Edhekiɛl 21 - JAM DE NHIALIC 2011

Abätäu de Bɛ̈nydït

¹ Go jam de Bɛ̈nydït bɛ̈n tëde yɛn an:

² “Mɛnh ë raan, rɛɛckï Jeruthalem! Rɛɛckï ɣäänkɛn ke läm. Jänykï piny de Yithriɛl

³ an yɛn Bɛ̈nydït aluɛɛl an: yɛn ee raan aterdun. Yɛn bï abätäudï bɛ̈ɛ̈i bei ku näk week wedhie, raan rac ke raan piɛth athöŋ.

⁴ Yɛn bï piɔ̈t në abätäudï, wekë raan ëbɛ̈n gɔl në wöuwic lee të lɔ rut.

⁵ Abïï raan ëbɛ̈n ŋic an yɛn, Bɛ̈nydït, yɛn cï abätäudï bɛ̈ɛ̈i bei, ku acä bï bɛ tääu piny.

⁶ “Mɛnh ë raan, teer abä ciët kë löny piɔ̈u në jiɛthëpiɔ̈u. Teer në jiɛthëpiɔ̈u të bïï ë raan ëbɛ̈n yïn woi.

⁷ Të thiëëc kek yïn an eeŋö teer yïn, ke lɛ̈kë keek nɔn yen biäk de thook ee bɛ̈n. Të lee yen bɛ̈n, piɔ̈ɔ̈thken abïk thiäŋ në riɔ̈ɔ̈c, cinken abïk röt nöök, ku jöötden abï riääk, ku abïï ke lath miɔl. Akööl acïk bɛ̈n, anu eenë.” Bɛ̈nydït Awärjäŋ yen aa jam.

⁸ Go jam de Bɛ̈nydït bɛ̈n tëde yɛn an:

⁹ “Mɛnh ë raan, cɔ̈ɔ̈r. lɛ̈kë kɔc kë luɛɛl yɛn Bɛ̈nydït. Abätäu, abätäu acï theer thok ku acï gɔɔk.

¹⁰ Acï theer thok ke bï näk, acï gɔɔk ke bï aa lɔ biliny cï wilëdeŋ. Aduëër ciën miɛtëpiɔ̈u ëtɛ̈ɛ̈n, në biäk cïï kɔckï jäny ku këtuuc bï luöi keek rɛɛc.

¹¹ Abätäu agɔk, ke bï jɔ piath ke luɔi. Acï theer thok ku gɔk, ke jɔ tääu në kɔc ee näk cin.

¹² Dhiau mɛnh ë raan, yen abätäuwë aa luiyë kɔc ku në biäk de bäny ke Yithriɛl. Abï keek lɔ nɔ̈k, në kɔckiën kɔ̈kë kedhie. Biäkï weɣɔ̈ɔ̈m në jiɛthëpiɔ̈u!

¹³ Yɛn them kɔckï, ku na lek jaai bïk kepiɔ̈ɔ̈th puk, kek ee kakë kedhie abïk röt luöi keek.

¹⁴ “Ënɔɔnë, mɛnh ë raan, cɔ̈ɔ̈r. Pam yïcin, ku abätäu abï näk ku be näk. Ee yen abätäu ee näk, abätäu ee kɔc riääc ku tem kɔc röt.

¹⁵ Ee kɔckï tɔ bäp piɔ̈ɔ̈th, ku tɔ ke kɔ̈th. Yɛn riëëc pänyden në abätäu ee lɔ biliny cï wilëdeŋ ku acï rɔt coc bïï näk.

¹⁶ Ee tɛɛm ciɛɛm ku cuëëc, yïn abätäu moth! Tem cïï yïn yïnɔm wɛl thïn ëbɛ̈n.

¹⁷ Yɛn aya yɛn cï yaciin pam, ku agönhdï abï jɔ thök. Ee yɛn Bɛ̈nydït yɛn ajam.”

Abätäu de Meliŋ de Babilon

¹⁸ Go jam de Bɛ̈nydït bɛ̈n tëde yɛn an,

¹⁹ “Mɛnh ë raan, giit kuɛɛr kaarou duëër ë melik de Babilon bɛ̈n ke ke abätäude. Keek kaarou abïk röt dhil gɔl ee piny töŋë. Ku tɛ̈ɛ̈uwë kït piny në apɔ̈k kuɛɛr thok.

