Edhekiɛl 16 - JAM DE NHIALIC 2011

Jeruthalem Cïn Adöt

¹ Go jam de Bɛ̈nydït bɛ bɛ̈n tëde yɛn an:

² “Mɛnh ë raan, nyuöthë Jeruthalem karɛc cï keek looi.

³ lɛ̈kë Jeruthalem kë lëk Bɛ̈nydït Awärjäŋ en. “Yïn aa dhiëth piny de Kanaan. Wuur aye raan de Amor, ku ye moor nyan de Ɣit.

⁴ Të ɣɔn dhiëthë yïn aa cïn raan ë tem yï tɔɔr, ku wɛɛk yïn ku coth yïn në amilɔ ku nɔn deer yïn në lupɔ.

⁵ Acïn raan cï piɔ̈u kok ke yïn bïï ka cït ee kake luöi yïn. Ɣɔn dhiëëthë yïn acïn raan ë nhiaar yïn. Yïn aacï cuat wei ë ruɔɔr yiic.

⁶ “Na wën aa tɛ̈ɛ̈k ke yï tiëŋ ke yï nyɔɔŋ rɔt piny në riɛmdu yic. Riɛm aacï yï kum guöp ëbɛ̈n, ku yïn kɛ̈n bɛ̈n päl thuɔɔu.

⁷ Guɔ yïn tɔ dït cï wɛ̈ɛ̈l cïn guöp kɔ̈m. Go jɔ dït ke yï ril ku lɔɔr ke yï bäär abä jɔ aa tiiŋ koor. Thinku acï ke cak apiɛth, ku nhimku acïk dït apiɛth, ku yïn aa cïn kɔ̈u lupɔ.

⁸ “Na wën aa bɛ tëëk nyɔk, ke ya tïŋ luɔi cï kööl bïï yïn nhiëër looi bɛ̈n. Guɔ guöpduön cïn lupɔ kum në lupɔdiën ya cieŋ, ku lɛ̈k yïn gutguut luɔi bän yïn nhiaar. Ɣɛɛ, yïn cï löŋ de thiëëc mak wo yïn yïn, ago jɔ aa këdï.” Yen kë lueel ë Bɛ̈nydït Awärjäŋ ka.

⁹ “Na wën ke ya nöm pïïu ku waak riɛm wei ë yïguöp. Guɔ miök de olip tac ë yïguöp.

¹⁰ Ku gäm yïn lupɔ cï kɔɔc ë ciin, ku gäm yïn war piɛth ke dël, ku lupɔ piɛth lɔ mot bïï yïn yïnɔm kum, ku lupɔ lɔ bilbil.

¹¹ Ku miaac yï yeth në kuat lɔ bilbil ke maläŋ ku atek.

¹² Ku tääu joth në yïwum ku yïyïth, ku tääu göl läk në yïnɔm bä cieŋ.

¹³ Ku yïn de nɔm joth ke adhääp ku ateek, ku yïn ee lupɔɔ cï cuëëc në alɛɛth ke lupɔ piɛth lɔ mot ku lupɔ lɔ riauriau cieŋ. Ku yïn ee cam në kuïn cï pam cï looi në aɣar lɛ̈k de yic miök de kiëc ku miök de olip. Dikdu aa riau, ago jɔ aa tiiŋ melik.

¹⁴ Yïn cï rin kɔ̈k në juöör ke piny nɔm yiic ëbɛ̈n në biäk de läkdu, ku në biäk cän yïn tɔ dikëdik aya.” Yen kë cïï Bɛ̈nydït Awärjäŋ lueel ka.

¹⁵ “Ku yïn cï dikdu guɔ ŋɔ̈ɔ̈th, ku cï dɛ kɛk ee yïn akɔɔrröör ee niin we raan ëbɛ̈n, raan cï bɛ̈n në yïlɔ̈ɔ̈m.

¹⁶ Yïn ee lupɔɔkuön kɔ̈k looi ke ke ye ka ye tëduön de läm jäm, ku cï man ë akɔɔrröör yïn ee rɔt gäm raan ëbɛ̈n.

