Diɛt 92 - JAM DE NHIALIC 2011

Din de Piɔ̈ny

¹ Apiɛth buk Bɛ̈nydït gäm lɛc, buk diɛt ket në rinke, buk Nhialic Awärjäŋ riëëu,

² Wok bï nhiëërduön agɔk aa luɛɛl miäk rial ku lueelku piɔ̈nduön adöt wakɔ̈u,

³ në gun de thom ku kɛŋ, ku kuöth de aruöör.

⁴ Bɛ̈nydït, luɔi de riɛldu ee yɛn tɔ mit piɔ̈u, në biäk ye ka cï looi, yɛn tɔ kët në miɛtëpiɔ̈u.

⁵ Bɛ̈nydït, luɔidu adït, ku täŋdu athuth yic!

⁶ Ee kë cïï raan piɔlpiɔ̈u duëër ŋic, raan dhɔ̈n acïn kë duëër yökic:

⁷ kɔc ee karɛc looi ayek cil cï wal, ku kueth kɔc ee awɛ̈ɛ̈c looi, ku abïk ŋoot ke ke riäär taitai,

⁸ Ku Bɛ̈nydït ee Yïn ee Awärjäŋ aɣet athɛɛr.

⁹ Aŋicku nɔn bïï kɔc dɛk wek ater thou, ku kɔc ee karɛc looi abïï ke thiäi piny.

¹⁰ Ku Yïn cï yɛn gäm riɛl thöŋ ke riɛl ë thɔn anyaar, Yïn cï yɛn thieei ë miɛtëpiɔ̈u.

¹¹ Yɛn cï tiëm cïï ë kɔc ke aterdï tiaam tïŋ, ku piɛŋ dhiën de kɔc ee karɛc looi.

¹² Kɔc piɛthpiɔ̈ɔ̈th abïk luɔk cï tiim ke akööt, abïk cil cï tiim ke thidar de Lebanɔn.

¹³ Acïtkï tiim cï com Luaŋdït, ee luɔk ɣön ë Nhialinyda,

¹⁴ tiim ee ŋuɔl ë mïth ke ke cï dhiɔp ku ayek tɔ̈c ku rilkï ëceŋ.

¹⁵ Kënë anyooth nɔn ye Bɛ̈nydït yic looi, ku acïn kërɛɛc nu ë piathëpiɔ̈ndï yic.