Diɛt 80 - JAM DE NHIALIC 2011

Lɔ̈ŋ në Biäk bïï ë Wut bɛ Luök

¹ Piŋ wo röt, Yïn Tïn de Yithriɛl, Ye wo piŋ röt wok bäny ke lunydu. Yïn raan rɛ̈ɛ̈r në thöönydu nɔm në wuök ke cerubiim lɔ bilbil kɔ̈u,

² Nyuöthë rɔt dhiën de Eparaim ku Benjamin ku Manatha, nyuöthë wo riɛldu, ku bä luäk wook!

³ Pɔ̈kë wo nïïm täu wään kɔn wok tɔ̈u, Nhialic! Nyuöthë wook kokdepiɔ̈ndu, ke wo bïï luök!

⁴ Agut cï nɛn Bɛ̈nydït Nhialic Awärjäŋ, yen bïï Yïn gɔ̈th wekë lɔ̈ŋ de kɔcku?

⁵ Yïn cï wook gäm jiɛth de piɔ̈u buk cam, ku cumdïït de pïïu ke nyin buk dek.

⁶ Yïn cï juöör kɔ̈k thiääk ke wook tɔ tëër pinyda, kɔc ke aterda ayek wook läät.

⁷ Pɔ̈kë wo nïïm täu awään kɔn wok tɔ̈u, Nhialic! Nyuöthë wook kokdepiɔ̈ndu, ke wo bïï luök!

⁸ Yïn cï enap bɛ̈ɛ̈i bei ë Rip, Yïn cï juöör kɔ̈k ciëëc bei ku com kɔcku pinyden.

⁹ Yïn cï piny kuaar në biäk bïï yen luɔk, meike acïk ɣet piny, go thiɛ̈i ë pinynɔm ëbɛ̈n.

¹⁰ Acï kur kum nïïm në atïmde, kërke acïk tiim ke thidar kuöm piny.

¹¹ Kërke ayek lɔ abïk ɣet ë Wɛ̈ɛ̈rdïït ɣer, ku ɣeet të lɔ wɛ̈ɛ̈r ë Yuparat.

¹² Eeŋö dhoŋ Yïn kal cï yïk në yekëc, Tïŋ ënɔɔnë kɔc ee tëëk ayek enapde kual,

¹³ aye kuöl roor duöm piny në kecök, ku ciɛm ë läi roor.

¹⁴ Pɔ̈kë rɔt wook, Awärjäŋ Nhialic! Wɔiyë wo piny paannhial, bä kony kɔcku!

¹⁵ Bä kony enapduön cï comë, yen ee enap thiin wään cï tɔ lok në riɛl!

¹⁶ Acïï kɔc ke aterda ɣök mac, ku yepkï piny, tïŋ keek në agɔ̈th, ku riɔ̈ɔ̈k keek!

¹⁷ Ye kɔckuön cï lɔc kueet ku ye keek tiit, yen mɛnh ë raan cï tɔ ee jurduön ril.

¹⁸ Wok cïï röt bï bɛ yal wei në Yïlɔ̈ɔ̈m, tɔ wook pïïr ku Yïn buk aa piɔɔny.

¹⁹ Pɔ̈kë wonïïm ciëën. Bɛ̈nydït Nhialic Awärjäŋ. Nyuöthë wook kokdepiɔ̈ndu, ke wo bïï luök.