Diɛt 94 - JAM DE NHIALIC 2011

Nhialic ee Bɛ̈ny ee Löŋ Guiir Ëbɛ̈n

¹ Bɛ̈nydït, Yïn ee Nhialic ee löŋ guiir, nyuɔɔthë agönhdu!

² Ee Yïn ee löŋ ëbɛ̈n guiir, jɔt rɔt ku gämë kɔc ee röt lɛɛc kë rɔ̈ŋ ke keek!

³ Bɛ̈nydït agut cï nɛn yen bïï kɔc ee karɛc looi piɔ̈ɔ̈th miɛt? Agut cï nɛn, Bɛ̈nydït?

⁴ Agut cï nɛn yen bï kɔc ee karɛc looi röt lɛɛc? Ayek röt leec në luɔi de karɛc.

⁵ Bɛ̈nydït, acïk kɔcku duöm piny, ku yɔŋkï kɔcku.

⁶ Ayek diëër abɛɛr ku mïth abɛɛr nɔ̈k, ku nɛ̈kkï alɛi rɛ̈ɛ̈r piny de Yithriɛl.

⁷ Ku yek lueel an, “Akën ë Bɛ̈nydït tïŋ, Nhialic de Yithriɛl akuc kë loiku.”

⁸ Kɔckï, yak käŋ yökiic kɔc piɔl piɔ̈ɔ̈th, dhän ee nɛn yen bä wek pɛl?

⁹ Nhialic Yen aa cak yïthkuɔ, cïï duëër piŋ? Aa cak nyïïnkuɔ, cïï duëër daai?

¹⁰ Yen aa lui juöör këtuc, cïï keek duëër luöi këtuc? Ee Yen ee raan ee kɔc wɛ̈ɛ̈t kedhie, cïï nɔm duëër dɛ ŋïny de käŋ?

¹¹ Bɛ̈nydït aŋic täŋ de raan, aŋic täŋden nɔn ye kek kë cïn naamde tak.

¹² Thieithieei në raan ye Bɛ̈nydït wɛ̈ɛ̈t, kɔc ye ke wɛ̈ɛ̈t në löŋdu!

¹³ Aye ke gäm lɔ̈ŋ në akööl ke nuan agut të bïï pul wec deepë kɔc rac.

¹⁴ Bɛ̈nydït acïï kɔcke bï nyääŋ piny, acïï kɔc ke nɔmde bï pɔ̈l.

¹⁵ Në biäk bïï ë yic rɔt pɔ̈k kɔc piɛthpiɔ̈ɔ̈th, ku kɔc lɔ piɔ̈ɔ̈th wai kedhie abïk gam.

¹⁶ Eeŋa cï kɔ̈ɔ̈c ke kony ɛn në kɔc rac? Eeŋa cï rɔ mät ɛn ku mɛɛn kɔc ee karɛc looi?

¹⁷ Na ë ya kënë Bɛ̈nydït kony wëi, adï cä guɔ lɔ piny de kɔc cï thou.

¹⁸ Na wën aa luɛɛl an, “Yɛn cï cök rieth,” go nhiëërduön agɔk, ya mɔ̈k nhial Bɛ̈nydït.

¹⁹ Të cän diɛɛr në ya piɔ̈u, Yïn ee ya muk piɔ̈u abä piɔ̈u miɛt.

²⁰ Yïn cie määth we bäny kuc löŋ guiir, kɔc cie cath në löŋ yic,

²¹ Ayek kethook mat ë kiɛɛr rac bïï kek kɔc piɛthpiɔ̈ɔ̈th nɔ̈k, ku tɔkï raan cïn kë cï wööc näk.

²² Ku Bɛ̈nydït acï yɛn bɛ̈n gël, Nhialicdï ë yɛn kony.

²³ Abï keek gɔ̈k në biäk de luɔi rɛɛcden, ku riëëk keek në biäk de karɛcken, Abïï Bɛ̈nydït Nhialinyda keek riɔ̈ɔ̈k.