Edhekiɛl 27 - JAM DE NHIALIC 2011

Din Dhiëëuwë Tayer

¹ Go jam de Bɛ̈nydït bɛ̈n tëde yɛn an:

² “Mɛnh ë raan, kɛ̈të din de dhiëëu Tayer,

³ yen pänydïït kääc në wɛ̈ɛ̈r yɔu, ku ye ɣööc looi kekë kɔc cëŋ në wɛ̈ɛ̈r yɔu ëbɛ̈n. lɛ̈kë kë lueel ë Bɛ̈nydït Awärjäŋ: Tayer, yïn leec rɔt në läkduön cï dikëdik.

⁴ Baaidu ee wɛ̈ɛ̈r. Kɔc ee yïk acïk yï looi ke yï ye abël wïïr cï dikëdik.

⁵ Ayek tiim bɛ̈ɛ̈i ë kuur ë Ɣermon nɔm tɔ ye pɛɛm, ku loikï thidar de Lebanɔn ke ye wuɔɔr.

⁶ Ku nömkï tiim ke ɣok ke Bacan looi kek lɛ̈th, ku loikï thöckun në tiim ke pain ke Thaiperuth, Ku jɔkï jämic në tuŋ ke aköön.

⁷ Lupɔɔkun aake loi ë linɔn aake cuëëc keek në Rip, aye ke dap ŋic të mec. Ɣöönkuön ke lɔ̈ŋ aake loi keek në lupɔɔ läk aläl, lupɔɔ amujuŋ ë bïïyë keek në tuur de Thaiperuth yic.

⁸ Kɔckuön ke lɛ̈th aake bɔ̈ në Thidon ku Arbad. Kɔckuön atëët yïn Tayer ee kek ee ger.

⁹ Röördït ke Gebal ee abëël wïïr thɔ̈ɔ̈th Ayek kɔc cï ŋiëc wɛ̈ɛ̈t ë bïïyë në Bibiloth. Kɔc ee abëël wïïr geer nu në abëël wïïr yic ëbɛ̈n Ayek käŋ ɣaac tëduön de ɣööc.

¹⁰ “Remduön ë tɔŋ ë bɔ̈ në Perthia, ku Ludia, ku Libiya ayek lui ë remduön ë tɔŋ yic. Ayek köötken ku akuupkɛn ke tɔŋ nöök në kɛ̈lkun kɔ̈ɔ̈th. Ee kek ee röör ë tɔ yïn yök dhuëëŋ.

¹¹ Rem de tɔŋ ëbɔ̈ në Arbad ayek pɛ̈ɛ̈nyku gël kɔ̈ɔ̈th, ku röör ëbɔ̈ në Gamad ayek ɣöötkuön bär gël. Ayek köötken kan në pɛ̈ɛ̈nykun kɔ̈ɔ̈th, acïk läkdu tɔ dikëdik.

¹² “Yïn cï käŋ ɣaac në Tarcic ku nöm ateek, ku wëëth, ku ayöm, ku kuɛ̈l ke ye kë ɣɔɔcë kakuön juëc.

¹³ Yïn cï käŋ ɣaac në Girikii, ku Tubal, ku Mecek ku ɣaacë kaku në lïïm ku kak ë loi keek në maläŋ.

¹⁴ Yïn cï kaku ɣaac në jöŋgöör ke jɔ̈ɔ̈ric, ku jöŋgöör ke tɔŋ, ku mul ë bïïyë në Beth Togama.

¹⁵ Kɔc ke Rodeth ayek ɣööc tëde week, kɔc tɔ̈u në wɛ̈ɛ̈r yɔu ëbɛ̈n ayek we gäm tuŋ ke akön ku agɔk wɛɛrë ke kakun.

¹⁶ Kɔc ke Thiriya ayek kakuön yak ɣaac ku ka yak keek looi ɣɔɔc. Ayek emerald, ku lupɔɔ amujuŋ, ku lupɔ cï cuëëc, ku linɔn läk, ku guët, ku ajibɔɔ, ku aluluut ɣɔɔc tëde week wɛɛr kek kakun.

¹⁷ Juda kekë Yithriɛl ayek kakun ɣɔɔc në agamɔ, ku miök de olip, ku miök de kiëc, ku wal ŋïr.

¹⁸ Kɔc ke Damathko ayek kakuön yak ɣaac ku kakuön yak looi ɣɔɔc në mɔ̈n yek bɛ̈ɛ̈i në Yudhal, ku nhïm ye bɛ̈ɛ̈i në Thaɣar.

