Diɛt 90 - JAM DE NHIALIC 2011

Awerek de Ŋuan ( Diɛt 90–106 ) De Nhialic kekë Raan

¹ Bɛ̈nydït, Yïn aaye ɣöndan ë thiaan në akööl ke rɛmkuɔ yiic ëbɛ̈n.

² Ɣɔn kënë kur kɔn cak, ku ɣɔn kënë pinynɔm kɔn bɛ̈n, Yïn ee Nhialic tɔ̈u athɛɛr, ku Yïn bï tɔ̈u aɣet athɛɛr.

³ Yïn ee raan yɔ̈ɔ̈k bï rɔt dak të ɣɔn tɔ̈u yen, an, mɛnh ë raan dak ë yïnɔm abuui yic.

⁴ Agum de ruöön tëde Yïn acït kööl tök, acïtkï wään aköl, cï guɔ wan, ku acït kaam thiinakäŋ wakɔ̈u.

⁵ Ku Yïn ee wo jɔt cït man ë pïïu ke amool, ku goku määr cï nyuöth. Wok cït wal ee cil miäk rial,

⁶ ku lokkï ku retkï yiic ku mockï gaak, na thëën ke ke go biɔɔr ku thoukï.

⁷ Wok ye agönhdu ke riɔ̈ɔ̈k, wok ë riɔ̈ɔ̈c ë ŋeenydu.

⁸ Yïn cï karɛckuɔ tääu ë Yïnɔm tueŋ, ayï karɛc cuk looi athiaan aye ke tïŋ ëbɛ̈n.

⁹ Ku pïïrda acï agönhdu tɔ cek, runkuɔ ayek jäl cï luɔɔu.

¹⁰ Run kathiërdhorou kek aye kakuɔ, ee ya thiërbɛ̈t, të cïï wok riɛl, ku ayek wook yiɛ̈n nuɛɛn ku jiɛthëpiɔ̈u ëbɛ̈n, ku go pïïr guɔ thök, ku yen ee jälda.

¹¹ Eeŋa duëër tuöc de agönhdu ŋic? Eeŋa ŋic riɔ̈ɔ̈c duëër agönhdu bɛ̈ɛ̈i?

¹² Wɛ̈ɛ̈të wook buk lik de aköölkuɔ ŋic, agoku pɛlënɔm yök ë wo piɔ̈ɔ̈th.

¹³ Agut cï nɛn yen bïï agönhdu jɔ thök? Kokëpiɔ̈u wekë awuutku Bɛ̈nydït!

¹⁴ Thiɔ̈ŋ wopiɔ̈ɔ̈th në nhiëërduön agɔk aköölnyïïn, ke wo bï ket ku mitku piɔ̈ɔ̈th në pïïrda yic ëbɛ̈n.

¹⁵ Miɔc wook ënɔɔnë në miɛtëpiɔ̈n dït, kë cït ke guöm dïït cï gäm wook në run ɣɔn nuɛɛn wok kedhie.

¹⁶ Tɔ awuutku tïŋ luɔiduön dït, tɔ kuatda tïŋ dït de dhuëëŋdu.

¹⁷ Bɛ̈nydït Nhialinyda, tɔ athiɛɛidu tɔ̈u ke wook. Gämë wook tiëm në kë yok looi yic ëbɛ̈n.