¹⁷ Yïn cï atek ku kuɛɛt ke adhɛ̈p wään cä gäm yïn, nööm ku looi yïn ka cït gup röör ku jɔ niin we keek.

¹⁸ Yïn cï lupɔɔ cï cuëëc wään cä gäm yïn nööm ku tääuwë keek në kakuön cï cuëëcë kɔ̈ɔ̈th, ku gämë keek miök de olip, ku wal ŋïr wään cä gäm yïn, ke ye miɔ̈c.

¹⁹ Yïn cä gäm kuïn piɛth, ku miök de olip, ku miök de kiëc, ku acï ke lɔ gam ke ke ye miɔ̈c, ago yiëth piɔ̈ɔ̈th miɛt në yïn.” Kënë lueel Bɛ̈nydït Awärjäŋ kï.

²⁰ “Na wën ke yï jɔt mïth wɛ̈t ku duet cï dhiëth ɛn, ku lɔ ke gam ke ke ye miɔ̈c näk de yiëth. Ë cïï rac arëët luɔi cïï yïn adöt tëde yɛn,

²¹ ke yï cïï mïthkï jɔt ku lɔɔr keek gäm yiëth ke ke ye miɔ̈c?

²² Në akööl wään rëër yïn arac ke yï ye akɔɔrröör, yïn kën yïnɔm kɔn tak në akööl wään ee yïn meth, wään cïn yïn kɔ̈u lupɔ, wään ee yïn dal ë riɛmdu yic.”

Pïïr de Jeruthalem ke ye Akɔɔrröör

²³ Acïï Bɛ̈nydït Awärjäŋ lueel an, “Amawoou, Amawoou në week, wek kɔc cï karɛckë looi ëbɛ̈n, ku

²⁴ wek cï ɣään ke läm de yiëth yïk në kuɛɛr këc ëbɛ̈n, ku jakkï röt aa nööm thïn.

²⁵ Wek ee läkdun daal ë tiɔ̈kic. Wek ee wegup gäm raan cï thiɔ̈k ke we, ku wek wär akɔɔrröör ë ceŋ.

²⁶ We cï dhööm thiääk ë week, kɔc ke Rip, tɔ tɔ̈c në week, ku wek cïï ë baldun tɔ göth në yɛn.

²⁷ “Ënɔɔnë yɛn cï yaciin jɔt, bï yïn luöi këtuc, ku jat biäk de athiɛɛidï. Wek cä gäm Pilithiin, kɔc man week ku arackï piɔ̈ɔ̈th në karɛc yakkï keek looi.

²⁸ “Në biäk kën yïn piɔ̈u thök we kɔc kɔ̈k, go lɔ ke yï kɔt në kɔc ke Athiriya cök. Yïn aye tiiŋdɛn akɔɔrröör, ku yïn kën piɔ̈u kuɛth we keek aya.

²⁹ Yïn aaye tiiŋ akɔɔrröör de Babilonia, yen ade kɔc ee käŋ ɣaac, ku yïn kën piɔ̈u kuɛth we keek aya.”

³⁰ Kën ye Bɛ̈nydït Awärjäŋ lueel kï an, “Yïn cï ee kakë kedhie looi, ke ye tiiŋ akɔɔrröör cïï guöp ee yäär.

³¹ Yïn cï ɣään ke läm de yiëth yïk në kuɛɛr këc ëbɛ̈n, ku jakkï röt aa nööm thïn. Ku yïn cïï wëu ee nööm cït man akɔɔrröör kɔ̈k nhiaar wëu.

³² Yïn cït tiiŋ akɔɔrröör ee alɛi kɔɔr, ku cïï monyde nhiaar.

³³ Tiiŋ akɔɔrröör aye riɔp, ku yïn ee miɔc gäm määthku ëbɛ̈n ku kum kethook, agokï aa bɛ̈n në ɣään yiic kedhie bïk bɛ̈n tɔ̈c në yïn.

³⁴ Yïn ee tiiŋ akɔɔrröör mɛɛn. Acïn raan cï yï yɔ̈ɔ̈k bä aa akɔɔrröör. Yïn kënë riɔp, ee yïn ee keek riɔp! Ɣɛɛ, yïn ee raan mɛɛn.”

