Edhekiɛl 11 - JAM DE NHIALIC 2011

Jeruthalem acï Luöi Këtuc

¹ Go Wëidït ke Bɛ̈nydït a jɔt leerkï yɛn në Luaŋdït thoŋ wel rɔt aköl amiäk. Në kal thok ëtɛ̈ɛ̈n yɛn cï kɔc kathiërrou ku dhïc tïŋ adekï yiic Jaadhania wën de Adhur ku Pelatia wën ë Benaya, bäny ke kɔc.

² Go Bɛ̈nydït lɛ̈k ɛn an, “Mɛnh ë raan, kɔckë ayek kiɛɛr rac looi, ku ayek kɔc ke pänydït lɛ̈k wël rac.

³ Ayek lueel an, ‘Wok bï ɣööt bɛ nyɔk në yïk. Päny acït töny de thät, ku wok cït rïŋ në ye yic, ku ee wook gël në mac.’

⁴ Ënɔɔnë jɔ ke rɛ̈ɛ̈c, Mɛnh ë raan.”

⁵ Wëi ke Bɛ̈nydït acïk a lɔ̈ny go ë Bɛ̈nydït lɛ̈k ɛn bä kɔc lɔ gäm ee wëlkë: “Baai de Yithriɛl, yɛn ŋic kë luɛlkï, ku kakuön guiɛɛrkï keek.

⁶ Wek cï kɔc juëc näk në ee pänydïïtë yic eenë ka kuɛɛr acïk yiic thiäŋ në gup ke kɔc cï thou.

⁷ “Ka kë lɛ̈k week kï yɛn Bɛ̈nydït Awärjäŋ, alɛ̈k week an: Pänydïïtë ë yic ee tööny de thät, ku rïŋ eeŋö? Ee gup ke kɔc cäk keek nɔ̈k! Wek cï bï tɔ̈u ee tënë wek bä cuat wei në pänydïtic!

⁸ Riäckï në abätɛ̈ɛ̈u? Yɛn bï kɔc ke abätäu bɛ̈ɛ̈i bïk we mak.

⁹ Wek bä bɛ̈ɛ̈i bei ë pänydït yic ku gäm week alɛi. Wek cä ke mäc thuɔɔu,

¹⁰ ka wek bï nɔ̈k në tɔŋic pinydun. Ku ëtɛ̈ɛ̈n abïï raan ëbɛ̈n ŋic nɔn ee yɛn Bɛ̈nydït.

¹¹ Pänydïïtë acïï we bï gël, cït man ee töny rïŋ tɔ̈u thïn gël. Wek bä ke luöi këtuc, në ɣäänkuön täu wek thïn ëbɛ̈n piny de Yithriɛl.

¹² Abäk ŋic nɔn ee yɛn Bɛ̈nydït, ku të wään muɔ̈k wek lööŋ ke juöör thiääk në week, ke wek aake dhuuŋ lööŋkï kɔ̈ɔ̈th, ku rɛɛckï ka cä lɛ̈k week.”

¹³ Të wään la yɛn ke ya cɔ̈ɔ̈r, go Pelatia wën de Benaya löny ku thou. Yɛn cï rɔt bɛ̈n cuat piny, ku dhiaau në röl dït an, “Ei, Bɛ̈nydït Awärjäŋ! Bä raan ëbɛ̈n nɔ̈k në kɔc ke Yithriɛl yiic, kɔc wään cï döŋ apïïr?”

Gutguut de Nhialic në Biäk de Kɔc cï Peec

¹⁴ Go jam de Bɛ̈nydït bɛ̈n tëde yɛn an:

¹⁵ “Mɛnh ë raan, kɔc rɛ̈ɛ̈r në Jeruthalem ajamkï në biäkdu ku në biäk de mïthëkɔckuön cï peec. Ayek lueel an ‘Baai de Yithriɛl cï peec ëbɛ̈n anukï në ɣään mec bï kek Bɛ̈nydït lam. Acï wo gäm piny ke ye këda.’

¹⁶ “Ënɔɔnë lɛ̈k ë kɔckuön ke Yithriɛl kë luɛɛl. Ee yɛn aa tooc keek bïk lɔ rëër në ee juöör meckë yiic ku thiäi keek në piiny kɔ̈k yiic. Ku në kaam thiinakäŋ yɛn aaye tëdɛn ɣeric në ɣäänkɛn cï kek thiɛ̈i thïn ëbɛ̈n.

¹⁷ “Ka yïn lɛ̈kë keek, kë luɛɛl yɛn Bɛ̈nydït Awärjäŋ. Abä keek määt yiic në piiny cän keek thiäi thïn, ku yɛn bï piny de Yithriɛl pɔ̈k nɔm keek.

¹⁸ Të le kek kenïïm lɔ puk, abï këriëëc nhiany ëbɛ̈n pɔ̈l, ayï yiëth rackɛn wään cïk yök.

¹⁹ Abä ke gäm piɔ̈n cï piɛc looi, ku täŋ cï piɛc looi. Yɛn bï piɔ̈ɔ̈thkɛn ril ke kuur nyaai, ku gäm keek piɔ̈n de riëëu.

²⁰ Ëtɛ̈ɛ̈n abïk lööŋkï muk, ku dötkï ka cä gäm keek në piɔ̈n adöt. Abïk aa kɔckï, ku yɛn bï aa Nhialicden.

²¹ Ku yɛn bï kɔc ee kanhiany, ke yiëth rac lam luöi këtuc. Abä ke luöi këtuc në biäk de kë cïk looi.” Bɛ̈nydït Awärjäŋ yen aa jam.

Dhuëëŋ de Nhialic Anyiëëŋ Jeruthalem Piny

²² Go Cerubiim päär gɔl, ago cök jäl në keek. Ku jɔ dhuëëŋ de Nhialic de Yithriɛl tɔ̈u në kenïïm nhial.

²³ Na wën ke dhuëëŋ de Bɛ̈nydït ë nyiëëŋ pänydït piny, ku leer në kuur nɔm, kuur tɔ̈u në biäk të aköl amiäk de pänydït.

²⁴ Në nyuuthic, yɛn cï wëi ke Nhialic acïk a jat nhial, ku pukkï yanɔm ciëën tëde kɔc cï peec në Babilon. Go nyuuth wën cï tïŋ guɔ jäl,

²⁵ guɔ kɔc cï peec lɛ̈k këriëëc cï Bɛ̈nydït nyuöth ɛn ëbɛ̈n.