Diɛt 97 - JAM DE NHIALIC 2011

Nhialic Bɛ̈ny Wärjäŋ

¹ Pinynɔm jɔ piɔ̈u miɛt! Bɛ̈nydït ee Yen ee Melik! Jakï piɔ̈ɔ̈th miɛt we tuöör nu wïïr!

² Acïï luät kekë mɔ̈ɔ̈th gɛɛu cil, piathëpiɔ̈u ku yic kek aye këërkëër de thönyde.

³ Mac ee dɛ̈p Yenɔm tueŋ ago kɔc ke aterde nyuɔp piny.

⁴ Ku wilde ee pinynɔm riaau, aye pinynɔm tïŋ ku lɛthë.

⁵ Kur kor ayek lɛ̈ɛ̈ŋ cï pïïu ë Bɛ̈nydït nɔm, Bɛ̈nydïït de pinynɔm ëbɛ̈n.

⁶ Ku paannhial anyooth piathëpiɔ̈nde ku juöör kedhie awoikï dhuëëŋde.

⁷ Kɔc ee yiëth lam abïk gup yäär, yiëth kedhie ayek kenïïm guöt piny në Bɛ̈nydït nɔm.

⁸ Kɔc tɔ̈u Dhiɔn amitkï piɔ̈ɔ̈th, ku duet ke Juda acïk piɔ̈ɔ̈th lɔyum, në biäk de guiëër ë löŋdu Bɛ̈nydït.

⁹ Bɛ̈nydït Awärjäŋ, ee Yïn ceŋ pinynɔm ëbɛ̈n, ku Yïn dït aläl awär yiëth kedhie.

¹⁰ Bɛ̈nydït anhiaar kɔc man luɔi de karɛc, mankï karɛc wek kɔc nhiaar Bɛ̈nydït, ee wëi ke kɔcke gël, ku kony keek ë kɔc rac cin.

¹¹ Ɣɛɛr ee riau tëde kɔc piɛthpiɔ̈ɔ̈th, ku miɛtëpiɔ̈u kekë kɔc lɔ piɔ̈ɔ̈th wai.

¹² Wek kɔc piɛthpiɔ̈ɔ̈th miɛtkï piɔ̈ɔ̈th, në biäk de kë cï Bɛ̈nydït looi! Takï kë cïï Nhialic ɣeric looi, ku gämkï lɛc.