Edhekiɛl 28 - JAM DE NHIALIC 2011

Kë cï Caar në Biäk de Melik de Tayer

¹ Go jam de Bɛ̈nydït bɛ̈n tëde yɛn an:

² “Mɛnh ë raan, lɛ̈kë melik de Tayer, kë lɛ̈k en yɛn Bɛ̈nydït Awärjäŋ: yïn cï rɔt gap nhial në lɛc ku ye lueel an ye yath. Aye lueel an cï nyuc në thöny cï tuɔɔk ë wɛ̈ɛ̈r cï yath. Yïn duëër rɔt kac an ye yath, ku ei, yïn ee raan, yïn cie tɔ̈u athɛɛr.

³ Aye tak nɔn pel yïn nɔm awär Danyel, ku acïn këcïmoony duëërë thiaan në yïn.

⁴ Pɛlënɔmdu ku tëëtdu acïk yïn tɔ ee raan kueth në kajuëc ke adhääp, ku ateek.

⁵ Yïn cï luɔi de pɛlënɔm looi ku ŋuɔɔtë ke yï ŋuak kaku nyïïn në ka ye yök. Eeŋö ee yïn rɔt lɛɛc aya në kajuëcku!

⁶ “Ënɔɔnë, kë luɛɛl kï yɛn Bɛ̈nydït Awärjäŋ: në biäk ee yïn en tak an pelënɔm cït man ë yath,

⁷ Yɛn bï alɛi yiɛ̈n week, juöör rac aläl abïk we mak. Abïk kapiɛthkuön cäk yök në pɛlënɔmdun ku tëëtdun riɔ̈ɔ̈k në abätɛ̈ɛ̈u.

⁸ Abïk we nɔ̈k ku cuatkï we ë wɛ̈ɛ̈ric cil.

⁹ Të lee kek bɛ̈n bïk we bɛ̈n nɔ̈k, bäk bɛ ŋoot ke luɛl kï an ee yath? Të la wek kɔc näk we tïŋ, we bï aa kɔc tei ku we cïï bï bɛ aa ka tɔ̈u athɛɛr.

¹⁰ Yïn bï thou cï jö në kɔc alɛi cïn nïïm gäm cin. Ee yɛn Bɛ̈nydït Awärjäŋ, yɛn aa jam.”

Wïïk de Melik de Tayer

¹¹ Na wën, go jam de Bɛ̈nydït bɛ̈n tëde yɛn an:

¹² “Mɛnh ë raan, dhiëëuwë riääk bï melik de Tayer yök. lɛ̈kë kë luɛɛl, yɛn Bɛ̈nydït Awärjäŋ: Yïn aa thiäŋ we pɛlënɔm ɣɔn, kekë läk cï dikëdik!

¹³ Yïn aa rɛ̈ɛ̈r në Eden, dom de Nhialic, ku cieŋ kur piɛth kith yiic: kɔi, ku daimon, ku thardiɔn, ku topadh, ku jathpi, ku kurithilo, ku beril, ku thapiro, ku emerald, ku garnet, ku onik de guët cï tɔc kɔ̈ɔ̈th në adhääp. Aake loi keek në kööl ë ciɛkë yïn.

¹⁴ Yɛn ë tunynhial ee kɔc riääc tääu ëtɛ̈ɛ̈n bï yï gël. Yïn cëŋ në kuurdiën ɣeric de Nhialic nɔm ku jɔ aa cath në kɛm ke kur ke mac.

¹⁵ Luɔɔidu aa piɛth aläl wään ciɛkë yïn, agut cï të wään jɔ yïn karɛc gɔl në luɔi.

¹⁶ Yïn aa lui ke yï ɣöc ku ye käŋ ɣaac, ku kënë acï yïn thɛl në akuöörkuöör yic ku kërac. Guɔ yïn cuɔp wei bä kuurdiën ë Nhialic nyääŋ piny, go tunynhial ee yïn gël yïn cuat wei në kur ke mac lɔ̈m.

¹⁷ Yïn aaye rɔt lɛɛc në dikdu, ku kɛkdu acï yïn tɔ loi rɔt cï raan piɔlpiɔ̈u. Në biäk ee kënë yïn cä cuat piny ku nyääŋ yïn piny ke yï ye kë bï meliik kɔ̈k jɔ̈ɔ̈ny.

¹⁸ Yïn cï kërac looi, në ɣööc ku ɣɛɛc arëk abï ɣäänkuön ke läm riääk, Aguɔ pänydït ɣök mac ëbɛ̈n ku nyuɔp piny. Kɔc woi yïn kedhie ayek yïn tïŋ ke yï cï tɔ ye ŋeth.

¹⁹ Yïn ë jäl, ë jäl athɛɛr, ku juöör wään cï yïn bɛ̈n ŋic ëbɛ̈n acïk riɔ̈ɔ̈c, ariɔ̈ckï në luɔi bï kek riääkdu rɔm.”

Kë cï Caar në Biäk de Thidon

²⁰ Go jam de Bɛ̈nydït bɛ̈n tëde yɛn an:

²¹ “Mɛnh ë raan, rɛɛcë pänydït de Thidon.

²² lɛ̈kë kɔc tɔ̈u ëtɛ̈ɛ̈n, kë luɛɛl në biäkden yɛn Bɛ̈nydït Awärjäŋ: yɛn ee raan de aterdun, Thidon, kɔc abïk yɛn piɔɔny në biäk de kë luöi week. Abïk ŋic nɔn ee yɛn Bɛ̈nydït, të la yɛn luɔi ɣɛɛr yɛn yic nyuɔɔth, ë luɔi bän kɔc nu në yïyic luöi këtuc.

²³ Yɛn bï jɔɔk tuöc week ku ta riɛm kuëër në kuɛɛrkun yiic. Yïn bï mak në ɣään kedhie, ku kɔcku abïï keek nɔ̈k. Ëtɛ̈ɛ̈n abäk jɔ ŋic nɔn ee yɛn Bɛ̈nydït.”

Yithriɛl abïï Thieei

²⁴ Go Bɛ̈nydït lueel an, “Acïn jur tök në juöör thiääk ë baai de Yithriɛl bï ke luööi arac, ku bï bɛ ciët kou ku thil ke lui keek bɔ̈t. Ku abïk jɔ ŋic nɔn ee yɛn Bɛ̈nydït Awärjäŋ.”

²⁵ Acïï Bɛ̈nydït Awärjäŋ lueel an, “Yɛn bï baai de Yithriɛl bɛ̈ɛ̈i ciëën në juöör wään cän keek thiäi thïn, ku abï juöör ëbɛ̈n ŋic nɔn ɣɛɛr yɛn yic. Ku abïk jɔ rëër pinyden, piny ɣɔn cä gäm awundiën Jakop.

²⁶ Abïk rëër ëtɛ̈ɛ̈n ke cïn kë yök keek. Abïk ɣööt yïk ku comkï tiimkɛn ke enap. Yɛn bï kɔc thiääk në keek luöi këtuc, kɔc ee keek luööi arac, ku Yithriɛl abï rëër ë dïu. Ëtɛ̈ɛ̈n abïk jɔ ŋic nɔn ee yɛn Bɛ̈nydït Nhialicden.”