Edhekiɛl 2 - JAM DE NHIALIC 2011

Bɛ̈nydït Acɔl Edhekiɛl

¹ Na wën aa tiëŋ ee kënë guɔ yanɔm guöt piny ku piɛŋ röl ke jam, lueel an, “Mɛnh ë raan jɔt rɔt akaar bä jam wo yïn.”

² Të wën ŋoot ë röl ke jam ke wëi ke Nhialic lɔ ë yaguöp, ku jɔtkï yɛn abä kɔ̈ɔ̈c në yacök, ku piɛŋ röl ke ŋoot ke jam an,

³ “Mɛnh ë raan yïn bä tuöc kɔc ke Yithriɛl. Jur cï a rɛɛc ku lek kenïïm pɔ̈k ɛn ku aŋootkï ke ke reec ɛn, cït man ɣɔn tɔ̈u ë kuarken.

⁴ Keek arilkï nïïm, ku acïkï Yɛn ee riëëu, ka yïn tuɔɔc bä keek lɔ lɛ̈k, kë lɛ̈k keek, Yɛn Bɛ̈nydït Awärjäŋ.

⁵ Nɔn bïk jamdu lɔ piŋ ku nɔn cïkï bï piŋ kek ee kɔc ril nïïmkë, abïk ŋic nɔn cï ë tiët kɔn tɔ̈u në ke yiic.

⁶ “Ku yïn an, mɛnh ë raan, yïn cïï bï riɔ̈ɔ̈c në keek, ku nɔn riɔ̈c në kë bïk lueel. Keek abïk yïn läät ku abïk yïn biɔn guöp, yïn bï ciët raan rɛ̈ɛ̈r ë manciëëi yiic. Ku ŋuɔɔtë ke yï cïï riɔ̈c në keek, kek kɔc ril nïïmkë ku nɔn yen kë bïk lueel.

⁷ Abä keek lɛ̈k këriëëc ëbɛ̈n bä lɛ̈k yïn an luel, na bïk piŋ ku nɔn cïkkï bï piŋ. Ŋic nɔn ye kek kɔc ril nïïm.

⁸ “Yïn mɛnh ë raan, piŋ kë lɛ̈k yïn. Du ya reec cït man ë kek. Liep yïthok ku cam kë bä gäm yïn.”

⁹ Guɔ ciin tïŋ ke ɣökë yɛn, ku amuk biöŋ cï gɔ̈ɔ̈ric.

¹⁰ Go ciin biöök petic, guɔ kë cï gɔ̈ɔ̈r tïŋ në biäk kedhie, dhiëëu, ku dhuöör ku amawoou acï ke gɔ̈ɔ̈r ëtɛ̈ɛ̈n.