Edhekiɛl 26 - JAM DE NHIALIC 2011

Kë cï Caar në Biäk de Tayer

¹ Në kööl tueŋ në pɛɛi yic, në ruöön de thiëër ku tök ë pɛ̈cic, go jam de Bɛ̈nydït bɛ̈n tëde yɛn an:

² “Mɛnh ë raan, kënë ee kë ye kɔc nu në pänydït de Tayer lueel ke ke mit piɔ̈ɔ̈th. Ayek cööt an, ‘Jeruthalem acï riääk! Riɛldɛn de ɣɛɛc ë käŋ ë jäl! Acïï bï bɛ teer ke wook taitai!’

³ “Ënɔɔnë, kë luɛɛl kï yɛn Bɛ̈nydït Awärjäŋ, aluɛɛl an: Ee Yɛn ee raan de ater wo pänydït de Tayer. Yɛn bï juöör juëc bɛ̈ɛ̈i bïk yïn bɛ̈n mak, ku abïk bɛ̈n cï apiöŋ de wɛ̈ɛ̈r.

⁴ Abïk kal ë pänydïït de Tayer riɔ̈ɔ̈k, ku dhoŋkï ɣöötkuön bär piny. Ku yɛn bï abuui nap wei ëbɛ̈n, ku nyääŋ kuur piny yetök ke cïn kë nu ë yekɔ̈u.

⁵ Kɔc ee rec deep abïk boiken aa kɔ̈ɔ̈r në yekɔ̈u, në ee të kɛ̈ɛ̈c yen thïn në wɛ̈ɛ̈ric ëtɛ̈ɛ̈n. Acä lueel, Yɛn Bɛ̈nydït Awärjäŋ. Ku juöör abïk Tayer yak,

⁶ ku abïk kɔc nu në wuöt biic yiic nɔ̈k në abätɛ̈ɛ̈uken. Ëtɛ̈ɛ̈n, abï ë Tayer ŋic nɔn ee Yɛn Bɛ̈nydït.”

⁷ Aye Bɛ̈nydït Awärjäŋ lueel an: “Yɛn bï melik dït nu ë meliik nïïm lɔ bɛ̈ɛ̈i, melik Nebukadnedhar de Babilonia, bïï Tayer bɛ̈n mak. Abï bɛ̈n në biäk të lɔ rut kekë remdïït de tɔŋ, në jöŋgöör ku abëël ke tɔŋ ku jööt ke tɔŋ.

⁸ Kɔc rɛ̈ɛ̈r në wuöt biic yiic abïï keek nɔ̈k në tɔŋic. Kɔc ke ater abïk puɔ̈l wec took kek wut piny, ku loikï päny ril gël kek röt në week.

⁹ Abïk pɛ̈ɛ̈nykun thuöör kɔ̈ɔ̈th në wëth thiek, ku jiëpkï ɣöötkuön bär piny në wiɛth ke wëëth.

¹⁰ Luändïït de tɔɔr ye ë jöŋgöörken tuk abïk we kuöm piny. Awuööu de jöŋgöörkɛn ke abëël ke tɔŋ abïk pɛ̈ɛ̈nykun lath, të jɔ kek lɔ ke ke tëëk në thook ke kal de pänydït cï riääk.

¹¹ Kɔckɛn ke jöŋgöör abïk tëëk në kuɛɛrkuön yiic, ke ke näk kɔckun në abätɛ̈ɛ̈uken. Mënkuön ril abïï keek jäp piny.

¹² Kɔc ke aterdun abïk röt kony në kajuëckun ku ɣɔɔckï keek. Abïk pɛ̈ɛ̈nykun jäp piny, ku thuurkï ɣöötkuön läk piny. Abïk kur, ku tiim ku kɔi kor jɔt ëbɛ̈n, ku wɛ̈lkï keek ë wɛ̈ɛ̈r yic.

¹³ Yɛn bï diɛtkun tɔ päl ëbɛ̈n, ku ta thoomkuön yak keek gut tɔ lɔ lik.

¹⁴ Yɛn bï kur cïn kë nu ë kekɔ̈ɔ̈th nyääŋ piny kapäc, të bïï kɔc ee rec deep boiken aa kɔ̈ɔ̈r thïn. Pänydït acïï bï bɛ nyɔk në yïk. Acä lueel, Yɛn Bɛ̈nydït Awärjäŋ.”

¹⁵ Bɛ̈nydït Awärjäŋ alëk ee kënë pänydït de Tayer: “Wään peecë yïn, kɔc rɛ̈ɛ̈r në wɛ̈ɛ̈r yɔu abïk riɔ̈ɔ̈c në kiɛɛu de kɔc temë röt.

¹⁶ Meliik ke juöör ee cath wïïr ëbɛ̈n abïk bɛ̈n piny në thöcken nïïm. Abïk aluluutken yɔ̈ɔ̈t bei, ku bïïkï lupɔɔ amujuŋ ke bääny bei në kekɔ̈ɔ̈th, ku jɔkï nyuc piny ke ke lɛthë keek. Abïk riɔ̈ɔ̈c arëët në riääk cï yïn yök, ka lɛthden lɛthë ke acïï bï kɔ̈ɔ̈c.

¹⁷ Abïk yïn kɛ̈t din de dhiëëuwë: Pänydït de kɛk acï riɔ̈ɔ̈k! Abëëlkuön wïïr acï ke nap wei ë wɛ̈ɛ̈r yic. Kɔc ke ee pänydïïtë amackï wɛ̈ɛ̈r ku tɔkï kɔc rɛ̈ɛ̈r ë wɛ̈ɛ̈r thok ëbɛ̈n riɔ̈c.

¹⁸ Ënɔɔnë në ë kööl ɣɔn lööny en, Tuöör acï keek lath, Ku jɔ kɔcke piɔ̈ɔ̈th päu në riäŋdïït cït ee kënë.”

¹⁹ Aye Bɛ̈nydït Awärjäŋ lueel an: “Yïn bä tɔ ye të cï puɔ̈l cï pɛ̈ɛ̈nydït cï riɔ̈ɔ̈k të cïn kɔc ceŋ en. Wek bä kuöm piny në pïïu ke Abäpdit thuth.

²⁰ Wek bä ke tuɔɔc piny paan ë thuɔɔu, bäk röt lɔ mat në kɔc cï kɔn pïïr ɣɔn thɛɛr. Wek bä tɔ rɛ̈ɛ̈r në piny thar të de ka cï riääk thɛɛr, ku jakï rëër në kɔc cï thouwiic. Kë tɔ̈u yïn cïï bï bɛ cieŋ, ku jɔ tëdu nööm në piny de kɔc pïïr yiic.

²¹ Yïn bä tɔ ye këde riɔ̈ɔ̈cë, ku yen abï aa thökdu. Kɔc abïk yïn aa kɔɔr, ku yïn cïï bïï yök.” Bɛ̈nydït Awärjäŋ yen aa jam.