Edhekiɛl 30 - JAM DE NHIALIC 2011

Bɛ̈nydït abï Rip Luöi Këtuc

¹ Go jam de Bɛ̈nydït bɛ̈n tëde yɛn an:

² “Mɛnh ë raan, cäärë ku caalë kë cä lueel, yɛn Bɛ̈nydït Awärjäŋ, aluɛɛl an, Yïn bï ee wëlkë aa wuoou: Kööl de riɔ̈ɔ̈cdït abɔ̈!

³ Kööl acï thiɔ̈k, kööl bïï Bɛ̈nydït këde piɔ̈nde looi, Kööl de luät ku nuan de juöör.

⁴ Abï dɛk tɔŋ ë Rip. Ku diɛɛr dït në Ethiopia. Kɔc juëc abï ke nɔ̈k ë Rip, Baai abï yak yic ku nyiëëŋë piny kë cï riääk.

⁵ “Yen ee tɔŋë aya abï rem de tɔŋ ë riɔp në Ethiopia, ku Libiya, ku Ludia, ku Arabia, ku Kub nɔ̈k, ayï kɔckï yiic.”

⁶ Aye Bɛ̈nydït lueel an, “Gɔl në Midgol të lɔ rut ɣeet Athuan të lɔ wöuwic, kɔc gël Rip ëbɛ̈n abïï ke nɔ̈k ë tɔŋic. Rem de tɔŋ de Rip cï leec abïï keek riɔ̈ɔ̈k. Acä lueel, Yɛn Bɛ̈nydït Awärjäŋ.

⁷ Ku piny abï aa piny cïn yic kɔc ë pinynɔm, ku pɛ̈ɛ̈nydïtke abïï ke nyääŋ piny ke ke cï riääk taitai.

⁸ Të le yɛn Rip ɣök mac ku näk kɔc ee yen gël kedhie, yen abï kek e ŋic nɔn ee Yɛn Bɛ̈nydït.

⁹ “Të le ee köölë bɛ̈n ku cï Rip riɔ̈ɔ̈k, ke Yɛn bï tuuckï tooc në abëël wïïr bïk kɔc ke Ethiopia cie diɛɛr lɔ jat nhial, ku abïk riɔ̈ɔ̈c arëët. Yen ee köölë abɔ̈!

¹⁰ Acïï Bɛ̈nydït Awärjäŋ lueel an, “Yɛn bï Nebukadnedhar melik de Babilonia luööi, ago kuɛth de Rip thöl.

¹¹ Yen kekë remdɛn cïn piɔ̈u ë juööriic, abïk bɛ̈n bïk piny bɛ̈n riɔ̈ɔ̈k. Abïk Rip mak në abätɛ̈ɛ̈u, ku piny abï thiäŋ ke gup ke kɔc cï thou.

¹² Yɛn bï Kiir tɔ dëu abïï yic riɛl, ku tääu Rip në kɔc rac cin. Alɛi abïk baai riɔ̈ɔ̈k ëbɛ̈n. Acä lueel Yɛn Bɛ̈nydït.”

¹³ Aye Bɛ̈nydït Awärjäŋ lueel an, “Yɛn bï yiëth riɔ̈ɔ̈k ku nyaai yiëth alueth në Mempeth. Abï ciën wën melik bï Rip mac, ku yɛn bï kɔc riääc ëbɛ̈n ë Rip.

¹⁴ Yɛn bï piny de Rip të lɔ wöuwic tɔ cïn yic kɔc, ku ɣök mac pänydïït de Dhowan tɔ̈u të lɔ rut. Yɛn bï pänydïït de Thebeth luöi këtuc.

¹⁵ Yɛn bï pänydïït de Peluthuim, të cï gël ë Rip tɔ yök agönhdï. Yɛn bï kuɛth de Thebeth riɔ̈ɔ̈k.

¹⁶ Yɛn bï Rip ɣök mac, ku Peluthuim abï tɔ̈u në jiɛthëpiɔ̈uwic. Pɛ̈ɛ̈ny ke Thebeth abïï ke dhuɔŋ piny, ku pänydït abï mol.

¹⁷ Wɛ̈ɛ̈t dhuök ke pɛ̈ɛ̈nydït ke Ɣeliopolith ku Bubathith abïk thou në tɔŋic, ku kɔc kɔ̈k abï keek peec ke ke mac.

¹⁸ Mɔ̈ɔ̈th abï lööny ë Tapaneɣeth kɔ̈u, të le Yɛn riɛl de Rip dhoŋ kɔ̈u, ku ja riɛldɛn wään ye kek kenïïm lɛc tɔ thök. Luät abï Rip kuöm piny, ku kɔc ke pɛ̈ɛ̈nydïtke kedhie abï ke peec ke ke mac.

¹⁹ Të le yɛn Rip luöi këtuc në ee kueerë, abïk jɔ ŋic nɔn ee Yɛn Bɛ̈nydït.”

Riɛl de Melik de Rip cï Dhoŋ Kɔ̈u

²⁰ Në kööl de dhorou, në pɛɛi tueŋ, de ruöön ye run ë peec ë wook thiëër ku tök, go jam de Bɛ̈nydït bɛ̈n tëde yɛn an:

²¹ “Mɛnh ë raan, Yɛn cï meliŋ de Rip dhoŋ kök. Acïn raan cï ye duut, ku deer ë lupɔ ago dem ku be riɛl ke bï abätäu bɛ lëu në muk.

²² Ënɔɔnë, kë luɛɛl kï Yɛn Bɛ̈nydït Awärjäŋ: Yɛn ee Raan de ater wo melik de Rip. Yɛn bï kɔ̈kkë lɔ dhoŋ kedhie, köŋ piɛth ku köŋ wään cï kɔn dhuɔɔŋ, ku abätäu löny në yeciin.

²³ Yɛn lɔ kɔc ke Rip thiäi në juööriic ëbɛ̈n.

²⁴ Ku ëtɛ̈ɛ̈n Yɛn bï kök ke melik de Babilonia tɔ ril ku tääu abätäudï në yecin. Ku yɛn bï kök ke melik de Rip dhuööŋ, ka bï teer ku thou në kɔc ke aterde nïïm.

²⁵ Ɣɛɛ, abä tɔ kɔ̈c ku ta melik de Babilonia ril. Të lan yen gäm abätäudï ku nyooth nɔm Rip, abï ë raan ëbɛ̈n ŋic nɔn ee yɛn Bɛ̈nydït.

²⁶ Yɛn bï kɔc ke Rip thiäi në juööriic ëbɛ̈n. Ëtɛ̈ɛ̈n abïk jɔ ŋic nɔn ee Yɛn Bɛ̈nydït.”