Edhekiɛl 22 - JAM DE NHIALIC 2011

Karɛc ke Jeruthalem

¹ Go jam de Bɛ̈nydït bɛ̈n tëde yɛn an,

² “Mɛnh ë raan, cï rɔt guiir luɔi bï yïn pänydïït cï yic thiäŋ ke kɔc ee kɔc nɔ̈k luöi këtuc? Tɔ ŋic karɛckɛn wään cï ke looi ëbɛ̈n.

³ lɛ̈kë pänydït, kë cä lueel yɛn Bɛ̈nydït Awärjäŋ, aluɛɛl: në biäk cïn yïn kɔckuön juëc nɔ̈k, ku wek cï röt dhiöök në läm de yiëth, kööldu abɔ̈.

⁴ We de gup awɛ̈ɛ̈c ke nääk, ku cäk röt dhiöök në yiëth yak looi, ka kööldun abɔ̈, kööldu acï ɣëët! Yen kë ta yɛn juöör tɔ biɔn week ka ku ta piiny dɔl wegup.

⁵ Juöör thiɔ̈k ku juöör mec ayek week dɔl gup në biäk cä wek löŋ ee kuany yiic.

⁶ Bäny ke Yithriɛl kedhie ayek riɛlden ŋɔ̈ɔ̈th, ku ayek kɔc nɔ̈k.

⁷ Wek kɔc tɔ̈u në pänydïtic we cïï wärkun ku märkun ee riëëu. Wek ee alɛi math ku yak kake diëër abɛɛr ku mïth abɛɛr nööm.

⁸ Wek cï ɣään ɣeriic ee riëëu, ku cäkï kööl de Thabath ee muk.

⁹ Kɔckuön kɔ̈k ayek jam lueth luɛl ë kɔc kɔ̈k gup në biäk bïï ë keek tɔ thou. Kɔc kɔ̈k në keyiic ayek miɔ̈c ye gäm yiëth cam. Kɔc kɔ̈k ayek kepiɔ̈ɔ̈th yuum në ŋɔ̈ɔ̈ŋ cï ke dɔm.

¹⁰ Kɔc kɔ̈k në keyiic ayek tɔ̈c në diëër ke wärken. Ku wïït kɔ̈k diäär në riɛl ke ke thëk.

¹¹ Kɔ̈k ayek niin ë diëër lei, ku nin kɔ̈k në diëër ke wɛ̈ɛ̈tken, ku kɔ̈k në duet ke wärken ku duet ë wacken.

¹² Kɔckuön kɔ̈k aye keek riɔp në luɔi bïï kek näk. Kɔ̈k ayek aŋuëk nööm ë wëu cï kek kɔckɛn ke Yithriɛl kony kɔ̈ɔ̈th, ku jɔkï kuɛth në cäm ciɛm keek. Acïk nïïm määr në yɛn.” Bɛ̈nydït Awärjäŋ yen aa jam.

¹³ “Yɛn bï yacin päm kɔckuön ee kɔc rum ku kɔc ee kɔc nɔ̈k.

¹⁴ Yak tak de riɛl ë piɔ̈u bï döŋ ku nɔn ee riɛl duɛ̈ɛ̈r wek we cin jat nhial të cän thök wo week? Ee yɛn Bɛ̈nydït yɛn aa jam, ku yɛn ee kë cä lueel muk.

¹⁵ Yɛn bï kɔckun thiäi në wuötiic ku juööriic ëbɛ̈n, ku yɛn bï cuɔlëpiɔ̈u nyaai ë weyiic.

¹⁶ Ku juöör kɔ̈k acïkï we bïï riëëu gup, ku abäk ŋic nɔn ee yɛn Bɛ̈nydït.”

Many Tuc de Nhialic

¹⁷ Go jam de Bɛ̈nydït bɛ̈n tëde yɛn an:

¹⁸ “Mɛnh ë raan, baai de Yithriɛl acïnkï naamden tëde yɛn. Keek acït ciët wëth cï riääk, ku ayöm, ku wëëth, ku maläŋ cï riääk, ee döŋ piny të cïï ateek lëëŋ ë mac.

¹⁹ Ka ënɔɔnë aya lɛ̈k keek, Yɛn Bɛ̈nydït Awärjäŋ, aŋootkï ke ke cïn naamden aya. Abä keek bɛ̈ɛ̈i tëtök kedhie Jeruthalem

²⁰ në kueer wën cïï ë mac wëëth, ku ayöm, ku ateek, ku maläŋ lëëŋ ë mac. Agönhdï abï keek lëëŋ cït man ye mac wëëth lëëŋ.

²¹ Ee yic, abä ke määt yiic ë Jeruthalem, ku kuɔɔth mac ë kecök, ku ta ke lɛ̈ɛ̈ŋ në agönhdï.

²² Abïk lɛ̈ɛ̈ŋ në Jeruthalem cït man ye ateek lëëŋ në mac, ku ëtɛ̈ɛ̈n abïk jɔ ŋic nɔn yök kek agönh de Bɛ̈nydït.”

Awɛ̈ɛ̈c ke Bäny ke Yithriɛl

²³ Go jam de Bɛ̈nydït bɛ̈n tëde yɛn an:

²⁴ “Mɛnh ë raan, lɛ̈kë kɔc ke Yithriɛl an piny acïï yic ɣer, ku aluöi këtuc në agönhdï.

²⁵ Bäny acïk ciët kɔ̈ɔ̈r kïïu ë läi cïk nɔ̈k kɔ̈ɔ̈th. Ayek kɔc nɔ̈k, ku nömkï wëu kedhie, ku kakɛn cïk yök, ku në nääkdɛn ye kek kɔc nɔ̈k acïk diëër abɛɛr juëc nyääŋ piny.

²⁶ Bäny ke kake Nhialic adhoŋkï lööŋke kɔ̈ɔ̈th, ku acïk ciën riëëu de kaɣer yiic. Acïkï käŋ ee bɛ pɔ̈ɔ̈c yiic në kaam de kaɣer yiic ku ka cïï yiic ɣer. Acïkï kɔc ee bɛ wɛ̈ɛ̈t bï kɔc kapiɛth ku karɛc ŋic, ku ayek kööl de Thabath tɔ cïn naamde. Ku në biäk de ee kënë kɔc ke Yithriɛl acïkï Yɛn ee riëëu.

²⁷ Bäny ke luɔi de miric acïtkï aŋuööth tëër lɛ̈n cïk nɔ̈k. Ayek kɔc nɔ̈k në biäk bï kek kuɛth.

²⁸ Tït ayek ee karɛckë moony cït man ye kɔc päny tɔc kɔ̈u në kïn ɣer. Ayek nyuuth lueth tïŋ, ku yek tör caar. Ayek lueel an guiirkï wël ke Awärjäŋ Bɛ̈nydït lueel, ku yɛn Bɛ̈nydït, yɛn kën jam wo keek.

²⁹ Kɔc kueth ayek kɔc math ku rumkï kɔc. Ayek kɔc kuanynyïïn cieŋ arac, ku jɔkï alɛi cam.

³⁰ Yɛn kɔɔr raan duëër kal yïk, raan duëër kɔ̈ɔ̈c të cï riääk në kal kɔ̈u, ku bïï piny gël të cïï agönhdï thiɔ̈k ke luɔi riëëk en en, ku acïn raan cä bɛ̈n yök.

³¹ Ka yɛn bï agönhdï tɔ lööny në ke kɔ̈ɔ̈th, ku abä ke riɔ̈ɔ̈k cï mac në biäk de ka cïk looi.” Bɛ̈nydït Awärjäŋ yen aa jam.