Diɛt 88 - JAM DE NHIALIC 2011

Raan Dhiëëu Kuɔɔny

¹ Bɛ̈nydït Nhialic konydï, yɛn dhiëëu kuɔɔny aköölnyïïn, ku yɛn ee bɛ̈n në Yïnɔm ë wɛ̈ɛ̈ric wakɔ̈u.

² Piŋ lɔ̈ŋdï, piŋ dhiën dhiëëu ɛn kuɔɔny.

³ Yɛn cï thiɔ̈k wokë paan ë thuɔɔu në luɔi cï nuɛɛn juëc ya lɔ̈ny.

⁴ Yɛn cït kɔc juëc kɔ̈k kɔɔr thuɔɔu, riɛldï ëbɛ̈n ë jäl, acïn kë kony ɛn.

⁵ Yɛn cï nyääŋ piny ë kɔc cï thou yiic, yɛn cït kɔc cï nɔ̈k tɔ̈u në rɛ̈ŋken yiic, kɔc cï Yïn nɔm määr ë keek taitai, kɔc cïï keek duëër lëu në luääk.

⁶ Yïn cï yɛn dɛɛny ë raŋ thar piny, të col, pul thuuth lɔ loŋloŋ.

⁷ Yɛn cï agönhdu miɛn kɔ̈u aläl, cït man ye apiöŋ de wɛ̈ɛ̈r raan mɔu.

⁸ Yïn cï yɛn tɔ reec ë määthkï, Yïn cï yɛn tɔ ye kë ye kek kat, yɛn cï thiɔ̈ɔ̈k ɣöt ka yɛn cïï rɔt duëër kual,

⁹ Yɛn cï nyin nyuin wokë dhiëëu, yen aye yɛn cool ë cɔl Yïn Bɛ̈nydït, ku ya yacin jat nhial ke Yï läŋ.

¹⁰ Ye kake gäi luöi kɔc cï thou? Yek röt bɛ jɔt ku leckï Yïn?

¹¹ Ye nhiëërduön agɔk lueel në raŋic? Ku ye piathëpiɔ̈ndu lueel tëde riääk?

¹² Kakuön kë gäi ye keek tïŋ tëde mɔ̈ɔ̈th, ku ye piathdu tɔ tïŋ të cie bɛ tak?

¹³ Bɛ̈nydït yɛn ee kuɔɔny cɔɔl tëde Yïn, Yïn ya lɔ̈ŋ aköölnyïïn të ruu piny.

¹⁴ Bɛ̈nydït eeŋö reec Yïn ɛn? Eeŋö wel Yïn Yïnyin wei në yɛn?

¹⁵ Të wään ye yɛn meth, yɛn cï nuan abä thiääk wokë thuɔɔu, yɛn cï piɔ̈u jiɛth wokë dui ee Yïn ya dui.

¹⁶ Ŋeenyduön dït acï yɛn dumic, agönhduön dït acï yɛn riɔ̈ɔ̈k.

¹⁷ Aköölnyïïn kedhie ayek ya geeu cït man amool, acïk ya tuɔɔk cil në tuŋ kedhie.

¹⁸ Yïn cï määthkï tɔ nyiëëŋ ya piny, ku jɔ mɔ̈ɔ̈th thiääk kekë yɛn.