Diɛt 98 - JAM DE NHIALIC 2011

Nhialic Bɛ̈ny ceŋ pinynɔm

¹ Kɛ̈tkï Bɛ̈nydït din ë piac cak, në biäk cïï Yen kake gäi looi! Në riɛlde ku në köŋdɛn ɣeric acï Yen tɔ tiëm.

² Bɛ̈nydït acï tiëmde tɔ ŋic, acï riɛldɛn ë kuɔɔny të ŋic ë juöör.

³ Ee Yenɔm tak në nhiëërdɛn agɔk ku piɔ̈ndɛn adöt në biäk de baai de Yithriɛl. acï piny thar ëbɛ̈n tïŋ, yen tiëm de Nhialinyda.

⁴ Kɛ̈tkï Bɛ̈nydït diɛt në miɛtëpiɔ̈u, wek pinynɔm ëbɛ̈n, pianykï në diɛt ku yak ket ë miɛtëpiɔ̈u!

⁵ Lɛckï Bɛ̈nydït! Kɛ̈tkï diɛt në thom!

⁶ Kuɔthkï kɛŋ ku tuŋ, ku läŋkï Bɛ̈nydït meliŋda në awuɔɔu ë miɛtëpiɔ̈u.

⁷ Jɔ röl wɛ̈ɛ̈r, we këriëëc nu ë yïyic ëbɛ̈n, kɛ̈të pinynɔm, we këriëëc nu ë yïyic ëbɛ̈n!

⁸ Pamkï wecin, wek kiɛɛr, wek kur, kɛ̈tkï ëtök ke we mit piɔ̈ɔ̈th në Bɛ̈nydït nɔm,

⁹ në biäk bïï yen pinynɔm bɛ̈n cieŋ. Abï kɔc ke pinynɔm cieŋ në piathëpiɔ̈u ku yic.