Diɛt 83 - JAM DE NHIALIC 2011

Lɔ̈ŋ në biäk bïï Kɔc ke Ater de Yithriɛl Tiaam

¹ Yïn Nhialic, du thok mim, du lɔ dïu, du lɔ lik!

² Tïŋ kɔc ke aterdu acïk, agööth gɔl, ku kɔc man Yïn akɔɔrkï bïk Yïn luöi tɔŋ.

³ Aluikï kɔcku kiɛɛr rɛɛc cï thiaan, akïïtkï kiɛɛr rac, në biäk ë kɔckuön ye gël.

⁴ Ayek lueel an, “Bä lok riäkku jurden, ago kɔc nïïm määr në Yithriɛl aɣet athɛɛr!”

⁵ Acïk kïïtden gam, ku mɛ̈tkï ke thook Yïn,

⁶ Kɔc ke Edom ku kɔc ke Yicmiɛl, ku kɔc ke Mowap, ku kɔc ke Ɣagariit.

⁷ Kɔc ke Gebal, ku kɔc ke Ammon, ku kɔc ke Amalek, ku kɔc ke Pilithtia kekë Tayer.

⁸ Kɔc ke Athiriya acïk röt mat keek aya, aye kɔc ril mat tɔŋ në kɔc ke Ammon kekë kɔc ke Mowap, kuat de Lɔt.

⁹ Luöiyë keek, kë wään bä luöi kɔc ke Midian, ku Thithera kekë Jabin në kiir de Kicon yɔu.

¹⁰ Acï keek tiaam në Endor, ago gupken bɛ̈n dhiap piny.

¹¹ Luöiyë bänyken kë awään bä luöi Orep kekë Dheeb, tiam bänyken kedhie cït man ë kë cï luöi Dheba kekë Dhalmuna.

¹² Eeŋa ë lueel en an, “Wok bï röt nöm piny de Nhialic.”

¹³ Nhialic, thiäiyë ë keek piny, cït man ye yom wal gɔp.

¹⁴ Cït man ye mac roor nyop, ku cït man ye lɔ̈k kur kor ɣɔ̈k mac.

¹⁵ Cuɔpë ke wei në amaŋdu ku riääcë keek në yomduön dït.

¹⁶ Nhialic tɔ keek yäär gup, ku tɔ keek ŋic riɛldu.

¹⁷ Tɔ ke tiaam ke ku riëëcë ë keek ananden, tɔ ke thou në ayärdït aläl,

¹⁸ Tɔ ŋickï nɔn ee Yïn Bɛ̈nydït Yïtök, Bɛ̈nydït ee Awärjäŋ ë pinynɔm ëbɛ̈n.