Diɛt ke 3 - JAM DE NHIALIC 2011

¹ Ye tɔ̈c ë biöŋdï nɔm aköölnyïïn ëbɛ̈n, Yɛn ee nyuöth në raantöŋdiën nhiaar, aa ya kɔɔr, ku acä ee yök.

² Yɛn bï rɔt jɔt ënɔɔnë, ku la pänydït kɔɔric ëbɛ̈n, abä lɔ kɔɔr në kuɛɛriic ku në përiic. Yɛn cï raantöŋdiën nhiaar kɔɔr, acä kɔɔr, ku akɛ̈n yök.

³ Kɔc tït ee pänydït caathic, acïk a tïŋ. Guɔ keek luɔp, an, “Cäk raandiën nhiaar yök?

⁴ Ku tëthiin wën nyääŋ ɛn keek piny, acä guɔ lɔ yök, guɔ dɔm ku cä be pɔ̈l ajäl, aɣët të bän yen lɛɛr ɣön ë maar, ɣön ɣɔn dhiëëthë ya thïn.

⁵ Lɛ̈kkï yɛn gutguut, wek diëër ke Jeruthalem, kuɛ̈ɛ̈ŋkï ë kat de kɛɛu kekë ŋɛɛr, nɔn cä wek nhiëërda bï riɔ̈ɔ̈k.

Din de Diäk Jam de Tik

⁶ Eeŋö ë kë bɔ̈ në jɔ̈ɔ̈ric, ke cït luän de tol, acï looi në ŋiëër de mer kekë wal ŋïr, wal ye ɣaac ë kɔc ee käŋ ɣaac?

⁷ Tholomon abɔ̈, ke ɣɛ̈ɛ̈cë ë thööcde nɔm, Acath ke thiërdhetem (60) de rem de tɔŋ ee yen tiit, rem de tɔŋ läk aläl ë Yithriɛl.

⁸ Keek kedhie ayek atëët ke abätɛ̈ɛ̈u, acïk thɔ̈ɔ̈r ë tɔɔŋ riliic kedhie. Ku raan në keyiic aa de cin abätäude, tiit en raan bï kɔc mɔɔk piny wäkɔ̈u.

⁹ Melik Tholomon aa ɣɛ̈ɛ̈cë ë thööc nɔm, thööc cï looi në tiim läk aläl.

¹⁰ Waike acïk keek rɔɔth kɔ̈ɔ̈th ë ateek, ku lupɔɔke acï keek rɔɔth kɔ̈ɔ̈th ë adhääp. Ku kɔɔmke acï keek deer kɔ̈ɔ̈th ë lupɔ amujuŋ, lupɔɔ cï keek ŋiëc gut ë diëër ke Jeruthalem.

¹¹ Diëër ke Dhiɔn, bäkï tiëŋkï melik Tholomon. Aceŋ göl cïï ë man tääu në yenɔm, në kööl ɣɔn thiëëk en, kööl ɣɔn de miɛt ë piɔ̈nde kekë ayum de yen piɔ̈u.