Edhekiɛl 23 - JAM DE NHIALIC 2011

Duet ke Raan Tök Kaarou de Gup Awɛ̈ɛ̈c

¹ Go jam de Bɛ̈nydït bɛ̈n tëde yɛn an:

² “Mɛnh ë raan, ɣɔn aa de duet ke raan tök kaarou.

³ Wään ŋoot kek ke ke kor, aake rɛ̈ɛ̈r ë Rip, acïk dhuɛɛcden riɔ̈ɔ̈k, ku tɔkï röt aa akɔɔrröör.

⁴ Nyandïïtë acɔl Oɣola, ku yen atɔ̈u ë nyin de Thamaria yic, ku nyan thiinë acɔl Oɣoliba, ku yen atɔ̈u ë nyin de Jeruthalem yic.” Guɔ ke thiaak kedhie kaarou gokï yɛn dhiëth mïth.

⁵ Cakaa nɔn yen këdï, Oɣola aŋoot ke ye akɔɔrröör, ku acï guöp thiäŋ ke ŋɔ̈ɔ̈ŋ de nhiëër ë määthke kɔc ke Athiriya.

⁶ Aake ye rem de tɔŋ ee ceŋ ë lupɔɔ ee gup kän yiɛ̈n, röördït ku adhuëëŋ ke bäny tueŋ ke rem de tɔŋ, keek kedhie aake ye dhuök bäny ke tɔŋ piɛth ee cath ë jöŋgöör kɔ̈ɔ̈th.

⁷ Yen aaye akɔɔr röör de bäny ke rem de tɔŋ de Athiriya kedhie, ku ŋɔ̈ɔ̈ŋdɛnë acïï yen tɔ riäk rɔt në läm ee yen yiëth ke Athiriya lam.

⁸ Ku jɔ ŋoot ke loi këdɛn ë cï gɔl ë luɔi ke ye akɔɔr röör ë Rip, të wäŋ cï yen dhuɛɛcde riɔ̈ɔ̈k. Gɔl ɣɔn ŋoot en ke ye duet röör aake ye tɔ̈c ë yen ayek looi ke cït akɔɔr röör.

⁹ Guɔ lɔ gäm röör määthkɛn ke Athiriya röörkɛn nhiɛɛr arëët.

¹⁰ Gokï yɔ̈ɔ̈t kɔ̈u bei ë lupɔɔ, ku dɔmkï wɛ̈ɛ̈tke ku duetke, na wën ke jɔkï nɔ̈k në abätäu. Go diäär tuum caath ë ɣään yiic ëbɛ̈n në kë cï yen yök.

¹¹ “Cakaa wään cï nyankënë Oɣoliba ee kënë tïŋ, ke jɔ kɔ̈ɔ̈rdɛn de röör ŋuak nyin ku tɔ dït abïï nyankënë Oɣola bɛ wuöör.

¹² Yen aya aacï thiäŋ në ŋɔ̈ɔ̈ŋ ke kɔɔr bäny ku adhuëëŋ ku bäny ke rem de tɔŋ de Athiriya, ku jööt ceŋ ka ke tɔŋ, ku akɔɔr kɔc cath ë jöŋgöör kɔ̈ɔ̈th, ku lɔ dhuök piɛth ëbɛ̈n.

¹³ Guɔ jɔ tïŋ ke ye akɔɔr röör nɔm, ku nɔn rɛɛc ë nyan ciëënë cï nyan dïïtë.

^14-15 “Go jɔ lɔ ke dïïr arëët në kɔ̈ɔ̈rdɛn ë röör yic. Acïï bäny ke Babilon cï giɛɛt në päny kɔ̈u yen diir, bäny cï ke giɛt në kïn thiith ɣer, aceŋkï thiööth ë kekɔ̈ɔ̈th, ku lupɔ bär yek duööt në kenïïm.

¹⁶ Na wën cï ke tïŋ, go ë ŋɔ̈ɔ̈ŋ guɔ thiɔ̈ɔ̈ŋ piɔ̈u, go kɔc tuöc keek në Babilon.

¹⁷ Go kɔc ke Babilon bɛ̈n bïk bɛ̈n tɔ̈c në yen. Ayek këden jɔ wɛ̈ɛ̈r ë nïn, acïk jɔ dhiöök arëk abïï piɔ̈u jɔ rac ke keek.

