Edhekiɛl 3 - JAM DE NHIALIC 2011

¹ Go Bɛ̈nydït lueel an, “Mɛnh ë raan cam ë biöŋë ku lɔ jamë we baai de Yithriɛl.”

² Guɔ ya thok liep, ku gëm ɛn biöök bä cam.

³ Go lueel an, “Mɛnh ë raan cam biöŋ cä gäm yïn, thiäŋ yï yäc në yen.” Guɔ cam, ku yɔ̈k ke mit cït miök de kiëc.

⁴ Go Bɛ̈nydït ya yɔ̈ɔ̈k an, “Mɛnh ë raan lɔ tëde baai de Yithriɛl ku lɛ̈kë keek këriëëc cä lɛ̈k yïn ëbɛ̈n.

⁵ Yïn cä tuc juöör ee jam ë thook mɛɛn cïï keek ee piŋ, ayek baai de Yithriɛl kek atuöc ke yïn.

⁶ Na tuöc yïn juöör juëc ee jam ë thoŋ mɛɛn cïï bï yökkic, ka abïk yï piŋ.

⁷ Ku baai de Yithriɛl abïk jaai bïk këdu piŋ, në biäk cï kek jaai bïk këdï piŋ. Në baŋ ye baai de Yithriɛl ëbɛ̈n kɔc ril nïïm ëtör.

⁸ Ku ënɔɔnë yïn bä tɔ ril nɔm ë tör, cït man ë kek.

⁹ Yïn bä tɔ ril nɔm ë tör aläl, bä jamdï guiir, acïn kë bï yïn tɔ kääc. Yïn bä tɔ ril cït man ë kuur, ku kɔi, du ye riɔ̈ɔ̈c në keek kek kɔc ril nïïm.”

¹⁰ Go Nhialic ŋoot ke jam lueel an, “Mɛnh ë raan wël ya lɛ̈k yïn ëbɛ̈n ye keek döt në yïpiɔ̈u, ku piŋ keek ë yï yïth.

¹¹ Ku ëtɛ̈ɛ̈n jɔ lɔ tëde kɔckuön tɔ̈u piny lei, ku lɛ̈kë keek kë luɛɛl, Yɛn Bɛ̈nydït Awärjäŋ. lɛ̈kë keek ee kënë, na bïk piŋ ku na cïkï bï piŋ.”

¹² Go Wëi ya lɛɛr nhial ku piɛŋ röl dït ke jam në ya kɔ̈u ciëën aye lueel an, “Pianykï dhuëëŋ de Bɛ̈nydït paannhial!

¹³ Aye wuur de wuök ke läi të wën ye kek röt ŋiiny kapäc, ku awuɔɔu de cök ke abëël ee të ye piny lath.

¹⁴ Go wëi yɛn gɔpic ku leerkï yɛn të däŋ. Riɛl de Bɛ̈nydït yen aciɛɛth ɛn, guɔ piɔ̈u diu ku gɔ̈th.

¹⁵ Guɔ bɛ̈n Tel Abib në Kiir de Cebar yɔu, të wään rëër ë kɔc cï lɛɛr piny lei thïn, guɔ rëër ëtɛ̈ɛ̈n në nin kadhorou, ke ya cï nɔm mum në ka cä tiŋ ku ka cä piŋ.

Bɛ̈nydït Atɔ Edhekiɛl ee Raan ee Tïït

¹⁶ Na lɔ nin kadhorou tëëk, go jam de Bɛ̈nydït bɛ̈n tëde yɛn an:

¹⁷ “Mɛnh ë raan yïn ta ee raan ee tïït tëde baai de Yithriɛl. Abä keek lɛ̈k wël cä gäm yïn.

¹⁸ Na luɛɛl en an raan ee karɛc looi abï thou, ku kɛ̈në jɔ̈ɔ̈ny ke bï pïïrdɛn de luɔi de karɛc waar, ke bï wëike kony, abï thou ke ŋoot ke de guöp awɛ̈ɛ̈c, ku yɛn bï gääk de thonde tääu në yïyeth.

¹⁹ Na ye raan ee karɛc looi jɔ̈ɔ̈ny ku acïï luɔi de karɛc päl, abï thou, ke ŋoot ke ye raan de guöp awɛ̈ɛ̈c, ku pïïrdu abï gël.”

²⁰ “Na cï raan piɛth luɔi de piathëpiɔ̈u pɔ̈l ku looi karɛc, ku jɔ yen tääu tërac, abï thou të kën yïn en jɔ̈ɔ̈ny. Abï thou në biäk de karɛcke, yɛn cïï këpiɛth cï looi bï tak, ku yɛn bï gääk de thonde tääu në yïyeth.

²¹ Na ye raan piɛth jɔ̈ɔ̈ny ke cïï kërac bï looi ku piŋ yïthok ku cï be wäc, ke yen abï pïïr, ku yïn bï lɔ pïïr.”

Edhekiɛl acïï Jam bï Lëu

²² Guɔ riɛl de Bɛ̈nydït yök në yaguöp nɔn tɔ̈u en ke yɛn, ku piɛŋ röl yöök ɛn an, “Jɔt rɔt, ku lɔ në riaaŋic biic ku yɛn bï lɔ jam wo yïn ëtɛ̈ɛ̈n.”

²³ Guɔ lɔ biic në riaaŋic, ku dhuëëŋ de Bɛ̈nydït tïŋ ëtɛ̈ɛ̈n, cït man ɣɔn cän ye kɔn tïŋ në Kiir de Cebar yɔu. Guɔ wïïk ke ya gut yanɔm piny,

²⁴ go Wëi bɛ̈n ë yaguöp, ku jɔtkï yɛn abä kɔ̈ɔ̈c në yacök. Go ë Bɛ̈nydït lɛ̈k ɛn an, “Lɔɔr baai ku thiɔ̈ɔ̈kë rɔt ɣöt.

²⁵ Yïn bï duööt piny në wïïn, mɛnh ë raan, ku yïn cïï lɔ bïï yïn lɔ biic në kɔc yiic bï bɛ lëu.

²⁶ Yɛn bï liemdu nuëëŋ, ka yï cïï kɔc wään cï ya rɛɛc bï bɛ jɔ̈ɔ̈ny.

²⁷ Ku të lan bɛ jam wo yïn, ku bɛ yïn gäm riɛl de jam, abä keek lɛ̈k kë cä lueel Yɛn Bɛ̈nydït Awärjäŋ. Kɔc kɔ̈k abïk piŋ në ke yiic, ku abïï ë kɔc kɔ̈k biɔn, në biäk ye kek jur jai.”