Edhekiɛl 19 - JAM DE NHIALIC 2011

Din de Dhiëëu

¹ Acïï Bɛ̈nydït lɛ̈k ɛn, bä ë dinë kɛ̈t wɛ̈ɛ̈t meliik ke Yithriɛl kaarou:

² Moor ë ye ŋun ë köör cït ŋö! Aa ye aduurke muk në kɛm ke thön ke kɔ̈ɔ̈r cï wäth.

³ Acï mɛnhde muk ku wëët në yäp, agut të bïï yen aa cam ë kɔc.

⁴ Këde acïï ë juöör piŋ gokï deep në pul yic. Gokï thɛl Rip në alɔbithɔɔ.

⁵ Go aa tïït aɣet aŋäthde tïŋ ke cï jäl. Na wën ke be mɛnhdɛn däŋ muk, go jɔ dït ke ye köör ŋeny arëët.

⁶ Na ɣɔn cï dït, ke jɔ lɔ cath ke kɔ̈ɔ̈r kɔ̈k. Yen ayadäŋ acï wëët në yäp ku cäm de kɔc.

⁷ Ee ɣään cï gël dhuööŋ ku riëëk wuöt. Kɔc cieŋ piny acïk riɔ̈ɔ̈c të cïï yen kïïu.

⁸ Juöör acïk keyiic määt bïk thɔ̈ɔ̈r në yen, kɔc aake bɔ̈ ë ɣään yiic ëbɛ̈n. Acïk boiken ke dɛ̈p thieth ku dɔmkï në wïndɛn ë dɛ̈p.

⁹ Ku tɛ̈ɛ̈ukï ɣön ë mäc ku yïnkï melik de Babilonia. Gokï jɔ aa tïït ë kɔc, ke cïï bï bɛ piŋ röl në kur ke Yithriɛl nïïm.

¹⁰ Moor aa cït tim de enap cï com në nyin nɔm. Në biäk de yen pïïu juëc tim de enap acïï yïth ku mïth cï luɔk kuöm piny.

¹¹ Kërke aake ril ku jɔkï dït ke ke ye thieec ke bääny. Go tim de enap jɔ dït ke bɛ̈ɛ̈r abïï luäät cuööp acïï tïŋ ë raan ëbɛ̈n luɔi bɛ̈ɛ̈r en ku de yïth juëc.

¹² Ku jɔ ë ciin göth nyuän thar bei ayï mei ku cuɛt piny. Go yom de aköl amiäk mïthke tɔ ril wei. Go kërke dhuɔɔŋ, agokï riɛl ku cuɛtë mɛɛc bïk dëp.

¹³ Ënɔɔnë acï com në jɔ̈ɔ̈ric, të ril ku cïn yic pïïu.

¹⁴ Guöp de tim ë mac dɔm, go mac kërke ku mïthke nyop. Kërke acïkï bï bɛ riɛl, ka acïkï duëër bɛ ya thieec ke bääny. Kënë ee din de dhiën ë piɔ̈u, aaye ket ku nyöökë yic në kët.