²⁰ Abï dɛ raan nyoth kueer lɔ pänydït de kɔc ke Amon cɔl Raba, ku kueer däŋ lɔ Jeruthalem pänydït cï gël ë Juda.

²¹ Melik de Babilon aa kääc ëtɛ̈ɛ̈n të cï giit nu në apɔ̈k kuɛɛr thok. Në biäk bïï en kueer bïï yen tɛ̈ɛ̈k thïn ŋic, ee wiɛth ke dhɛ̈ŋ met yiic: ee cɔ̈ɔ̈r ë yanhde nɔm, ku them cuäny de lɛ̈n cï nɔ̈k.

²² Ënɔɔnë! Ciin cuënyde amuk wïnh ë dhaŋ cï giit an ‘Jeruthalem’ aye yɔ̈ɔ̈k bïï kɛ̈l lɔ dhuööŋ thook, ku looi awuɔɔu de tɔŋ, ku took kɛ̈l thook, ku thɔɔc tiɔp nɔm, ku wec puɔ̈l.

²³ Kɔc ke Jeruthalem acïkï ee kënë bï gam, në biäk de lööŋ cïk mac. Ku cäärden atɛ̈k keek nïïm awɛ̈ɛ̈ckɛn ku jɔ̈ɔ̈ny keek ë luɔi bïï ë keek peec.

²⁴ Yen kë ya lueel kï yɛn Bɛ̈nydït Awärjäŋ, aluɛɛl an awɛ̈ɛ̈ckuön acï ke ŋic. Aŋic ë raan ëbɛ̈n luöi cä wek wäc. Wek ee awɛ̈ɛ̈ckun nyuɔɔth në luɔidun yic ëbɛ̈n. Wek kääc ke we cï luöi këtuc, ku wek bä gäm kɔc ke aterdun.

²⁵ “Yïn bɛ̈ny rɛɛc de Yithriɛl cïï yic ɣer, kööldu, köölduön ciëën bïï ë yïn luöi këtuc abɔ̈.

²⁶ Acä lueel, Yɛn Bɛ̈nydït Awärjäŋ. Bɛ̈ɛ̈iyë göl bei ë yïnɔm kekë lupɔ de nɔm. Käŋ acïkï bï tɔ̈u ë tänden. Takï raan kuany nyin nöm thööc! Bɛ̈ɛ̈iyë kɔc mac bääny piny!

²⁷ Riääk, riääk! Ɣɛɛ, yɛn bï pänydït tɔ riääk. Ku kënë acïï rɔt bï looi, agut të bï raan töŋë wään cä lɔc bïï pänydït bɛ̈n luöi këtuc bɛ̈n. Tëde yen abä gäm.

Abätäu ke Kɔc ke Ammon

²⁸ “Mɛnh ë raan, Cäärë. Caalë kë cä lueel yɛn Bɛ̈nydït Awärjäŋ, lɛ̈kë kɔc ke Ammon ee Yithriɛl läät. lɛ̈kë keek an, ‘Abätäu acï coc ke bï riɔ̈ɔ̈k, acï gɔɔk ke bï näk, abï lɔ biliny cï wilëdeŋ.

²⁹ Nyuuth ye keek tïŋ ayek lueth, ku ka ye keek caar ayek tör. Yïn ee raan ee karɛc looi ku ye raan rac, ku kööldu abɔ̈, kööl ciëën bï ë yïn luöi këtuc. Abätäu abï lööny në weyiëth.

³⁰ “ ‘Yaakï abätɛ̈ɛ̈u nhial! Wek bä ke luöi këtuc të wään ciɛkë week thïn, piny wään dhiëëthë week.

³¹ Wek bï agönhdï yök, të la yɛn en pɔ̈l ke lääuwic në yïguöp cït many dɛ̈p. Wek bä gäm kɔc rac, kɔc ŋic riääk de käŋ.

³² Wek bï riɔ̈ɔ̈k në mac. Riɛmdun abïï tɔ kuëër pinydun, ku acïn raan bï we bɛ tak anandun.’ ” Bɛ̈nydït yen aa jam.