¹⁸ Aa ye rɔt nyuɔɔth në kɔc nïïm abïï jɔ ŋic ë raan ëbɛ̈n nɔn ee yen akɔɔr röör. Yɛn aacï piɔ̈u riääk wo yen cït man wään cän piɔ̈u kɔn riääk wo nyankënë.

¹⁹ Ago jɔ lɔ ke ŋuak kɔ̈ɔ̈rdɛn ë röör nyin aläl, wään ee yen akɔɔrröör ë Rip, ke ŋoot ke ye dhuec.

²⁰ Acï piɔ̈u thiäŋ ke ŋɔ̈ɔ̈ŋ de röör dhööm, kɔc thiäŋ piɔ̈ɔ̈th ë ŋɔ̈ɔ̈ŋ cït ŋɔ̈ɔ̈ŋ de mul kekë joŋgöör.”

²¹ (Oɣoliba yïn kɔɔr bä karɛckuön wään ye looi ɣɔn yïn duet ë Rip, nyɔk ë luɔɔi. Të wään ye röör thuëëc në yïthin, ago dhuɛɛcdu riääk në kɔ̈ɔ̈r ë röör.)

Guiëër ë Löŋ de Nyan Koor

²² “Ënɔɔnë, Oɣoliba, kë cä lueel kï yɛn Bɛ̈nydït Awärjäŋ kë lɛ̈k yïn. Yïn cï bäp në ee röörkuön nhiaarë, ku abä ke tɔ göth në yïn, ku bɛ̈ɛ̈i keek bïk yïn bɛ̈n gɛɛu cil.

²³ Yɛn bï kɔc ke Babilon ku kɔc ke Kaldia bɛ̈ɛ̈i kedhie, röör ke Pekot, ku Cowa, ku Kowa, ku kɔc ke Athiriya kedhie. Yɛn bï dhuök piɛth adhuëëŋ ku bäny ke rem de tɔŋ määt yiic kedhie, ku bäny de naamden kedhie ku bäny tueŋ ke rem de tɔŋ ee cath ë jöŋgöör kɔ̈ɔ̈th.

²⁴ Abïk yïn mak, në biäk të lɔ rut ke cath ke rem dïït de tɔŋ nu në abëël kɔ̈ɔ̈th, ku abëël ɣɛ̈ɛ̈c kacaam. Kɔc gël ë kööt ku akuup ke tɔŋ, abïk we gɛɛu cil. Wek bä tääu në kecin, ku abïk week luöi këtuc në lööŋken kapäc.

²⁵ Në biäk rac ɛn piɔ̈u wo week, abä keek tɔ ceŋ week në agönhden. Abïk week tɛm wuum ku weyïth, ku näkkï wɛ̈ɛ̈tkun ku duetkun. Ɣɛɛ, abïk wɛ̈ɛ̈tkun ku duetkun jɔt ku lek keek nyop ke ke pïïr.

²⁶ Abïk lupɔɔkun rɛt yiic ku jɔtkï adhɛ̈pkun ku atekkun.

²⁷ Yɛn bï ŋɔ̈ɔ̈ŋduönë tɔ kääc, ku karɛc ke balduön wään yak keek looi ë Rip. Ka wek cïï yiëth bï bɛ tak, ku cäkï Rip be tak.”

²⁸ Kë cïï Bɛ̈nydït Awärjäŋ lueel kï an, “Wek bä keek gäm kɔc mankï keek, ku rackï piɔ̈ɔ̈th në keek.

²⁹ Ku në biäk mɛɛn kek week abïk këriëëcduön tɔ̈u ke week jɔt ëbɛ̈n, kakuön ë luɔikï keek, ku yɔtkï wekɔ̈ɔ̈th në lupɔɔ ku nyiëëŋkï we piny ke we abäk ciët diëër akɔɔrröör. Ŋɔ̈ɔ̈ŋdun ku kɔ̈ɔ̈rduön ë röör

³⁰ acï ee kënë yiɛ̈n yïn. Yïn aaye akɔɔrröör de juöör ku jɔ rɔt dhiöök në yiëth.

³¹ Yïn cï cök ke nyankui kuany yiic, ka yïn bä gäm abïny töŋ de këtuuc wään kan gäm nyankui bä dek.”

³² Aye Bɛ̈nydït Awärjäŋ lueel an, “Yïn bï dek në abïny de nyankui, adït yic ku thuth. Kɔc ëbɛ̈n abïk yïn aa bui ku biɔnkï yïguöp, abïny athiäŋ.

