Edhekiɛl 24 - JAM DE NHIALIC 2011

Tööny ë Thät

¹ Në kööl de thiëër, në pɛɛi de thiëër, në ruöön ye run ke pɛ̈c dhoŋuan, go jam de Bɛ̈nydït bɛ̈n tëde yɛn an:

² “Mɛnh ë raan gäärë nïn ee köölë piny, në biäk yen köölë yen bïï melik de Babilonia Jeruthalem gɔl në took.

³ lɛ̈kë kɔckiën ee löŋ rɛɛc ee kääŋdiën gäm keek yɛn Bɛ̈nydït Awärjäŋ: Tääu töny mɛɛc ku thiɔ̈ɔ̈ŋ në pïïu.

⁴ Tääu rïŋ piɛth thïn, jieer ku cök, thiäŋ yic në yom läk aya.

⁵ Nöm rïŋ de amäl piɛth, thiäŋ töny thar ë tiim. Tɔ pïïu piäär, thal yom ku rïŋ.”

⁶ Kë ye Bɛ̈nydït Awärjäŋ lueel kï an, “Amawoou në pänydït de nɛ̈ɛ̈k abï riɔ̈ɔ̈k! Acï ciët tööny ë thät cie waak. Thïm de rïŋ aye nööm ku nyɔk däŋ ë läu, abïï ciën kë döŋ.

⁷ Ade raan nɛ̈k në pänydït yic, ku riɛm akën kuëër piny të duëër abuui ye thiaan, aa kuëër në kuur kɔ̈u nhial.

⁸ Yɛn cï riɛm nyääŋ piny ëtɛ̈ɛ̈n, të cïï ë yen bï thiaan, të kɔɔr en guur atuc.”

⁹ Kë lueel ë Bɛ̈nydït Awärjäŋ kï an, “Amawoou, në pänydït de nɛ̈ɛ̈k abï riääk! Yɛn guöpdï yɛn bï tiim ke mac kut nïïm.

¹⁰ Bɛ̈ɛ̈iyë tiim juëc kɔ̈k! Kɔ̈l lɔ̈k de mac! Thal rïŋ! Piäärë cuaai kɔ̈ɔ̈th! Nyuɔpë yom piny!

¹¹ Ënɔɔnë tääuwë tööny de maläŋ cïn yic këdäŋ në cool nïïm, ke bï tuöc abïï thiɛth. Ëtɛ̈ɛ̈n töny, abï yic bɛ ɣɛɛr të cï acuɔl wään tɔ̈u thïn nyaai

¹² cakaa nɔn cï acuɔl bï jäl ëbɛ̈n në lɔ̈k de mac.

¹³ Jeruthalem karɛckuön ye looi acïk yïn dhiöök. Na cak them bä yïn tɔ lɔgɔk, yïn ee ŋoot ke yï de acuɔl. Yïn cïï bï bɛ lɔgɔk, aɣet të bïï yïn tuöc de agönhdï yök thok.

¹⁴ Acä lueel, Yɛn Bɛ̈nydït Awärjäŋ. Akööl acïk bɛ̈n kööl bän lui. Yɛn cïï awänydu bï tɔ piɔl yic, ku cä piɔ̈u kok wo yïn, ku cä yïn päl. Yïn bï dhil luöi këtuc në biäk de kë cï looi.” Bɛ̈nydït Awärjäŋ yen aa jam.

Thon de Tiiŋ de Tiët

¹⁵ Ago jam de Bɛ̈nydït bɛ̈n tëde yɛn an:

¹⁶ “Mɛnh ë raan, në yum tök, yɛn bï raan nhiaar në piɔ̈ndu ëbɛ̈n lɔ jɔt. Yïn cïï bï gööny ku du dhiau ku du pïïu lööny piny.

¹⁷ Du dhiëndu tɔ piŋ. Du cath ke yï ke yï kuöm nɔm ku du cath ke cin war ë yïcök ka wën nyooth dhiëëu. Du yïnyin kum ku du cäm në këcam ye kɔc dhiau cam.”

¹⁸ Ɣɔn miäk rial yɛn aa jam wo kɔc. Na ɣɔn thëën ke tiiŋdï ë thou, na wään amiäk ë kööl däŋë ke luɔi cït man cïï ë ya yɔ̈ɔ̈k.

¹⁹ Go kɔc a thiëëc an, “Eeŋö looi yïn kë cït ee kënë?

²⁰ Guɔ lɛ̈k keek an, “Jam de Bɛ̈nydït ë bɛ̈n tëde yɛn an:

²¹ “Bä we yiɛ̈n ee jamë, wek baai de Yithriɛl: wek ee röt leec në riɛl de tëɣeric. Anhiaarkï bäk aa woi ku yak lɔ kɛ̈ny, ku abïï Bɛ̈nydït riɔ̈ɔ̈k. Ku wɛ̈ɛ̈t dhuök ke bɛ̈ikun kɔc cï döŋ Jeruthalem abïï ke nɔ̈k në tɔŋic.

²² Ku ëtɛ̈ɛ̈n wek bï kë cä looi looi. Wek cïï wenïïm bï kum ku cäkï cäm në këcam ye kɔc dhiau cam.

²³ Wek cïï bï cath ke we kuöm nïïm, ku cäkï cath ke we ceŋ war, we cïï bï dhiau ku cäkï dhuöör. Wek bï thöök wei në biäk de awɛ̈ɛ̈ckun, ku dhiaukï ke we teer wapäc.

²⁴ Ëtɛ̈ɛ̈n yɛn bï aa kïndun, wek bï këriëëc ëbɛ̈n cä looi looi. Aye Bɛ̈nydït lueel na cï ee kënë rɔt looi, abäk jɔ ŋic nɔn ee yɛn Bɛ̈nydït Awärjäŋ.”

²⁵ Go Bɛ̈nydït lueel an, “Ënɔɔnë, mɛnh ë raan, yɛn bï Luaŋdït ril jɔt tëde keek, kë wään ye kek kenïïm ɣääc, ku ye miɛtëpiɔ̈u, kë yek nhiaar bïk aa woi ku yek lɔ kɛ̈ny. Ku yɛn bï wɛ̈ɛ̈tken ku duetken jɔt.

²⁶ Në kööl bän ee kënë looi, raan bï poth në ee riäŋë thok, abï yïn bɛ̈n lɛ̈k kë cï rɔt looi.

²⁷ Në ye köölë wek bï riɛl de jam wään cï jäl määr tëde week yök, ku we bï jam në yen. Në ye kueerë wek bï aa kïït të de kɔc, ku abïk jɔ ŋic nɔn ee yɛn Bɛ̈nydït.”