Diɛt 84 - JAM DE NHIALIC 2011

Raan Kɔɔr Ɣön ë Nhialic

¹ Bɛ̈nydït de rɛm, acïn këpiɛth cït Ɣöndu!

² Anhiaar adï ja tɔ̈u ëtɛ̈ɛ̈n! Akaar bä rëër në ɣön de Bɛ̈nydït. Në piɔ̈ndï ëbɛ̈n yɛn bï Nhialic pïïr, piɔɔny në diɛt ke miɛtëpiɔ̈u.

³ Acakaa amɔ̈r acïk ɣöötken yïk, ku guök roor, acïk ɣöötken yïk, acïk mïthken bɛ̈ɛ̈i në yïïŋdu lɔ̈ɔ̈m, Bɛ̈nydït de rɛm, meliŋdï ku Nhialicdï.

⁴ Thieithieei në kɔc rɛ̈ɛ̈r ɣöndu, kɔc ee diɛt ke alɛɛc ket ë ceŋ.

⁵ Thieithieei në kɔc ee röt kan në riɛldu kɔc kɔɔr bïk Kuur ë Dhiɔn aa lɔ neem.

⁶ Të jɔ kek tëëk në wak de Baka yic, ayek tɔ ee nyïïn ke pïïu ku ye deŋ anyäc pɔ̈lken thiɔ̈ɔ̈ŋ yiic.

⁷ Ayek lɔ ke ke ril të ciɛth kek, abïk Nhialic dït ë yiëth tïŋ në kuur ë Dhiɔn nɔm.

⁸ Bɛ̈nydït Nhialic Awärjäŋ piŋ lɔ̈ŋdï, piëŋë Nhialic de Jakop.

⁹ Thiei könda Nhialic, thiei raanduön cï tɔc!

¹⁰ Kööl töŋ cï thöl ɣöndu, aŋuän në agum ke nïn tëdäŋ pei. Apiɛth ë luɔi duëër ɛn kɔ̈ɔ̈c në ɣön ë Nhialicdï thok, në luɔi duɛ̈ɛ̈r ɛn rɛ̈ɛ̈r në ɣööt ke kɔc ee karɛc looi yiic.

¹¹ Bɛ̈nydït Nhialic ee akɔ̈l ku ee köt, ku ye meliŋ de dhuëëŋ, ee wo thiɛɛi në kok ë piɔ̈nde kekë riëëu. Acïn këpiɛth ee pɛ̈n, kɔc ee yic looi.

¹² Thieithieei në kɔc ee Bɛ̈nydït de rɛm ŋɔ̈ɔ̈th!