¹⁹ Ayek mɔ̈u ku wëëth ɣaac, ku kathiya, ku wal ŋïr ke kalamuth në kakun.

²⁰ Kɔc ke Dedan lupɔɔ ke keŋkeeŋ ke jöŋgöör ɣaac në kakun.

²¹ Kɔc ke Arabia ku bäny ke piny de Kedar, ayek Kakuön yak ɣaac ɣɔɔc në nyök amɛ̈l kor, ku amɛ̈l, ku bɔɔth.

²² Në biäk de kakuön yak ɣaac, yen aye kɔc ke Ceba ku Raama ee käŋ ɣaac ke ɣɔɔc, ayek keek waar në adhääp, ku kuur läk, ku wal ŋïr.

²³ Pɛ̈ɛ̈nydït ke Ɣaran, ku Kane, ku Eden, ku kɔc ke Ceba ee käŋ ɣaac, ku pɛ̈ɛ̈nydït ke Acuur Kilmad, keek kedhie ayek käŋ ɣöc week.

²⁴ Ayek lupɔɔkuön lɛ̈k ke dhuëëŋ ɣaac, ayï lupɔɔ amujuŋ, ku lupɔɔ cï cuëëc, lupɔɔ cï gup në kïn ɣeer thith, ku lupɔɔ ye thiɛth piny ku aluluut cï ŋiëc gut.

²⁵ Kɔckuön ee käŋ ɣaac aake ye ɣääc në abëël wïïr ke Tarcic ee käŋ ɣääc. Yïn aa cït abël wïïr ë wɛ̈ɛ̈ric abël cï thiäŋ ke kathiek ɣɛ̈ɛ̈c.

²⁶ Wën cï ë kɔckuön ee ger yï bɛ̈ɛ̈i wïïr, go yom de aköl amiäk yï tɔ mɔu ke yïn mec we biic ë wɛ̈ɛ̈ric cil.

²⁷ Kajuëckuön ye ɣaac kedhie, kɔckuön ee ger në abël wïïric kedhie, kɔckuön ee abëël wïïr guaŋ ku kɔc ee käŋ ɣaac, raan de rem de tɔŋ ë tɔ̈u në abëlic ëbɛ̈n Keek kedhie acïk bɛ̈n määr ëbɛ̈n ë wɛ̈ɛ̈ric Wään bï abël wïïrdu mɔu.

²⁸ Awuɔɔu de kɔc kuath abëël wïïr mɔu aye keek piŋ ë wut këc.

²⁹ “Abëël wïïr ëbɛ̈n acï ke nyääŋ piny, ku kɔc ee geer acïk lɔ ë wɛ̈ɛ̈r yɔu.

³⁰ Adhiëëukï yïn kedhie në jiɛthëpiɔ̈u, ayek kenïïm wäl abuui ku dɛɛlkï röt në ŋethic.

³¹ Acïk kenïïm muut në këdu ku tɛ̈ɛ̈ukï lupɔɔ ke cual në kekɔ̈ɔ̈th. Acïk piɔ̈ɔ̈th jiɛth arëët të dhiɛɛu kek.

³² Ayek yïn kɛ̈t diɛt ke dhiëëu: ‘Eeŋa duëërë thööŋ ke Tayer, Tayer acï lɔ lik ënɔɔnë në wɛ̈ɛ̈r thar piny?

³³ Të ye kakuön yak ɣaac lɔ në wuöt biic yiic, Wek ee ka kɔɔr ë juöör ëbɛ̈n gäm keek. Meliik acï ke tɔ kueth në kuɛth de kakun.

³⁴ Ënɔɔnë yïn cï mɔu në wɛ̈ɛ̈ric, ku yïn cï dïïr në pïïu thar piny. Kaku ku lɔ kɔc ee yïn luööi ëbɛ̈n acïk määr ë yïn në pïïu thäär yïn cï dïïr në wɛ̈ɛ̈ric.’

³⁵ “Kɔc rɛ̈ɛ̈r në wɛ̈ɛ̈r yɔu ëbɛ̈n acïk piɔ̈ɔ̈th päu në riääk cï yïn yök. Ayï meliiken acïk riɔ̈ɔ̈c, ka riɔ̈ɔ̈c atiëc në kenyïïn.

³⁶ Yïn ë jäl, ë jäl athɛɛr, ku kɔc ee käŋ ɣaac ë pinynɔm acïk riɔ̈ɔ̈c, acïk riɔ̈ɔ̈c në luɔi bï kek riääkdu rɔm ë yïn.”