Diɛt ke 4 - JAM DE NHIALIC 2011

Jam de Moc

¹ Eeŋö jɔ yïn läkëläk aya nyandiën nhiaar! Ku eeŋö jɔ yïn nyin agɔk aya, wekë nhiëër në lupɔdu yic! Nhïmku acöŋkï, acïtkï bɔɔth bɔ̈ piny ë kuur ë Giliyad nɔm.

² Ku lecku aɣeerkï cït amɛ̈l cï tem gup ku cï ke waak. Acïn töŋ liu në keyiic, akïtkï ë rok kedhie.

³ Thoŋdu acït lupɔ thith ë wïr, aläk aläl të jiɛɛm yïn. Yïn ee gëm riau cï tiim ke pomegraneet në lupɔdu yic.

⁴ Ku yenhdu acït alooc bäär de Debid, dhuɔɔkic ku tɛ̈ɛ̈c, kekë guët cït aguum ke kööt cï nöök në yekɔ̈u.

⁵ Thinku acïtkï keu, ku cïtkï acuek ke ŋeer nyuäth në agurbiökiic.

⁶ Yɛn bï rëër ë kuur de mer, kuur de wal ŋïr, agut të le yom amiäk puɔ̈t, ku jël mɔ̈ɔ̈th.

⁷ Eeŋö jɔ yïn läk aya nyandiën nhiaar! Eeŋö jɔ yïn dikëdik aya!

⁸ Bäär nyandiën thiaak, bäär wekë yɛn në kuur ë Lebanɔn nɔm, bäär we yɛn Lebanɔn. Bäär piny ë kuur de Amana nɔm, bä piny ë kuur ë Thenir, ku kuur ë Ɣermon nɔm, të ye kɔ̈ɔ̈r kekë kuëc ceŋ thïn.

⁹ Daai ee yïn daai, nyandiën thiaak ee miɛt ë yapiɔ̈u, ku lɔ guët ye keek cieŋ, acïk yɛn kual nɔm.

¹⁰ Nhiëërdu ee ya miëtpiɔ̈u, nyandiën thiaak mit ë yapiɔ̈u. Nhiëërdu yen apiɛth awär mɔ̈u, ku awäudu atum aläl, awär wal ŋïr ëbɛ̈n

¹¹ Miɛt de miök ë kiëc, yen acït tɔ̈u de yïn thok raandiën nhiaar, kë ye liemdu lueel ee miök de kiëc kekë ca tëde yɛn. Awäu de lupɔɔku kedhie acïtkï awäu de Lebanɔn.

¹² Nyandiën mit ë yapiɔ̈u, nyandiën thiaak ee dom cï moony, dom cï gël, ee awaŋ tɔ̈u të cï thiaan.

¹³ Ëtɛ̈ɛ̈n yen aye ka cï com luɔk thïn. Ayek cil cï duum ke tiim ke pomegraneet, ku ayek luɔk në mïth ke tiim piɛth. Ayï wal cɔl ɣena kekë nard,

¹⁴ wal ke thapron, ku kalamuth ku kinamon, ku nɔn ee tiim ke wal ŋïr ëbɛ̈n, mer ku aloyeth ayek luɔk ëtɛ̈ɛ̈n, ku nyïïn ke wal kedhie, wal ŋïr aläl.

¹⁵ Awɛɛŋ ke pïïu ayek dom piɔɔk, nyïïn ke pïïu wat, awɛɛŋ ke pïïu ayek wɛ̈t bei piny ë kuur ë Lebanɔn yic.

Jam de Tik

¹⁶ Jɔt rɔt pääcë yom de të lɔ rut. Ku yïn yom de wöuwic puɔ̈të të lɔ domdï, thiɔ̈ŋ yomic në awäu. Tɔ monydiën nhiaar bɔ̈ domde, ku bïï bɛ̈n cam në mïthkɛn mit aläl.