Diɛt ke 7 - JAM DE NHIALIC 2011

Jam de Moc

¹ Ye tiiŋ lɛ̈k cït ŋö! Eeŋö jɔ yïn cök läk aläl aya në war yiic! Täu de yïn cök ayek ciët kak ë looi atëët keek.

² Aduök anu ëtɛ̈ɛ̈n, aduŋ cïï yic ee dak në mɔ̈u, dut de agamɔ anu ëtɛ̈ɛ̈n, dut cï geeu në agurbiök.

³ Yïn cït thin acuek ke ŋeer, ku cïtkï keu kaarou.

⁴ Yïn cït yeth alooc bäär de tuŋ ke akɔ̈ɔ̈n. Ku nyïïnku acïtkï awuul nu në pänydït de Ɣecbonic, thiääk kekë kal de pänydïtë thok. Wumdu adik cï ɣön bɛ̈ɛ̈r de Lebanɔn, ee kɔ̈ɔ̈c ke woi Damathko piny.

⁵ Ku yïn ee yïnɔm muɔ̈k nhial cï kuur ë Karmel. Ku nhïmkuön cï nai alek bilbil cï lupɔ lɔ riauriau, läkde aduëër melik peec.

⁶ Yïn cï kuöc dik, eeŋö jɔ yïn läk aläl aya, piath de nhiëërdu acï thok thök ëgɔk.

⁷ Yïn läk aläl cï tim de aköt, ku thinku acïtkï ruŋ de thöu.

⁸ Yɛn bï kɛɛc në tim de aköt nɔm ku tɛt mïthke. Thinku tëde yɛn acïtkï dut de enap, ku wëi ee yïn wëi acït awäu de tim mit,

⁹ Ku yïn cït thok mɔ̈n mit. Ënɔɔnë, takï mɔ̈u wat ke lɔ tëde monydiën nhiaar, wɛtkï ke ke lɔ në yethok ku yelec.

Jam de Tik

¹⁰ Yɛn ee këde monydiën nhiaar, ku yen akɔɔr ɛn.

¹¹ Bäär raandiën nhiaar, bäär lokku ë wut këc biic, ku buk lɔ niin wei.

¹² Wok bï röt dap jɔt miäk rial ku tïŋku enap, buk ke tïŋ na cïk luɔk gɔl, na moc gaak rɔt, ku nɔn cï tiim ke pomegraneet nyok. Ku yïn bä gäm nhiëërdï ëtɛ̈ɛ̈n.

¹³ Yïn duëër awäu de tim de manderek ŋöör, ku mïthke tiim piɛth ëbɛ̈n athiëëkkï në ɣönda thok. Raandiën nhiaar, yïn cä muɔ̈k miɛtëpiɔ̈u, miɛtëpiɔ̈n thɛɛr kekë miɛtëpiɔ̈u de ënɔɔnë.