Edhekiɛl 31 - JAM DE NHIALIC 2011

Rip acï Thɔ̈ŋ Tim de Thidar

¹ Në kööl tueŋ, në pɛɛi de diäk, në ruöön ye run ë peec ë wook thiëër ku tök, go jam de Bɛ̈nydït bɛ̈n tëde yɛn an:

² “Mɛnh ë raan, lɛ̈kë melik de Rip ku kɔcke kedhie: Ye raan ril cït ŋö! Eeŋö bä thɔ̈ɔ̈ŋ ke yïn?

³ Yïn cït tim de thidar de Lebanɔn de kër läk aa tiëp looi, Tim bɛ̈ɛ̈r ye kërke ɣet ë luäät yiic.

⁴ Ade pïïu ee yen tɔ dït ëtɛ̈ɛ̈n, kiɛɛr tɔ̈u ë piny thar ee ye cääm. Ayek të ye tim cil thïn piɔɔk, Ku yek nyïïn tuöc tiim ke rooric ëbɛ̈n.

⁵ Në biäk cïï ë ye ŋiëc piɔɔk, ee jɔ dït ke bäär awär tiim kɔ̈k. Kërke ayek kɔ̈ɔ̈th dït ku bɛ̈ɛ̈rkï.

⁶ Kuat ë dit ëbɛ̈n ee rɔ yiɛ̈k ɣöt në kërke yiic, Läi roor ayek mïthken dhiëëth në atïmde yic, Juöör ke pinynɔm ayek lɔ̈ŋ në atïmde yic.

⁷ Jɔ ya tim piɛth cït ŋö, Tim bɛ̈ɛ̈r, de kër bär. Meike ayek ɣet piny tëde nyïïn nu ë piny ya.

⁸ Acïn tim de thidar nu dom de Nhialic bï thɔ̈ŋ en. Acïn tim de kër cït kërke, ku acïn tim thiäŋ guöp ke kër aya. Acïn tim lɛ̈k nu dom ë Nhialic guöp wär en.

⁹ Acä looi ke läk, ke de kër bär. Tiim tɔ̈u dom de Eden yic kedhie, dom de Nhialic, aake ye tiɛɛl dɔm.

¹⁰ “Ku ënɔɔnë, Yɛn Bɛ̈nydït Awärjäŋ, yïn bä lëk kë bï rɔt lɔ luöi ee tim cï dït abï jɔ ɣet ë luäät yiic. Të le yen ke dït ee lɔ ke dït nɔm,

¹¹ ka acä rɛɛc ku abä tɔ nööm ë bɛ̈ny de juöör. Abï ee timë gäm kë rɔ̈ŋ ke yen, në biäk de luɔi rɛɛcde.

¹² Abï alɛi cïn piɔ̈ɔ̈th yiɛp piny ku nyiëëŋkï piny. Kërkɛn cï dhuɔɔŋ ku yïthke abïk lööny në kur nïïm ku wɛ̈k yiic në baai yic ëbɛ̈n. Juöör ɣɔn rɛ̈ɛ̈r në atïmde yic kedhie abïk jäl.

¹³ Diɛt abïk bɛ̈n aa nyuc në tim cï wïïkë kɔ̈u, ku läi roor abïk aa cath në kërke kɔ̈ɔ̈th.

¹⁴ Ku gɔl ënɔɔnë lee tueŋ, acïn tim bï bɛ dït ke bäär ke lɔ nhial cï yen, ku jiëp yenɔm nhial ë luäät yiic, cakaa yen ë ye piɔɔk. Keek kedhie abïk ŋoot ke ke thou cït mɛnh ë raan, abïk lɔ piny cï kɔc ee lɔ paan ë thuɔɔu.”

¹⁵ Kë ye Bɛ̈nydït Awärjäŋ lueel kï: “Në kööl bïï ë tim lɔ paan ë thuɔɔu, abä tɔ kumë piny në pïïu tɔ̈u piny ke ye kïn de dhiëëu. Yɛn bï pïïu ke kiɛɛr tɔ kääc, ku pɛ̈n nyïïn luɔi bïï kek thiɔɔr. Në biäk cïï tim thou, Yɛn bï mɔ̈ɔ̈th bɛ̈ɛ̈i në kur ke Lebanɔn nïïm ku ja tiim ke roor tɔ biɔɔr ëbɛ̈n.

¹⁶ Të lan en tuɔɔc piny paan ë thuɔɔu, awuɔɔu de wïïkde piny abï juöör tïŋ. Tiim ke Eden kedhie, ku tiim kɔ̈k cï lɔc, tiim ke Lebanɔn ye ŋiëc piɔɔk ka ɣɔn cï lɔ në piny thar, abïk piɔ̈ɔ̈th miɛt në wïïkde.

¹⁷ Abïk lɔ në yen paan ë thuɔɔu, bïk lɔ mat në ka wään cï kɔn wïïk. Ku ka wään rɛ̈ɛ̈r në atïmde thar abïk thiäi në juöör yiic.

¹⁸ “Tim ee melik de Rip kekë kɔcke kedhie. Acakaa tiim ke Eden acïn tim bɛ̈ɛ̈r lɛ̈k ee kɔc diir ë nu. Ku ënɔɔnë, cï tiim ke Eden abïk lɔ ë piny thar paan ë thuɔɔu, ku mɛ̈tkï në kɔc cïï Nhialic ŋic ku kɔc ë näk në tɔɔŋ yiic. Yɛn cï jam, Yɛn Bɛ̈nydït Awärjäŋ.