Diɛt 89 - JAM DE NHIALIC 2011

Din de Kööl cï Wut Nuan

¹ Bɛ̈nydït yɛn bï nhiëërduön agɔk piɔɔny aköölnyïïn, nhiëër agɔk de Bɛ̈nydït aɣet athɛɛr, ku yɛn bï piɔ̈nduön adöt lɛ̈k rɛm ëbɛ̈n në yathok.

² Yɛn ŋic nhiëërduön agɔk atɔ̈u aɣet athɛɛr, ku piɔ̈nduön adöt alɔ gïŋgïŋ cï paannhial.

³ Acï lueel an, “Yɛn cï mät looi wokë Debid raan cä lɔc, ku yɛn cï gutguut looi në luöi bän piɔ̈u piath wokë yen.

⁴ ‘Kuatdu abïk aa bäny ëceŋ, abä ke tɔ ye meliik në yïcök aɣet athɛɛr.’”

⁵ Paannhial ee kakuön ke gäi cï looi leec Bɛ̈nydït, ku leckï piathëpiɔ̈ndu në amatnɔm ɣeric yic.

⁶ Bɛ̈nydït acïn raan nu paannhial cït Yïn, acïn töŋ nu në ka cï cak paannhial duëër kït ke Yïn.

⁷ Nhialic ye ë riɔ̈ɔ̈c në amat ë tuucnhial ɣeriic yic, ayek kɔ̈ɔ̈c në Yïnɔm kedhie ke ke lɛthë keek.

⁸ Bɛ̈nydït Nhialic Awärjäŋ, acïn raan ril cït Yïn, Bɛ̈nydït në käŋ yiic kedhie Yïn ee piɔ̈u adöt.

⁹ Ee Yïn ë wɛ̈ɛ̈r tiit, ku ye apiökkɛn dït tɔ lɔ dïu.

¹⁰ Yïn cï aciëŋ cɔl Raɣap duöm piny ku näk, në riɛlduön dït Yïn cï kɔc ke aterdu tiaam

¹¹ Paannhial kekë piny ayek kaku, ku cak këriëëc nu ë pinynɔm ëbɛ̈n.

¹² Yïn cï të lɔ rut cak kekë të lɔ wöuwic, Kuur de Tabor kekë kuur de Ɣermon ayek Yïn leec rin.

¹³ Eeŋö jɔ Yïn riɛl aya! Eeŋö dïït ë riɛldu aya Bɛ̈nydït!

¹⁴ Piathëpiɔ̈u ku yic kek aye këërkëër de thöönydu, nhiëër agɔk ku piɔ̈n adöt ayek röt nyuɔɔth në ka ye looi yiic kedhie.

¹⁵ Ee miɛtëpiɔ̈u yïndï yen ee tɔ̈u kekë kɔc ee Yïn lam në diɛt, ku yek rɛ̈ɛ̈r në ɣɛɛr de piathëpiɔ̈ndu yic!

¹⁶ Në biäkdu ayek piɔ̈ɔ̈th miɛt aköölnyïïn, ku yek yï piɔɔny në biäk de piathëpiɔ̈ndu.

¹⁷ Yïn cï wook tɔ tiëm, në tiëm dït, në nhiëërdu Yïn cï wook tɔ ye kɔc ee tiam.

¹⁸ Yïn Bɛ̈nydït lɔ̈cë wook könda, Yïn Nhialic Ɣeric de Yithriɛl gämë wook meliŋda.

Gutguut cï Nhialic Lɛ̈k Debid

¹⁹ Yïn cï jam ɣɔn thɛɛr ë nyuuth, ku lɛ̈kë awunduön piɛthpiɔ̈u, an, “Yɛn cï kuɔɔny gäm jön de tɔŋ cï leec, yɛn cï thööc gäm raan töŋ cä lɔc në kɔc yiic.

²⁰ Yɛn cï awundiën Debid yök, acä tɔc nɔm në miökdiën ɣeric.

²¹ Riɛldï abï ya nu ke yen aköölnyïïn, ku riɛldï abï yen tɔ ril.

²² Kɔc ke aterde acïkï yen bï lëu në tiëm, kɔc ee karɛc looi acïkï yen bï tiam anande.

²³ Yɛn bï kɔc ke aterde duöm piny, ku näk raan ëbɛ̈n raan man en.

²⁴ Piɔ̈ndiën adöt kekë nhiëërdiën agɔk abïk tɔ̈u në yen, ku në rinkï abä tɔ ee raan ee tiam aköölnyïïn.

