Edhekiɛl 13 - JAM DE NHIALIC 2011

Kë cï Caar në Biäk de Tït Alueth ke Röör

¹ Go jam de Bɛ̈nydït bɛ̈n tëde yɛn an:

² “Mɛnh ë raan, lɛ̈k ë tït ke Yithriɛl ee cäärden looi kapäc. lɛ̈kë keek bïk jam de Bɛ̈nydït piŋ.”

³ Kë lueel ë Bɛ̈nydït Awärjäŋ kï: “Amawoou në tït piɔlpiɔ̈ɔ̈thkë abïk riääk! Ayek röt thiɔ̈ɔ̈ŋ ë wëiken kapäc, ku jɔkï nyuuthken cak.

⁴ Kɔc ke Yithriɛl tïtkun, acïnkï naamden, ka acïtkï awɛn ceŋ pänydïït cï riääk.

⁵ Acïkï ɣään wën cï riääk në päny kɔ̈u ee tiit, ku cïkï päny cï riääk cak yïk aya, ka baai de Yithriɛl acïï ke bï gël të le ë tɔŋ bɛ̈n në kööl de bɛ̈n ë Bɛ̈nydït.

⁶ Nyuuthken ayek lueth, ku cäärden ee tör. Ayek lueel an guiirkï wëlkï, ku akɛ̈n keek tooc. Ku ŋoot ke yek lueel nɔn bïï wëlken bɛ̈n ke ke ye yith!

⁷ Lɛ̈kë keek an: Nyuuth yak keek tïŋ ayek lueth, ku cäär yak looi ee tör. Ayak lueel an ee wëlkï, ku yɛn kën jam wo week!”

⁸ Ka aye Bɛ̈nydït Awärjäŋ lɛ̈k keek an, “Wëlkun ayek lueth, ku nyuuthkun ayek tör. Yɛn göth wo week.

⁹ Wek bä luöi këtuc ee nïnkë yiic, wek tït ee nyuuth ë lueth, ku yak cɔ̈ɔ̈r në tör. Wek cïï bï tɔ̈u në amat de löŋ ë kɔckï yiic, ku rinkun acïï ke bï mat në kuën de baai de Yithriɛl yic, wek cïï röt bï puɔ̈k piny de Yithriɛl. Ëtɛ̈ɛ̈n abäk jɔ ŋic nɔn ee yɛn Bɛ̈nydït Awärjäŋ.

¹⁰ “Tït acïk kɔckï kuöc wat në kë ye kek e lueel an, piɛth käŋ ëbɛ̈n. Ee yic, käŋ acïkï piɛth ëbɛ̈n! Kɔckï acïk päny de kur cï dhiap yïk, ku jɔ tït bɛ̈n ku rɔthkï kɔ̈u në kïn ɣer.

¹¹ lɛ̈kë tït nɔn bïï pänyden wïïk. Yɛn bï deŋ tueny tuɔɔc. Deŋ kɔi abï lööny në yenɔm, ku put yom ril ë yeguöp.

¹² Päny abï wïïk, ku raan ëbɛ̈n abï week thiëëc an, ee piath ŋö rɔɔth ë yekɔ̈u në kïn ɣer.”

¹³ Ënɔɔnë kë lueel ë Bɛ̈nydït Awärjäŋ kï: “Në agönhdï yɛn bï yom dït tuɔɔc, ku wäl deŋ piny, ku deŋ kɔi ke ke bï päny jäp piny.

¹⁴ Akaar bä pänydɛn cïk rɔɔth kɔ̈u në kïn ɣer jäp piny, ku riäär piny, ku nyääŋ kur ke këërkëër piny kapäc. Abï löny ku nɛ̈k week wedhie. Ëtɛ̈ɛ̈n abïï ë raan ëbɛ̈n jɔ ŋic nɔn ee yɛn Bɛ̈nydït.

¹⁵ “Yen päny kekë kɔc ë rɔth yekɔ̈u në kïn ɣer, abïk tuöc de agönhdï yök. Ëtɛ̈ɛ̈n abä lɛ̈k week an päny acï lɔ ke kɔc ë rɔth yekɔ̈u në kïn ɣer,

¹⁶ kek tït wään ee Jeruthalem yɔ̈ɔ̈k an piɛth käŋ ëbɛ̈n, ku käŋ aa ke cïï piɛth ëbɛ̈n!” Bɛ̈nydït Awärjäŋ yen aa jam.

Kë cï Caar në Biäk de Tït Alueth Diäär

¹⁷ Go Bɛ̈nydït lueel an, “Ënɔɔnë, mɛnh ë raan, tïŋ diäär ee käŋ caar ë lueth në kɔckun yiic. Jäny keek,

¹⁸ ku lɛ̈kë keek kë lëk ë Bɛ̈nydït Awärjäŋ keek: “Amawoou në week diäär! Wek ee kɔc kɔ̈c yiëth, ku luɔikï akuup yaath bï ë kɔc ke ceŋ ë kenïïm, agokï nïïm dɛ riɛl në pïïr de kɔc kɔ̈k yiic. Wek kɔɔr bäk nïïm dɛ riɛl në pïïr ku thon de kɔckï yiic, aguɔkï ke jɔ luööi në biäk de piathdun.

¹⁹ Wek cï yɛn yɔ̈ɔ̈r guöp në kɔckï nïïm, aguɔkï röt yɔ̈k abïny de cï thiɔ̈ɔ̈ŋ në barli, ku kuïïn lik cï pam. Wek ee kɔc cïï röŋ në thuɔɔu nɔ̈k, ku pälkï kɔc cïï röŋ në pïïr ke ke pïïr. Ka wek ee lueth lɛ̈k kɔckï, ku ayek ka cäk lueel gam.”

²⁰ Ënɔɔnë kë lueel Bɛ̈nydït Awärjäŋ kï: “Yɛn man kakuön yak ruök në wecin, gɛ̈l wek röt në pïïr ku thuɔɔu. Abä keek tuɛ̈ny bei në wecin, ku gäm kɔc cäk keek duut nɔm lääu.

²¹ Yɛn bï kakuön cäk ruök në wenïïm tuɛ̈ny bei, ku ta kɔckï kual röt në riɛldu yic raan tök liŋliŋ. Ëtɛ̈ɛ̈n abäk jɔ ŋic nɔn ee yɛn Bɛ̈nydït.

²² “Në luethkun wek cï kɔc piɛth tɔ riääk piɔ̈ɔ̈th, kɔc cä ke kɔɔr bïk piɔ̈ɔ̈th riääk. Yïn ee kɔc ee karɛc looi pɛ̈n puŋëpiɔ̈u agokï wëiken kony.

²³ Ka ënɔɔnë nyuuthkuön ke lueth, ku cäärduön de tör acïk wan. Yɛn kony kɔckï në riɛldun yic, aguɔkï jɔ ŋic nɔn ee yɛn Bɛ̈nydït.”