Diɛt ke 6 - JAM DE NHIALIC 2011

Jam de Diäär

¹ Tiiŋ läk aläl në diääriic, ee tënou cï monyduön nhiaar lɔ? Nyuöthë wook ee kueerou cïï monyduön nhiaar tëëk? Agoku yïn kuɔny në kɔ̈ɔ̈rde.

Jam de Tik

² Monydiën nhiaar acï lɔ domde, të ye wal ŋïr luɔk thïn. Anyuɛ̈ɛ̈th thökke domic, ku ye agurbiök määtiic.

³ Monydiën nhiaar ee këdï, ku yɛn ee këde, ee thökke nyuääth në agurbiök yiic.

Din De Dhïc Jam de Moc

⁴ Nyandiën nhiaar, yïn läk aläl cï Jeruthalem, yïn dik cït pänydït de Tirdha ku yïn kec piɔ̈u cït rem de tɔŋ muk tɔɔŋ ee wuötkë yiic.

⁵ Wɛlë yïnɔm wei tëde yɛn, nyïïnku acïk ɛn peec. Nhïmku ayek cöŋ, cï luny de bɔɔth bɔ̈ piny ë kuur de Giliyad nɔm,

⁶ Lecku aɣeerkï cï luny de thök amɛ̈l ë piac keek waak. Acïn töŋ liu në keyiic, aciɛthkï ë rok kedhie.

⁷ Yïn ee gëm riau cï tiim ke pomegraneet në lupɔdu yic.

⁸ Tɔ melik de nɔm diëër meliik kathiërdhetem (60), ku diëër määthke kathiërbɛ̈t (80), ku diëër cïï bïï lëu në kuɛ̈n.

⁹ Ku ee tök tei yen nhiaar, töŋdiën cï dikëdik cï guuk. Ee yen ee nyan tök ë man nɔm, nyan piɛth mit ë man piɔ̈u. Aye diäär tïŋ ëbɛ̈n ku piɔnykï, diëër meliik ku diëër määth ayek en piɔɔny ë diɛt.

¹⁰ Eeŋa kënë ee liec cï run ë piny? Aläk aläl cï pɛɛi, ku aɣer cï akɔ̈l, ku akecpiɔ̈u cï rem de tɔŋ muk tɔɔŋ.

¹¹ Yɛn cï lɔ piny bä tiim almon bɛ̈n tïŋ, bä tiim ë piac luɔk ë wakic bɛ̈n tïŋ, na cï enap ŋuɔl, ku na cï tiim ke pomegraneet nyok.

¹² Ku yɛn lɛthë guöp, yïn cï ya tɔ de piɔ̈u nhiëër, cït man ye raan abël ë tɔŋ kuaath tɔŋ kɔɔr.

Jam de Diäär

¹³ Cɔ̈ŋkï, cɔ̈ŋkï, duet ke Culam. Tɔ wo woi yïn të cöŋ yïn. Eeŋö ya wek ye kɔɔr bäk ya woi, të cäŋ ɛn në kɛm ke akuut daai yiic cil?