Bɛ̈nydït Alui Jeruthalem Këtuc

³⁵ Ku ënɔɔnë da yïn Jeruthalem akɔɔrröör! Piŋ kë lueel Bɛ̈nydït Awärjäŋ.

³⁶ Kë lueel ë Bɛ̈nydït Awärjäŋ kï: “Yïn cï lupɔɔku yɔ̈ɔ̈t bei, në yïkɔ̈u, ku jɔ rɔt gäm määthku, ku gämë rɔt yiëthkuön rackë kedhie cï tiiŋ akɔɔrröör, ku yïn cï mïthku nɔ̈k ke ke ye miɔ̈c de yiëthku.

³⁷ Në biäk de ee kënë yɛn bï määthkuön thɛɛr kedhie määt yiic, ka nhiaar keek ku ka man keek. Abä keek bɛ̈ɛ̈i në yïlɔ̈ɔ̈m, abïk yïn gɛɛu cil, ku yɛn bï lupɔɔ yɔ̈ɔ̈t bei në yïkɔ̈u ku ja ke tɔ woi yïn ke yï cï kɔ̈u lupɔ.

³⁸ Yïn bä luöi këtuc në biäk de kɔ̈ɔ̈r ë diäär ku nääk de kɔc, ku në agönhdï, ku tuöc de piɔ̈ndï yïn bä mäc thuɔɔu.

³⁹ Yïn bä tääu në riɛlden yic, ku abïk ɣäänkuön ya wek bal looi thïn ku läm de yiëth thuöör piny. Abïk lupɔɔku yɔ̈ɔ̈t bei, ku jɔtkï kuɛɛtkuön ke adhɛ̈p jɔt, ku nyiëëŋkï yï piny ke yï cïn kɔ̈u lupɔ.

⁴⁰ “Abïk kuut de kɔc yɔ̈ɔ̈k bïk yïn biɔ̈ɔ̈k, ku abïk yïn tɛm ë thïïm në abätɛ̈ɛ̈uken.

⁴¹ Abïk ɣöötkun nyuɔp piny ku jɔkï kuut ke diäär tɔ tïŋ luɔi luiyë ë yïn këtuc. Yïn bä tɔ päl baldu, ku pɛ̈n yïn luɔi bï yïn määthku aa gäm miɔ̈c.

⁴² Ku ëtɛ̈ɛ̈n agönhdï abï nɔm lɔ, ku yɛn bï lɔ lik ke cïn kë luɛɛl. Yɛn cïï bï bɛ gɔ̈th ku acïn tiɛɛl bï ya dɔm.

⁴³ Yïn cï nɔm määr wään mɔ̈k yɛn yïn, ɣɔn koor yïn, ku yïn cï ya tɔ göth në biäk de kakuön cï looi kedhie. Yeka ta yɛn yïn col keek kedhie. Eeŋö yïn kake bal mat në karɛc kɔ̈k cï looi?” Bɛ̈nydït Awärjäŋ yen aa jam.

Cït man ku cït Nyande

⁴⁴ Go Bɛ̈nydït lueel an, “Kɔc abïk ee kääŋë lueel në biäkdu, yïn Jeruthalem: ‘Cït man, cït nyande.’

⁴⁵ Yïn guöp yïn ee nyan de moor. Aman monyde ku mïthke. Yïn cït nyïïrëkɔckun, kɔc man röörken ayï mïthken. Yïn wekë pɛ̈ɛ̈nydït nyïïrëkɔckun, we cï dɛk mɔɔrdun Ɣit ku Amor.

⁴⁶ “Nyankui dït acɔl ke Thamaria, nu ë biäk lɔ të lɔ rut kekë wuötkɛn kor, ku nyankui koor acɔl Thɔdom kekë wuötkɛn kor, nu ë biäk të lɔ wöuwic.

⁴⁷ E yï kën piɔ̈u kuɛth we luɔi kuɛny yïn keek cök në pïïrdɛn rac yic? Ei, yïn aa nöm kaam thiinakäŋ, ku go karɛc wär ka wään yek looi ëbɛ̈n guɔ looi.

