Edhekiɛl 29 - JAM DE NHIALIC 2011

Kë cï Caar në Biäk de Rip

¹ Në kööl de thiëër ku rou, në pɛɛi de thiëër, në ruöön ye run ë peec ë wook thiëër, go jam de Bɛ̈nydït bɛ̈n tëde yɛn an.

² “Mɛnh ë raan, rɛɛcë melik de Rip. lɛ̈kë yen luɔi bïï ë piny de Rip ëbɛ̈n ku kɔc ke Rip kedhie luöi këtuc.

³ Luel an kë lëkë Bɛ̈nydït Awärjäŋ melik de Rip kï: yïn ee raan aterdï, yïn ŋuäldït nyaŋ, dhɔt në pïïuwiic. Acï lueel an ye Kiir këdu, ku ee yïn ë loi en.

⁴ Yɛn lɔ alabithɔ tääu në yeŋeep ku ta rec tɔ̈u në kiɛɛrku yiic pɛt röt në yïguöp. Ku yïn bä jɔ miëët bei Kiir, në rec cï röt pat ë yïguöp ëbɛ̈n.

⁵ Yïn bä cuat wei në jɔ̈ɔ̈ric wekë rec cï röt pat ë yïguöp ëbɛ̈n. Guöpdu abïï dhɔt piny ke cïn raan tɔ̈ɔ̈u en. Abä tɔ cuet ë läi roor ku ŋueet diɛt ke ye këcamden.

⁶ Ëtɛ̈ɛ̈n abïï kɔc ke Rip jɔ ŋic kedhie nɔn ee yɛn Bɛ̈nydït.” Aye Bɛ̈nydït lueel an, “Baai de Yithriɛl ayek röt kan në week, wek kɔc ke Rip në biäk de kuɔɔny, ku wek cïï ŋuän në thieny kɔ̈c.

⁷ Të cïï kek röt kan në yïn, ke yï dhoŋ ku nyuänë ke kɔ̈k bei, ku të kɛn kek röt në wekɔ̈ɔ̈th ke we dhoŋ ku jakï ke tɔ lɛthë kɔ̈ɔ̈th.

⁸ Ku ënɔɔnë, yɛn Bɛ̈nydït Awärjäŋ alɛ̈k week nɔn bän week yiɛ̈n rem de tɔŋ bï we mak abätɛ̈ɛ̈u, ku abïk kɔckun nɔ̈k ku läikun.

⁹ Rip abï döŋ ke ye piny cïn yic kɔc. Ëtɛ̈ɛ̈n abäk jɔ ŋic nɔn ee yɛn Bɛ̈nydït. “Në biäk cïï yïn e lueel an ye Kiir këdu ku ee yïn ë loi yïn.

¹⁰ Yɛn ee raan de aterdu ku dɛ ater wokë Kiirdu. Yɛn bï Rip ëbɛ̈n tɔ ee piny cïn yic kɔc, gɔl në pänydït de Midgol në biäk të lɔ rut lee në pänydïït de Athuan në biäk të lɔ wöuwic, lee në aken de kɔc ke Ethiopia.

¹¹ Acïn mɛnh ë raan ayï lɛ̈n bï tëëk ëtɛ̈ɛ̈n. Në run kathiërŋuan yiic acïn kë bï ceŋ ëtɛ̈ɛ̈n.

¹² Yɛn bï Rip tɔ ye piny cï pɔ̈l ë pinynɔm. Në run kathiërŋuan yiic pɛ̈ɛ̈nydït ke Rip abïk dhɔt piny ke ke cï riɔ̈ɔ̈k, ë riääk wär riääk de pɛ̈ɛ̈nydït kɔ̈k.” Yɛn bï kɔc ke Rip tɔ kök. Abïk kat ke ke lɔ në juöör kɔ̈k yiic ku rëërkï ë kɔc kɔ̈k yiic.

¹³ Aye Bɛ̈nydït Awärjäŋ lueel an, “Na cï run kathiërŋuan tëëk, ke yɛn bï kɔc ke Rip bɛ̈ɛ̈i ciëën të wään cän ke thiäi thïn,

¹⁴ ku abä ke bɛ tɔ rɛ̈ɛ̈r në Rip të lɔ wöuwic, pinydɛn thɛɛr. Ëtɛ̈ɛ̈n abïk aa ciɛɛŋ kɔ̈c,

¹⁵ ciɛɛŋ kɔ̈c në ciɛɛŋ yiic kedhie, ku acïkï juöör kɔ̈k bï bɛ cieŋ ananden. Abä keek tɔ cïn naamden aya ka acïkï bï lëu luɔi bïï kek jurdäŋ bɛ tɔ piŋ këde piɔ̈nden.

¹⁶ Baai de Yithriɛl acïï keek bï bɛ ŋɔ̈ɔ̈th në kuɔɔny. Riääk de Rip abï keek aa täk nïïm, ë luɔi yen awäc yen ye kek röt kan në keek. Ëtɛ̈ɛ̈n abïk jɔ ŋic nɔn yan Bɛ̈nydït Nhialic.”

Melik Nebukadnedhar abï Rip Peec

¹⁷ Në kööl tueŋ, në pɛɛi tueŋ de ruöön ye run cï ë wook peec thiërrou ku dhorou, go jam de Bɛ̈nydït bɛ̈n tëde yɛn an:

¹⁸ “Mɛnh ë raan, melik Nebukadnedhar de Babilon amɛk Tayer. Acï remdɛn ë tɔŋ tɔ ɣɛ̈ɛ̈c kathiek, arëk abïk nïïm baar, ku acïk kök nyuääth, ku acïn kë cïï melik bɛ̈n yök kekë remdɛn de tɔŋ në ee nuandïïtë yic ëbɛ̈n.

¹⁹ Ka ënɔɔnë kë luɛɛl kï yɛn Awärjäŋ Bɛ̈nydït, aluɛɛl an yɛn gëm piny de Rip melik Nebukadnedhar. Abïï rum ku yiɛkic ku jɔt kuɛth de Rip ëbɛ̈n ke ye ariöp de remdɛn ë tɔŋ.

²⁰ Agäm de Rip ke ye ariöp de luɔidɛn cï looi, në biäk ë luui ë remdɛn ë tɔŋ yɛn. Acä lueel, Yɛn Bɛ̈nydït Awärjäŋ.

²¹ “Na wään cï ee kënë tuöl, yɛn bï baai de Yithriɛl tɔ ril, ku ta yï jam yïn Edhekiɛl, të bïï ë raan ëbɛ̈n yïn piŋ, ke bïk jɔ ŋic nɔn ee yɛn Bɛ̈nydït.”