²⁵ Yɛn bï ciɛɛŋde tɔ dït abïï gɔl në Wɛ̈ɛ̈r dïït ɣer leer të nu wɛ̈ɛ̈r ë Yuparat.

²⁶ Abï ya lëk ɛn an, ‘Yïn ee Wäär, ku Ye Nhialinydï, Yïn ee gëlgëldï ku konydï.’

²⁷ Abä tɔ ye wën kɛ̈idï, raandït në meliik nïïm kedhie.

²⁸ Yɛn bï nhiëërdiën agɔk mɔ̈k yen aɣet athɛɛr, ku löŋdiën cä mac wokë ë yen abï tɔ̈u tëde,

²⁹ Yɛn bï bäänyde tɔ tɔ̈u aɣet athɛɛr, ku thööcde abï tɔ̈u cït täu de paannhial.

³⁰ Ku na lɔ kuatde löŋdï dhɔ̈ŋic, ku cïkï be rɛ̈ɛ̈r cït man ë kë cïï löŋdï lueel,

³¹ na lek jamdï yal yic, ku cïkï lööŋkï muk,

³² ka abä keek dui në biäk de karɛcken, abä keek tɔ nuan në biäk de ka cïk wööc.

³³ Ku Yɛn cïï Debid bï pɛ̈n nhiëërdiën agɔk, ku cä piɔ̈ndiën adöt tɔ ee lueth.

³⁴ Yɛn cïï löŋdiën cä mac wokë Debid bï dhoŋ kɔ̈u, acïn töŋ bä puk nɔm në ka cä lɛ̈k yen yiic.

³⁵ “Acä lueel raantök ku thöök, në rinkiën ɣer yiic, Yɛn cïï Debid bï math.

³⁶ Yen abï nɔm dɛ kuatde ë bääny yic, yɛn bï ciɛɛŋde aa woi në run nyïïn kedhie.

³⁷ Abï tɔ̈u athɛɛr ke cï rɔt wuuk cït man ë pɛɛi, yen adön daai nhial.”

Dhiëëu në Biäk cïï Melik Tiaam

³⁸ Ku yïn gɔ̈th wokë meliŋduön cï lɔc, acï nyääŋ piny, ku acï rɛɛc.

³⁹ Yïn cï löŋduön cï mac wekë awundu dhoŋ kɔ̈u, ku dɛɛnyë gölde në dhuur nɔm.

⁴⁰ Yïn cï kal de pänydɛndït thuöör piny, ku nyääŋë ɣööt piny ke ke cï riääk.

⁴¹ Kɔc ee tɛ̈ɛ̈k ëtɛ̈ɛ̈n ëbɛ̈n ayek kake kual, ku kɔc thiääk në yen ëbɛ̈n ayek yen dɔl guöp.

⁴² Yïn cï kɔc de nïïm ater në yen gäm tiëm, ku cï keek tɔ mitpiɔ̈ɔ̈th.

⁴³ Yïn cï tɔɔŋke tɔ cïn naamden, ago tɔ tiam në tɔŋic.

⁴⁴ Yïn cï thienydɛn ë bääny bɛ̈ɛ̈i bei në yeciin, ku dɛɛnyë bäänyde piny.

⁴⁵ Acï guɔ tɔ dhiɔp ke kaam ë ŋoot, ku tɔ yäär guöp.

Lɔ̈ŋ de Luääk

⁴⁶ Bɛ̈nydït bä rɔt thiaan të de wook aɣet athɛɛr? Agut cï nɛn yen bï yïn aa cool ë göth we wook?

⁴⁷ Ye Yïnɔm tak në luöi lik ë nïnkiën ke pïïr, ku ŋic aya, nɔn cï Yïn wo cak ke wo ye kɔc tei!

⁴⁸ Eeŋa duëër ceŋ ku cïï thuɔɔu tïŋ anande? Duëër raan rɔt pɛ̈n paan ë thuɔɔu adï?

⁴⁹ Bɛ̈nydït, nu nhiëër agɔk wään ënou? Nu ënou yen kuëëŋ wään cï lɛ̈k Debid?

⁵⁰ Du nɔm mär në lɛ̈ɛ̈t cï ya läät, yɛn awundu, ayï luöi cän aciɛɛn de kɔc kuc yïn guum.

⁵¹ Kɔc ke aterdu ayek raanduön cï tɔc läät Bɛ̈nydït! Ayek läät në ɣäänkɛn ye kek lɔ thïn ëbɛ̈n.

⁵² Pianykï Bɛ̈nydït aɣet athɛɛr! Amiin! Amiin!