Diɛt ke 8 - JAM DE NHIALIC 2011

¹ Adï jɔ ya mɛnhkäi, raan ë muk maar ë yethin. Na yäk yïn kueer, yïn duɛ̈ɛ̈r ciim thok, ku acïn raan duëër a gɔ̈k.

² Yïn duɛ̈ɛ̈r lɛɛr baai de maar, të bï yïn a lɔ wɛ̈ɛ̈t ë nhiëër. Yïn duɛ̈ɛ̈r gäm mɔ̈n de yic wɛ̈ɛ̈l ŋïr, mɔ̈n de timdiën ë pomegraneet bä dek.

³ Ciin camdu anu në yaŋok, ku ye ciin cuënydu yɛn muk.

⁴ Lɛ̈kkï yɛn gutguut, diëër ke Jeruthalem, na cäkï nhiëërda bï riɔ̈ɔ̈k.

Din de Dhetem Diäär

⁵ Eeŋa ë kë bɔ̈ në jɔ̈ɔ̈ric, ke ke muk kecin kekë monydɛn nhiɛɛr? Guɔ yïn pɔ̈ɔ̈c në tim de tupa thar, të wään dhiëëthë yïn thïn.

Jam de Tik

⁶ Thiök yïnɔm në duet ëbɛ̈n, ku nhiaar ɛn yatök, du raandäŋ ee dɔm ciin, dɔm yɛn yatök. Nhiëër aril ë tör cï thuɔɔu, ku täk aril nɔm cït thuɔɔu guöpde. Ee thiɛ̈i piny cï lɔ̈k de mac, ku döm cï many dɛ̈p.

⁷ Acïï pïïu duëër tɔ liu, acïn amool duëër yen mou. Ku na kɔɔr raan bïï nhiëër ɣɔɔc në wëëth, ee abiaan ëbɛ̈n yen bïk yök.

Jam de Mïthëkɔcken ë Tik

⁸ Wok de nïïm nyankënëdan koor, ku aŋoot ke kën thin bɛ̈n. Eeŋö buk luöi yen të le dhuk en kɛ̈ny?

⁹ Na ë ye päny, aduëërku yiëk ɣön bɛ̈ɛ̈r de ateek. Ku na ë ye kal thok, aduëërku gël në athïïn ke tiim ke thidar.

Jam de Tik

¹⁰ Yɛn ee päny, ku thinkï kek aye ɣööt bɛ̈ɛ̈rke. Ku aŋic ë monydiën nhiaar, an, të rɛ̈ɛ̈r ɛn wokë yen, yɛn ee ayum de piɔ̈u yök kekë mät.

Jam de Moc

¹¹ Tholomon ade nɔm dom de enap të cɔl Baal Ɣamon. Ade kɔc ee pur cï dom riɔp tëde yen, raan tök ee agum de ateek tääu piny.

¹² Tholomon aduëër agumdɛn de wëu nööm, ku nöm kɔc ee pur bot kaarou de wëu ke ye biäkden. ku yɛn de nɔm domdiën de enap.

¹³ Tɔ ya piŋ yï röl domic nyandiën nhiaar, määthkï akɔɔrkï bïk yïn piŋ röl ke yï jam.

Jam de Tik

¹⁴ Bäär të nu yɛn, monydiën nhiaar, cït man ë kɛɛu, cït thɔn ë ŋɛɛr nu ë kuur nɔm të ye wal ŋïr luɔk.