³³ Abï yïn tɔ rac ku wit yïn, yen abïny de riɔ̈ɔ̈c ku riääk, abïny de nyankui Thamaria.

³⁴ Abä dek abä wiic abïï yic riɛl, ku biäk de kakɛn cï kuɛɛm abïï yïn yïthin rɛt. Acä lueel, Yɛn Bɛ̈nydït Awärjäŋ.”

³⁵ Ënɔɔnë kë lueel ë Bɛ̈nydït Awärjäŋ kï: “Në biäk cïï yïn nɔm määr në yɛn ku wɛ̈lë yïkɔ̈u yɛn, yïn bï nuan në ŋɔ̈ɔ̈ŋdu kekë kɔ̈ɔ̈rduön ë röör.”

Nhialic Alui Këtuc Duet ke Raan Tök Kaarou

³⁶ Go ë Bɛ̈nydït lɛ̈k ɛn an, “Mɛnh ë raan, cï rɔt coc në luɔi bïï yïn Oɣola ku Oɣoliba luöi këtuc? Gaanyë keek në biäk de karɛckɛn cïk looi.

³⁷ Keek acïk röör kɔɔr ku näkkï kɔc, acïk köör në yiëth ku näkkï mïth cïk keek dhiëth ɛn. Acïk wɛ̈ɛ̈tkï nɔ̈k ke ke ye miɔ̈c näk gëmë ke yiëthken.

³⁸ Ku acie yen ee kënë ëbɛ̈n yen ë loikï yetök. Acïk tëdiën ɣeric dhiöök ku dhoŋkï kööl ë Thabath kɔ̈u, kööl wään cä lɔc.

³⁹ Kööl man yen nɛ̈k kek wɛ̈ɛ̈tkï ke ke ye miɔ̈c näk gëmë yiëthken, acïk bɛ̈n tëdiën ɣeric ku dhiökï!

⁴⁰ “Ayek tuc tooc aköölnyïïn kedhie, bïk kɔc lɔ cɔɔl në ɣään mec arëët, go röör aa bɛ̈n. Ayek duet ke raan tök kaarou ayek waak, ku jɔkï akuumkɛn ee ke gël nyïïn tääu kekë kuat de adhääp.

⁴¹ Ayek jɔ nyuc në thööc läk nïïm, ku ayek pam cï thiëth nɔm kapiɛth tääu ë kenïïm, ayï walkiën ŋïr, ku miök de olip cä gäm keek.

⁴² Awuɔɔu de kɔc juëc aye piŋ, kuut de röör ë le keek bɛ̈ɛ̈i në jɔ̈ɔ̈ric. Acïk joth tääu në diäär kɔ̈k, ku tɛ̈ɛ̈ukï gööl läk në kenïïm.

⁴³ Aguɔ rɔt jɔ yɔ̈ɔ̈k an kë yek nööm ënɔɔnë ke ye akɔɔrröör ee tiiŋ cï riääk në kɔ̈ɔ̈r ë röör.

⁴⁴ Ayek röt dɔ̈k ë duet akɔɔrröör aköölnyïïn kedhie. Ayek lɔ tëde Oɣola ku Oɣoliba, kek ee diëër rackë.

⁴⁵ Kɔc piɛthpiɔ̈ɔ̈th abïk löŋden guiir në biäk de kɔ̈ɔ̈r ë diäär ku nääk de kɔc, ku në biäk ye kek kɔ̈ɔ̈r ku cïk cin thiäŋ në rim.”

⁴⁶ Kë ye Bɛ̈nydït Awärjäŋ lueel kï an: “Bɛ̈ɛ̈iyë kɔc juëc bïk keek bɛ̈n riääc ku rumkï keek.

⁴⁷ Takï keek biöök ë kɔc juëc në kur, ku mɛkkï keek në abätɛ̈ɛ̈u, ku näkkï mïthken, ku nyopkï ɣöötken piny.

⁴⁸ Në piny yic ëbɛ̈n yɛn bï kake luɔi rac tɔ kääc, ke ye jäny jiëënyë tik ëbɛ̈n, ke ke cïï bï kɔ̈ɔ̈r cït man cï kek ye looi.

⁴⁹ Ku wek duet ke raan tök waarou, wek bä luöi këtuc në biäk de karɛc yak looi ku awänyduön de läm de yiëth. Ëtɛ̈ɛ̈n abäk jɔ ŋic nɔn ee yɛn Bɛ̈nydït Awärjäŋ.”