔny në awɛ̈ɛ̈ckuɔ, ku ka cuk ke wuööc. Wok bï thök. Duëërku pïïr adï?’

¹¹ Lɛ̈kë keek, ee yic, ke ya ye Bɛ̈nydït Awärjäŋ, yɛn ee Nhialic pïïr, acä nhiaar bä kɔc de gup awɛ̈ɛ̈c tïŋ ke ke thou. Aya nhiaar bä raan bä ke tïŋ ke ke päl luɔidɛn de awɛ̈ɛ̈c ku pïïrkï. Baai de Yithriɛl jɔ luɔiduön de awɛ̈ɛ̈c ye looi pɔ̈l. Eeŋö kɔɔr yïn bä thou?

¹² ‘Ënɔɔnë, mɛnh ë raan lɛ̈kë kɔc ke Yithriɛl, an piathëpiɔ̈u de raan ee kapiɛth looi acïï yen bï kony të cï yen wäc. Na cï raan ee karɛc looi luɔidɛn de awɛ̈ɛ̈c pɔ̈l, acïï bï bɛ luöi këtuc, ku piathëpiɔ̈u de raan ee kapiɛth looi acïï yen bï kony wëi të cï yen wäc.

¹³ Yɛn duëër raan piɛth thɔ̈n pïïr, ku na le ye tak an piathëpiɔ̈ndɛn thɛɛr adït arɔ̈ŋ ke yen, ku jɔ luɔi de awɛ̈ɛ̈c bɛ gɔl, ke yɛn cïï kapiɛth ɣɔn cï looi thɛɛr bï bɛ tak. Abï thou në biäk de awɛ̈ɛ̈cke.

¹⁴ Yɛn bï raan ee karɛc looi yɔ̈ɔ̈k nɔn bï yen thou, ku na pɛ̈l luɔidɛn awɛ̈ɛ̈c ku looi yic ku këpiɛth,

¹⁵ cït man na cï käny ë cï nööm tëde raandäŋ cool, ku nɔn puk kë cï kual nɔm, ku pɛ̈l luɔi de awɛ̈ɛ̈c ku kuɛny lööŋ ee kɔc gäm pïïr cök, acïï bï thou, ku abï pïïr.

¹⁶ Yɛn bï awɛ̈ɛ̈ckɛn cï looi pɔ̈l, ku abï pïïr në biäk cïï yen yic looi ku këpiɛth.

¹⁷ “Ku wek kɔc ayak lueel an kë ya looi acie yic! Ei, ee kueerden yen acie yic.

¹⁸ Na cï raan piɛthpiɔ̈u luɔidɛn piɛth pɔ̈l ku gɔl luɔi de karɛc, ke abï thou në biäkde.

¹⁹ Na cï raan ee karɛc looi luɔidɛn de karɛc pɔ̈l, ku looi yic ku këpiɛth, acï wëike kony.

²⁰ Ku baai de Yithriɛl, ayak lueel an kë ya looi acie yic. Yɛn bï löŋdun lɔ guiir në kë yak looi.”

Thoŋ de Löny ë Jeruthalem

²¹ Në kööl de dhïc, në pɛɛi de thiëër, në ruöön ye run ë peec ë wook thiëër ku rou, aa de raan cï rɔt kual ë Jeruthalem acï bɛ̈n ku lɛ̈k ɛn nɔn cïï pänydït löny.

²² Ɣɔn thëën ke raan ë kën kɔn bɛ̈n, yɛn cï riɛldïït de Bɛ̈nydït yök në yaguöp. Na jɔ raan ɣëët në ɣɔn amiäk de kööl däŋë, go Bɛ̈nydït ya bɛ pɔ̈k nɔm riɛl de jam.

Awɛ̈ɛ̈c ke Kɔc

²³ Go jam de Bɛ̈nydït bɛ̈n tëde yɛn an:

²⁴ “Mɛnh ë raan, aye kɔc rɛ̈ɛ̈r në pɛ̈ɛ̈ny cï riɔ̈ɔ̈k nu piny de Yithriɛl lueel an: Abraɣam aaye raan tök, ku acï bɛ̈n gäm piny ëbɛ̈n. Ku ënɔɔnë wok cï dɛ kɔc juëc, ka ënɔɔnë piny ee këda.

²⁵ “Lɛ̈kë keek kë luɛɛl Yɛn Bɛ̈nydït Awärjäŋ: Wek ee rïŋ cuet ke riɛm ë ŋoot thïn. Wek ee yiëth lam. Wek ee kɔc nɔ̈k. Eeŋö ee week tɔ täk nɔn ye piny këdun?

²⁶ Wek ee röt kan në abätäudun. Luɔidun arac. Raan ëbɛ̈n ee köör ë diäär. Eeŋö ee week tɔ täk nɔn ye piny këdun?

²⁷ “Lɛ̈kë keek an Yɛn Bɛ̈nydït Awärjäŋ ajääny keek, në yic, kɔc rɛ̈ɛ̈r në pɛ̈ɛ̈ny cï riɔ̈ɔ̈k yiic abïï ke nɔ̈k. Kɔc rɛ̈ɛ̈r në wuöt biic yiic abïï läi roor ke cuet. Kɔc cï thiaan në kur nïïm ku në kök ke kur yiic abïk thou në jɔɔk.

²⁸ Yɛn bï piny tɔ cïnic raan ceŋ en, ku riɛl wään ye kek röt lɛɛcë abï thök. Kur ke piny de Yithriɛl abïk aa roor, ka cïn raan bï bɛ aa tëëk ëtɛ̈ɛ̈n ë keyiic.

²⁹ Na lɔ kɔc luöi këtuc në biäk de awɛ̈ɛ̈cken, ku ta piny päl, ëtɛ̈ɛ̈n abïk jɔ ŋic nɔn ee Yɛn Bɛ̈nydït.”

Kën ë Looi ë Jam ë Tiët

³⁰ Go ë Bɛ̈nydït lueel an, “Mɛnh ë raan, kɔckun ayek yï jääm guöp të cïï kek lɔ mat në pɛ̈ɛ̈ny ke pänydït kɔ̈u ku në kuɛɛr ke ɣöötken thook. Ayek lɛ̈k röt an, ‘Lokku ku piŋku ee jam ŋö cï bɛ̈n tëde Bɛ̈nydït ënɔɔnë.’

³¹ Ka kɔckï ayek kenïïm kut ke ke kɔɔr bïk kë bä lueel piŋ, ku acïkï kë cï lɛ̈k keek bïk looi ee looi. Wël ke nhiëër në kethook, ku ayek ŋoot ke ke cath në kuɛɛrkɛn ke dït de piɔ̈u yiic.

³² Tëde keek yïn cie këdäŋ, yïn cït raan ee thom de diɛt gut raan ee kɔc kɛ̈ɛ̈t nïïm në diɛt ke nhiëër. Ayek wëlku piŋ kedhie, ku acïn töŋ yek riëëu në keyiic.

³³ Ku të le wëlkun bɛ̈n ke ke ye yith kedhie, ku abïk aa yith ë yic, ëtɛ̈ɛ̈n abïk jɔ ŋic nɔn cïï ë tiët kɔn tɔ̈u në keyiic.”