Diɛt 91 - JAM DE NHIALIC 2011

Nhialic ee Konyda

¹ Raan ëbɛ̈n raan ee lɔ thiaan tëde Bɛ̈nydït, raan ëbɛ̈n raan ye Nhialic Awärjäŋ gël.

² Aduëër lɛ̈k En an, “Yïn ee gëlgëldï ku ye konydï, Yïn ee Nhialinydï, ku ee Yïn ŋääth.”

³ Abï yïn aa gël në kajuëc rac cï thiaan ku jɔɔk juëc tuc thook.

⁴ Abï yï kum ë Yewuök, ku abï yï muk në Yeciin, piathëpiɔ̈nde ee köt ku abï yïn kony.

⁵ Acïn kërɛɛc bï yïn riɔ̈ɔ̈c wakɔ̈u ayï wiɛth ke dhaŋ ee päär ëthiäu aköl,

⁶ ku nɔn ee jɔɔk tuc ee bɛ̈n ë mɔ̈ɔ̈thic, ayï jɔɔk ee näk aköl.

⁷ Kë cït agum de raan, aduëërkï wïïk ë yïlɔ̈ɔ̈m, ku wiëëk aguum kathiëër ë biäk cuënydu, ku acïn bɔ̈t bï yïn yök.

⁸ Yïn bï jɔ daai ë yïnyin, në luɔi ye kɔc ee karɛc looi luöi këtuc.

⁹ Yïn cï Bɛ̈nydït tɔ Ye konydu. Awärjäŋ Yen ee Raan ee yïn gël.

¹⁰ Ku acïn riäŋ bï yï yök, acïn akuöörkuöör bï bɛ̈n ë yïlɔ̈ɔ̈m.

¹¹ Nhialic abï yï tɔ tiit ë tuucnhialke bïk yïn aa gël të lee yïn thïn ëbɛ̈n.

¹² Ku abïk yïn mɔ̈k nhial ë kecin ke yï cïï yïcök bï yuöp ë kur kɔ̈ɔ̈th.

¹³ Kɔ̈ɔ̈r ku karɛc abä keek aa dumiic, kɔ̈ɔ̈r cï wäth, ku karɛc de thook wurïï.

¹⁴ Acï Nhialic lueel an, “Yɛn bï kɔc nhiaar Ɛn luök, ku gɛ̈l kɔc ee Ya gam nɔn Yan Bɛ̈nydït.

¹⁵ Të cɔɔl kek Ɛn, Yɛn bï cɔ̈tden piŋ, tëde yen nuan cï ke yök, yɛn bï tɔ̈u wo keek. Ku abä keek luäk bei, ku dhuɛ̈ɛ̈ŋ keek gup.

¹⁶ Abä keek thieei në run juëc, abä keek kony.”