Diɛt ke 2 - JAM DE NHIALIC 2011

¹ Yɛn ee gaak de wäl tei në wak de Caronic, ku ciët agurbiök nu ë wak de kuriic.

Jam de Moc

² Täu ye agurbiök tɔ̈u ë kuɔɔthiic, yen acït täu de nyandiën nhiaar ë diäär yiic.

Jam de Tik

³ Täu ye tiim ke tupa tɔ̈u ë tiim rooric, yen acït täu de monydiën nhiaar ë röör kɔ̈k yiic. Aya nhiaar bä rɛ̈ɛ̈r ë yelɔ̈ɔ̈m, ku mit mïthke në yathok.

⁴ Acï ya bɛ̈ɛ̈i ɣöndɛn ë dhuëëŋ yic, ku nyuth ɛn nhiëër piɛth.

⁵ Tɔ yɛn tɔ ril në mïth ke tiim cï riɛl, ku tɔ yɛn lɔ̈ŋ në mïth ke tiim mit! Yɛn cï kɔ̈c në nhiëër.

⁶ Ciin camde anu në yaŋok, ku ye ciin cuënyde yɛn muk.

⁷ Lɛ̈kkï ya gutguut wek diëër ke Jeruthalem, Kuɛ̈ɛ̈ŋkï ë kat de kɛɛu kekë ŋɛɛr, në luɔi cä wek nhiëërda bï riɔ̈ɔ̈k.

Din de Rou Jam de Tik

⁸ Yɛn cï röl de raandiën nhiaar piŋ, abɔ̈ ke riŋ ë kuriic, abɔ̈ ke kɔt ke ret kuriic ke bɔ̈ të nu yɛn.

⁹ Raandiën nhiaar acït kɛɛu, acït thɔn ë ŋɛɛr. Yeka kääc ë päny kɔ̈u. Ee daai ë awëërnyin, ku ye luiit të ɣɔ̈ɔ̈r.

¹⁰ Raandiën nhiaar ajam ke yɛn. Bäär tei, raandiën nhiaar, nyandiën nhiaar, bäär wekë yɛn.

Jam de Moc

¹¹ Rut acï jäl ku deŋ ë kɔ̈ɔ̈c.

¹² Gaak ë rɔt moc në wut këc biic. Kënë ee kööl ë kiët de diɛt, diɛt ke guök aye ke piŋ ë duum yiic.

¹³ Tiim ke ŋaap akɔɔrkï luɔk, ku yom ë yic thiäŋ kekë awäu de enap. Bäär tei, raandiën nhiaar, nyandiën nhiaar, bäär wekë yɛn.

¹⁴ Yïn cït guuk ee thiaan ë köŋ de kuuric, guuk nu në awiɛn nɔm, tɔ ya tïŋ nyinduön agɔk, ku piɛŋ rölduön lɔ gaŋgaŋ.

¹⁵ Dɔm awɛn, kek awɛn thikkë, ke ke kën domdan kɔɔr luɔkkë guɔ riɔ̈ɔ̈k.

Jam de Tik

¹⁶ Monydiën nhiaar ee këdï, ku yɛn ee këde. Ee thökke nyuääth në agurbiökiic,

¹⁷ Aɣët të ye yom amiäk puɔ̈t, ku jël mɔ̈ɔ̈th. Raandiën nhiaar bäär ciëën cï kɛɛu, ku cït thɔn ë ŋɛɛr nu ë kur ke Bether nïïm.