Diɛt 96 - JAM DE NHIALIC 2011

Nhialic Meliŋ Dït

¹ Kɛ̈tkï Bɛ̈nydït, din cï piac cak! Kɛ̈tkï dit Bɛ̈nydït, wek kɔc ke pinynɔm ëbɛ̈n!

² Kɛ̈tkï Bɛ̈nydït, ku thiɛikï rinke yak piathde luɛɛl aköölnyïïn kedhie ë luɔi cï yen wo kony.

³ Lɛ̈kkï dhuëëŋde juöör, lɛ̈kkï kɔc ëbɛ̈n göök cï looi.

⁴ Bɛ̈nydït adït ku abï dhil piɔɔny aläl, abï dhil riëëu awär yiëth kedhie.

⁵ Kɔc ke pinynɔm ayek yiëth lam, ku Bɛ̈nydït Yen aa cak paannhial.

⁶ Dhuëëŋde ku dïtde acïk ye gɛɛu cil, riɛl ku dik acïk tëdɛn ɣeric thiɔ̈ɔ̈ŋ.

⁷ Pianykï Bɛ̈nydït, wek kɔc ke pinynɔm wedhie, pianykï dhuëëŋde ku riɛlde.

⁸ Pianykï dhuëëŋ de rin ke Bɛ̈nydït, bɛ̈ɛ̈ikï miɔ̈c ku bäkkï ɣön de Bɛ̈nydït.

⁹ Guötkï wenïïm piny në Bɛ̈nydït nɔm ë ɣɛɛrë yic, takï röt lɛthë në Yenɔm, wek piny nɔm!

¹⁰ Lɛ̈kë juöör ëbɛ̈n an, “Bɛ̈nydït ee Melik! Piny acï tääu tëde ku acïï duëërë nyaai, abï löŋ de kɔc guiir në yic.”

¹¹ Jɔ piɔ̈u miɛt yïn paannhial, ku piny! Jɔ röl wɛ̈ɛ̈r, we këriëëc nu ë yïyic ëbɛ̈n,

¹² jakï piɔ̈ɔ̈th miɛt wek duum, ku këriëëc nu ë yïyic ëbɛ̈n! Tiim nu röör abïk cööt ë miɛtëpiɔ̈u.

¹³ Të le Bɛ̈nydït bɛ̈n bïï pinynɔm bɛ̈n ceŋ. Abï kɔc ke pinynɔm ceŋ, në piathëpiɔ̈u ku yic.