Edhekiɛl 25 - JAM DE NHIALIC 2011

Kë cï Caar në Biäk de Ammon

¹ Go jam de Bɛ̈nydït bɛ̈n tëde yɛn an:

² “Mɛnh ë raan, rɛɛcë piny de Ammon.

³ lɛ̈kë keek bïk kë bä lueel yɛn Bɛ̈nydït Awärjäŋ piŋ: wek aake mit piɔ̈ɔ̈th bäk tëdiën ɣeric tïŋ ke cï dhiöök, ku tiëŋkï piny de Yithriɛl ke cï riɔ̈ɔ̈k, ku tiëŋkï kɔc ke Juda ke ke pec leer ë keek piny lei.

⁴ Në biäk cä wek piɔ̈ɔ̈th miɛt, yɛn bï dhiën tɔ̈u në jɔ̈ɔ̈ric të lɔ aköl amiäk tɔ pec week. Abïk pɛɛnyken piäät pinydun ku rëërkï ëtɛ̈ɛ̈n. Abïk mïth ke tiimkun cam ku ruëthkï ciɛkun ka duëër aa kakun.

⁵ Yɛn bï pänydït de Raba puk ke ye të bïï ë thɔ̈rɔ̈ɔ̈l mac thïn, ku piny de Ammon ëbɛ̈n abï döŋ ke ye të ye thök mac thïn, ke bäk ŋic nɔn ee yɛn Bɛ̈nydït.

⁶ “Kë ye Bɛ̈nydït Awärjäŋ lueel kï an: wek ee wecin pam ku kɛɛckï nhial në miɛtëpiɔ̈u. Wek ee piny de Yithriɛl biɔɔn.

⁷ Në biäk de kë cäk looi, wek bä ke tääu në riɛl de juöör kɔ̈k cin, kɔc bï week rum ku yiɛkkï week. Wek bä riɔ̈ɔ̈k taitai, ka wek cïï bï bɛ aa jur, ku ciënkï piny de nɔmdun. Ëtɛ̈ɛ̈n abäk jɔ ŋic nɔn ee yɛn Bɛ̈nydït.”

Kë cï Caar në Biäk de Mowap

⁸ Acïï Bɛ̈nydït Awärjäŋ lueel an, “Në biäk cïï Mowap ye lueel an cït Juda juöör kɔ̈kë ëbɛ̈n,

⁹ Yɛn bï pɛ̈ɛ̈nydït gël aken de Mowap nɔm tɔ mɛkkë keek, mɛt pɛ̈ɛ̈nydït piɛth thïn yï Beth Jecimoth, Baalmion, ku Kiriathiam.

¹⁰ Yɛn bï dhiën tɔ̈u në jɔ̈ɔ̈r të lɔ aköl amiäk tɔ pec Mowap ëtök kekë Ammon, ke Mowap ë cïï bï bɛ aa tak ë juööriic.

¹¹ Yɛn bï Mowap luöi këtuc, ka bïk ŋic nɔn ee yɛn Bɛ̈nydït.”

Kë cï Caar në Biäk de Edom

¹² Acïï Bɛ̈nydït Awärjäŋ lueel an, “Kɔc ke Edom acïk röt guöör ë guur rac në Juda, ku yen ee guurë acï awäny cïï be thök yiɛ̈n Edom.

¹³ Ënɔɔnë acä lueel nɔn bän Edom luöi këtuc, ku näk raan ëbɛ̈n ayï läi ëbɛ̈n ëtɛ̈ɛ̈n. Abä looi ke ye piny cï pɔ̈l, gɔl në pänydït de Teman leer pänydït de Dedan, ku kɔc abïï keek nɔ̈k në tɔŋic.

¹⁴ Kɔckiën ke Yithriɛl abïk yɛn guöör në Edom, ku abïk Edom tɔ yök agönhdï tuc në kegup. Yen abïï Edom ye ŋic nɔn cïï yen aa këdiën guöör Ɛn rɔt.” Bɛ̈nydït Awärjäŋ yen aa jam.

Kë cï Caar në Biäk de Pilithtia

¹⁵ Acïï Bɛ̈nydït Awärjäŋ lueel an, “Kɔc ke Pilithiin acïk röt guöör ë guur rac në kɔc ke aterdɛn thɛɛr, ku riäkkï keek në män mɛɛn kek keek.

¹⁶ Në biäk de ee kënë aluɛɛl an yɛn bï Pilithiin mak ku nyaai keek nyïïn. Yɛn bï raan cï döŋ ëbɛ̈n ke pïïr ë riaaŋ de Kereth yic nɔ̈k ëbɛ̈n.

¹⁷ Abä ke luöi këtuc aläl, ku guöör kakï në keek. Abïk agönhdï yök. Ku ëtɛ̈ɛ̈n abïk jɔ ŋic nɔn ee yɛn Bɛ̈nydït.”