Edhekiɛl 18 - JAM DE NHIALIC 2011

Kë Bï Raan aa Looi

¹ Go jam de Bɛ̈nydït bɛ bɛ̈n tëde yɛn

² ku lueel an, “Eeŋö ye kääŋë nyooth, kääŋ ye dap lueel ku nyöökë yic piny de Yithriɛl? ‘Wärken ke mïth ku märken ayek enap kec cam, Ku mïth ayek kɛc de enap yök.’

³ Aye Bɛ̈nydït Awärjäŋ lueel an, “Në yic, ke ya ye Nhialic pïïr, wek cïï ee kääŋë bï bɛ nyɔk në luɛl piny de Yithriɛl anandun.

⁴ Pïïr de raan ëbɛ̈n ee këdï, pïïr de wärken ke mïth ku märken ayï pïïr de mïth. Raan ee kërac looi ee yen abï thou.

⁵ “Tɛk däŋ de raan piɛth ë yic, apiɛthpiɔ̈u ku acie ruëëny.

⁶ Acïï yiëth ke baai de Yithriɛl ee lam ku acie cam në miɔ̈c näk ye gam në yïk cï pëën yiic. Acïï tiiŋ de raan däŋ ee riɔ̈ɔ̈k nɔm, ku cie tɔ̈c ke tik të thëk en.

⁷ Acïï kɔc ee math ku cïï kɔc ee rum. Ee raan puɔ̈k nɔm kë cï nööm ë kuɔɔny apiɛth, ee kɔc nɛ̈k cɔk cääm, ku gëm lupɔɔ kɔc cath ë kekɔ̈ɔ̈th.

⁸ Acïï wëu ee gäm kɔc në aŋuëk. Ee jaai në luɔi de kërac, ee jamde teem apiɛth tëde yen teer.

⁹ Raan cït ee kënë ee ka cä lueel riëëu, ku döt lööŋkï apiɛth. Ee raan piɛthpiɔ̈u, ku abï dhil pïïr,” aye Bɛ̈nydït Awärjäŋ lueel.

¹⁰ “Tɛk däŋ de raan cït ee kënë mɛnh ee kɔc rum ku ee näk, ee töŋ de cït ee kakë looi,

¹¹ ka kën ë wun kɔn looi. Ee cam në miɔ̈c näk cï gam ë yïïŋ cï pëën nɔm, ku ee tiiŋ de raan däŋ riɔ̈ɔ̈k nɔm.

¹² Ee kɔc kuanynyïïn math, ku rum ku nööm ka cï ë kɔc gäm yen bï ke tɔ̈ɔ̈u. Ee lɔ në yïk ke kɔc ke yiëth nïïm, ku lɛm yiëth rackë,

¹³ ku gɛm wëu në aŋuëk. Bïï pïïr? Ei, acïï duëër pïïr,. Acï ee karɛckë looi kedhie, ka yen abï dhil thou. Abï gɔ̈k në biäk de thonde.

¹⁴ “Ënɔɔnë na jɔ raan de rouwë nɔm dɛ wënde. Acï awɛ̈ɛ̈c looi ë wun kedhie tïŋ, ku cïï ke kuany cök.

¹⁵ Acïï yiëth ke baai de Yithriɛl ee lam, ku cïï cäm në miɔ̈c näk ye gam në yïk cï pëën nïïm. Acïï tiiŋ de raan däŋ ee riɔ̈ɔ̈k nɔm

¹⁶ ku cïn kɔc ee yɔŋ, ku cïï kɔc ee rum. Ee kë cï nööm tëde raan däŋ puɔ̈k nɔm raan apiɛth. Ee kɔc nɛ̈k cɔk cääm, ku gëm lupɔɔ kɔc cath ë kekɔ̈ɔ̈th.

¹⁷ Ee jaai në luɔi de kërac, ku cïï wëu ee gam në aŋuëk. Ee lööŋkï döt ku rïïu ka cä lɛ̈k en. Acïï bï thou në biäk de awɛ̈ɛ̈c ke wun, abï dhil pïïr ëyic.

