Diɛt 9 - JAM DE NHIALIC 2011

Lɛc de Nhialic në Biäk ë Yicde

¹ Yïn bä piɔɔny Bɛ̈nydït, në piɔ̈ndï ëbɛ̈n, yɛn bï kakuön ke gäi cï ke looi kedhie luɛɛl.

² Yɛn bï ket ë miɛtëpiɔ̈u në biäkdu. Yɛn bï Nhialic Awärjäŋ leec në diɛt.

³ Kɔc ke aterdï ayek kenïïm puk të cï Yïn tïc, ayek wïïk ku thoukï.

⁴ Yïn ee yicdï ŋiëc muk apiɛth, Yïn cï nyuc ë thööny nɔm ku guiir löŋ ë yic.

⁵ Yïn ë juöör ke pinynɔm nen, ku riäk kɔc ee karɛc looi. Acïï ke bï bɛ tak taitai.

⁶ Kɔc de aterdï acïk thök aɣet athɛɛr, Yïn cï pɛ̈ɛ̈nydïtken riɔ̈ɔ̈k, kɔc acïk nïïm määr në keek taitai.

⁷ Ku Bɛ̈nydït Yen aye melik aɣet athɛɛr, acï thöönyde kiëët ke bï löŋ guiir.

⁸ Ee pinynɔm cieŋ në piathëpiɔ̈u, ku cieŋ juöör në yic.

⁹ Bɛ̈nydït Yen aye tëde lɔ̈ŋ de kɔc yɔŋ, ku ye tëde kuɔɔny në akööl ke nuan.

¹⁰ Bɛ̈nydït kɔc ŋic Yïn, abïk Yïn ŋɔ̈ɔ̈th, Yïn cïï raan cï bɛ̈n tëde Yïn ee rɛɛc,

¹¹ Pianykï Bɛ̈nydït; Raan ceŋ Dhiɔn! Lɛ̈kkï juöör ëbɛ̈n kë cï looi!

¹² Nhialic ee kɔc yɔŋ tak, ku acïï nɔm ee määr në dhiënden, ee kɔc ee kɔc yɔŋ luöi këtuc.

¹³ Kokëpiɔ̈u we yɛn Bɛ̈nydït! Tïŋ nuandïït cïï kɔc ke aterdï luöi yɛn! Luäk ɛn në thuɔɔu Bɛ̈nydït!

¹⁴ Ke yɛn bï kɔ̈ɔ̈c ë kal ë nyan de Dhiɔn thok ku lɛ̈k keek ka yan ke yïn piɔɔny kedhie. Yɛn bï piɔ̈u miɛt në luɔi cï Yïn ɛn kony.

¹⁵ Juöör ke pinynɔm acïk pul wec ku acïk wïïk thïn, acïï wïïnkɛn ke dɛ̈p keek dɔm.

¹⁶ Bɛ̈nydït ee rɔ nyuɔɔth në guiëërdɛn ë piathëpiɔ̈u, ku kɔc ee kërac looi acï kërɛɛcdɛn yek looi ke dɔm.

¹⁷ Ku kɔc ee kërac looi ayï juöör reec Nhialic, abïk lɔ kedhie paan ë thuɔɔu.

¹⁸ Ku kɔc kuanynyïïn, acïï keek bïï kɔn rɛɛc, ku aŋäth de kɔc cïn käŋ acïï bï dhɔ̈ŋic aɣet athɛɛr.

¹⁹ Jɔt rɔt Bɛ̈nydït du kɔc tɔ dhäl Yïn! Bɛ̈ɛ̈iyë juöör ë yïnɔm ku guiir löŋden.

²⁰ Tɔ ke riɔ̈c Bɛ̈nydït, ku tɔ ŋic ë juöör nɔn ye kek kɔc tei.