⁴⁸ “Në yic, ke ya ye Nhialic pïïr,” aye Bɛ̈nydït Awärjäŋ lueel an, “Nyankui Thɔdom kekë wuötkɛn kor akënkï karɛc cït ka cäk looi wekë wuötkun kɔn looi.

⁴⁹ Yen ke duetke awänyden kï, aake ye röt lɛɛc në biäk de kek kajuëc camkï ku tɔ̈ukï në mätic ku rëër adïu, ku acïkï ee diɛɛr në kɔc kuanynyïïn ku kɔc cïn nïïm käŋ.

⁵⁰ Keek aake ye röt lɛɛc ku rilkï nïïm, ku aloikï ka maan keek, aguɔ ke riɔ̈ɔ̈k cït man ŋic yïn en apiɛth.

⁵¹ “Thamaria akën awäny biäk wööc cït man cï yïn wäc. Yïn cï karɛc looi awär karɛckɛn wään cï looi. Riääkduön ë käŋ ë nyïïrëkɔckun tɔ woi ke ke cïn gup gääk, të thööŋ ë yïn ë yen.

⁵² Ku ënɔɔnë yïn bï ayärdu dhil guum. Karɛcku arackï awär karɛc ke nyïïrëkɔckun, ka ayek tïc ke ke cïn gup gääk awär yïn. Ënɔɔnë jɔ nyin riɔ̈ɔ̈c ku gum ayärdu, në biäk ee nyankui tɔ tiëc ke piɛthpiɔ̈u.”

Thɔdom ku Thamaria abï ke Kiɛm Piny

⁵³ Go Bɛ̈nydït lɛ̈k kɔc ke Jeruthalem an, “Yɛn bï Thɔdom kekë wuötkɛn tɔ̈u në yelɔ̈ɔ̈m ku Thamaria kekë wuötkɛn tɔ̈u në yelɔ̈ɔ̈m bɛ tɔ kueth. Ɣɛɛ, yïn bä bɛ tɔ kueth aya.

⁵⁴ Yïn bï guöp yäär, ku ayärdu abï nyïïrëkɔckun nyuɔɔth nɔn piɛth kek awär yïn.

⁵⁵ Keek abïk bɛ dɛ kajuëc, ku week në wuötkun we bï bɛ kiɛm piny.

⁵⁶ Ë we kën Thɔdom kɔn aa bui guöp në run ɣɔn aa wek röt lɛɛc

⁵⁷ ku wään kën ë karɛc yak looi kɔn nyuöth kɔc? Ënɔɔnë wek cï ciët yen, we ye bui gup në kɔc ke Edom, ku kɔc ke Pilithiin, ku kɔckuön kɔ̈k thiääk ë week, kɔc man week.

⁵⁸ Yïn bï karɛc cï looi tɔ̈u në yïyeth dhil guum.” Acïï ë Bɛ̈nydït lueel.

Män bï tɔ̈u Aɣet Athɛɛr

⁵⁹ Aye Bɛ̈nydït Awärjäŋ lueel an, “Wek bä luöi kë rɔ̈ŋ ke week, në biäk ya wek gutguutdun dhöl yic, ku dhuɔŋkï mät kɔ̈u.

⁶⁰ Ku yɛn bï män cä looi wo yïn wään koor yïn riëëu, ku yɛn bï mät looi we yïn män bï tɔ̈u aɣet athɛɛr.

⁶¹ Yïn bï kë wään cï looi tak, ku yïn bï guöp yäär në yen, të le ë yï nyankui dït kekë nyankui koor bɛ̈n ciëën. Abä ke tɔ cït nyïïrku tëde yïn, cakaa nɔn liiu ee kënë në mändï yic wo yïn.

⁶² Yɛn bï mändï bɛ looi wo yïn, ku abä ŋic nɔn ee yɛn Bɛ̈nydït.

⁶³ Yɛn bï karɛc cï looi ëbɛ̈n pɔ̈l, ku yïn bï karɛcku aa tak ku yïn yäär aläl ka yïn cïï yïthok bï liep.” Bɛ̈nydït Awärjäŋ yen aa jam.