¹⁸ Wun aaye kɔc math ku rum kɔc, ku ye cool ë lui kërac raan ëbɛ̈n. Abï jɔ thou në biäk de awɛ̈ɛ̈c cï ke looi yen guöpde.

¹⁹ “Ku yïn bï jɔ thiëc an, ‘Eeŋö cïï meth ee gum në biäk de awɛ̈ɛ̈c ke wun?’ Bɛ̈ɛ̈rde kï meth aaye yic ku këpiɛth looi. Acï ka cä lɛ̈k yen döt, ku kuɛny kecök apiɛth, ka yen ëyic abï pïïr.

²⁰ Ee yen raan ee kërac looi yen abï thou. Meth acïï duëër gum në biäk de awäny de wun, ayï wun meth acïï duëër gum në biäk de awäny ë mɛnhde. Raan piathëpiɔ̈n abïï gäm ariöp de kapiɛth cï looi, ku raan ee karɛc looi abï gum në biäk de karɛc cï looi.

²¹ “Na cï raan ee karɛc looi luɔi de karɛc pɔ̈l ku muk lööŋkï, na looi këpiɛth ku ee yic, acïï bï thou, abï dhil pïïr ë yic.

²² Karɛcke kedhie aye ke päl en, ku abï pïïr në biäk cïï yen piathëpiɔ̈u looi.

²³ Go Bɛ̈nydït Awärjäŋ thiëc an, “Ye tak ya piɔ̈u miɛt të tiëŋ ɛn raan ee karɛc looi ke thou? Ei, aya kɔɔr bä tïŋ ke puk yepiɔ̈u ku bï pïïr.

²⁴ ‘Ku na päl raan ee kapiɛth looi luɔidɛn de piathëpiɔ̈u, ku ciɛk luɔi de karɛc cït karɛc ye kɔc ee karɛc looi ke looi, bïï ceŋ ke pïïr aya? Ei! Acïn töŋ de kapiɛth wään ye looi bïï bɛ tak. Abï dhil thou në biäk de ciɛ̈n adöt ku në baŋ de karɛcke.

²⁵ “Ku ayak lueel an, ‘Kë looi ë Bɛ̈nydït acie yic.’ Piɛŋkï kë luɛɛl wek baai de Yithriɛl. Yak tak kueer ee yɛn käŋ looi acie yic? Ee kueerdun yen cie yic.

²⁶ Të pɛ̈l ë raan ee këpiɛth looi luɔi de piathëpiɔ̈u, ku gɔl luɔi de karɛc, na le thou, aa thou në biäk de kërɛɛc cï looi.

²⁷ Të cïï raan ee karɛc looi luɔi de awɛ̈ɛ̈c pɔ̈l ku looi këpiɛth ku yic, ka acï wëike luök.

²⁸ Acï kë ye looi jɔ ŋic go luɔi de awɛ̈ɛ̈c pɔ̈l, ke yen ë yic acïï bï thou, abï jɔ tɔ̈u ke pïïr.

²⁹ Ku aye lueel yïn baai de Yithriɛl an, ‘Kë looi ë Bɛ̈nydït cie yic. Ayak tak kueerdï acie yic, yak tak aya? Ee kueerdun yen cie yic.

³⁰ “Ënɔɔnë yɛn Bɛ̈nydït Awärjäŋ, wek lɛ̈k baai de Yithriɛl nɔn bän we luöi këtuc, ŋɛk abï aa luöi këtuc rɔ̈ŋ ke kë cï looi. Jakï röt puk në luɔi de karɛc yak looiyë yiic, ku duökï awɛ̈ɛ̈ckun tɔ riäk week.

³¹ Pälkï luɔi de karɛc wään yak looi, ku gämkï röt täŋ piɛth ku piɔ̈ɔ̈th piɛth. Eeŋö kaar wek thuɔɔu baai de Yithriɛl?

³² Aye Bɛ̈nydït Awärjäŋ lueel an, “Acïn raan töŋ kaar bïï thou. Puɔ̈kkï wepiɔ̈ɔ̈th në luɔi de awɛ̈ɛ̈c, ku piëërkï.”