Edhekiɛl 1 - JAM DE NHIALIC 2011

Nyuuth Tueŋ de Nhialic ( 1:1–7:27 ) Thööc de Bɛ̈nydït

¹ Në kööl de dhïc, në pɛɛi de ŋuan, në ruöön ye run ke pɛ̈c thiëër ku diäk, yɛn Edhekiɛl wën de Budhi, bɛ̈ny de kake Nhialic, yɛn aa rɛ̈ɛ̈r wo kɔc ke Judai cï peec në Kiir de Cebar thok piny de Babilon. Go paan nhial rɔt liep ku tiëŋ nyuuth de Nhialic.

² Në kööl de dhïc në pɛɛi yic (Aa ye ruöön de dhïc de pɛ̈c ë melik Jekonia ɣɔn leerë yen Babilonia.)

³ Na wën ke jam de Bɛ̈nydït ë bɔ̈ tëde Edhekiɛl bɛ̈ny de kakë Nhialic, wën de Budhi, paan de Babilon në kiir de Cebar yɔu, ku ciin de Bɛ̈nydït aa tɔ̈u kekë yen.

⁴ Na wën aa tiëŋ tënhial, ke ya tïŋ amaŋdïït e yom ke bɔ̈ në biäk të lɔ rut. Ke ye wil ë biliny në luändïtic, ku tënhial nu ë yelɔ̈ɔ̈m aa lɔ biɔ̈rbiɔ̈r. Ku të ye mac lɔ bilinyë, ade kë ee riau ke cït Maläŋ.

⁵ Në amaŋic cil, yɛn cï ka pïïr kaŋuan tïŋ, ka de gup cï gup ke kɔc,

⁶ ku tök në keyiic aa de nïïm kaŋuan ku wuök kaŋuan.

⁷ Cökken alek rïc ku adekï miɔt cït kake akɛ̈ɛ̈l. Alek riauriau cït ka cï tɔc në pïïu ke Maläŋ.

⁸ Ku adekï nïïmken kaŋuan ku wuökken kaŋuan, ŋɛk në keyiic ee dɛ cin ke raan kaŋuan, cïïn tök ee nu në wuök tök thar.

⁹ Wuök kaarou ke tök në keyiic ayek keek pɛt nhial ku jɔ wuökken kethook lɔ tuööm nhial, loikï kë cït ɣön de aguuk kaŋuan. Na lë jëlkï, ayek cath ëtök ke ke cïï keyiic tek ku cïkkï röt puk.

¹⁰ Töŋ në läi pïïr ee nɔm dɛ nïïm wuöc kaŋuan: ku nɔm cït raan yen atɔ̈u në biäk tueŋ, ku nɔm cït köör në biäk cuëc, ku nɔm cït thɔn në biäk cam, ku jɔ nɔm cït cuɔɔr tɔ̈u në ye ŋok.

¹¹ Wuök kaarou de lɛ̈n tök aye ke jat nhial ke bï wuök ke lɛ̈n thiääk kek lɔ jak thook nhial, ku wuökkɛn kɔ̈kë kaarou aye kek kegup kum.

¹² Tök në läi yiic kedhie ee biäk kaŋuan woi kedhie, ka kuut aduëërkï cath kedhie ke ke lɔ të kɔɔrkï, ke ke cïï röt puk.

¹³ Ade kë ye tïŋ ke dɛ̈p läi yiic ke cït many de kuthyui, ee rɔt pɔ̈ɔ̈k ke cïï kääc. Mac ee lɔ nhial ku rueet në wil de ɣɛɛr.

¹⁴ Kek läi gupken ayek lɔ ku bïkkï, cï wilëdeŋ.

¹⁵ Të wën woi yɛn läi kaŋuan, ke ya tïŋ cök ke abëël kaŋuan ke ke jak piny, tök anu në biäk tök në keek kedhie.

¹⁶ Kek cök ke abëël kedhie akïtkï, ku alek bilbil cït kur ke kurithilo, ku tök në keek kedhie acï ade cöök däŋ cï riëëu në biäk cuëc,

¹⁷ Ago cök röt aa lëu në puk në ɣään kaŋuan.

¹⁸ Në ke këc kek ee cökkë acï ke kuöm piny në nyïïn.

¹⁹ Të ye läi lɔ thïn, cök ayek cath në keek, ku na cï läi röt jat nhial piny, cök ayek röt jɔt aya.

²⁰ Läi ayek lɔ të kɔɔrkï, ku cök ayek kë cï ë läi looi ë rok, në biäk tɔ̈u kek në riɛl de läi yic.

²¹ Ku të ye läi cath, ku nɔn kɛ̈ɛ̈ckï, ku nɔn jɔt kek röt nhial në yomic, yen aye cök looi ayadäŋ.

²² Në läi nïïm nhial ade kë ye tïŋ cï gëlgël cï looi në acidhanh de kuruthalo lɔ bilbil.

²³ Në gëlgël thar piny akɛ̈ɛ̈c ë läi, ku ye tök në keyiic kedhie ye wuök pɛt biic kaarou ke ke cï wuökken tuööm thook, ku kumkï kegup në wuök kɔ̈kë kaarou.

²⁴ Guɔ awuɔɔu de wuök aa piŋ të pɛ̈ɛ̈r kek, ee ciët awuɔɔu de pïïu ke wɛ̈ɛ̈r, acït awuɔɔu de rem de tɔŋ dït, ku acït röl de Nhialic Awärjäŋ. Të cïï kek kɔ̈ɔ̈c në päär, ayek wuökken kuöm në kegup,

²⁵ ku aŋoot ke de röl bɔ̈ nhial në gëlgël nɔm, në kenïïm, wën kɛ̈ɛ̈c kek, gokï kewuök tääu piny.

²⁶ Në gëlgël nɔm nhial ade kë cït thööc cï looi në kuur cɔl thapiro, ku kë cït raan acï nyuc në yenɔm.

²⁷ Ku kë rɛ̈ɛ̈r në yenɔm alɔ riauriau cï maläŋ tɔ̈u mɛɛc. Ariau ëbɛ̈n në many lɔ dhai,

²⁸ ku ade yic kïït ke mïït kedhie. Kënë aaye many riau nyooth täu de Bɛ̈nydït.