Diɛt 79 - JAM DE NHIALIC 2011

Lɔ̈ŋ në Biäk bïï Wut Luök

¹ Nhialic, kɔc kën gam acïk paandu yak, acïk luaŋduön ɣeric yɔ̈ɔ̈r, ku nyiëëŋkï Jeruthalem piny ke cï riääk.

² Acïk gup ke kɔckuön cï thou nyäŋ cor, ku nyiëëŋkï gup ke awuutkuön cï thou läi roor bïk cam.

³ Acïk rim ke kɔcku tɔ kuëër cït pïïu, riɛm aa wat cït man ë pïïu ë Jeruthalem yic ëbɛ̈n, ku acïn raan töŋ cï döŋ bïï kɔc cï thou tɔ̈ɔ̈u.

⁴ Juöör thiääk në wook ayek wook läät, abiɔnkï wook ku yek wook dɔl gup.

⁵ Bɛ̈nydït, bä gɔ̈th we wook aɣet athɛɛr? Bï agönhdu aa dɛ̈p cït man ë mac?

⁶ Pɔ̈kë agönhdu juöör ku ciɛɛŋ cïï Yïn ee lam, kɔc wën cïï Yïn ee lɔ̈ŋ.

⁷ Në luɔi cï kek kɔcku nɔ̈k, ku acïk wundu riɔ̈ɔ̈k.

⁸ Du wook dui në biäk de karɛc ke kuarkuɔ. Kokëpiɔ̈u wokë wook, wok cï nïïm ciën aŋäth.

⁹ Kony wook Nhialic, ku luäk wook, luäk ë wo bei në biäk de dhuëëŋ ë rinku, ku päl ë wo karɛckuɔ në biäk de rinku.

¹⁰ Eeŋö duëër ë juöör wook aa thiëëc an, “Nu Nhialicdun ë nou?” Tɔ wo tïŋ luɔi dui Yïn juöör në luɔi cï kek rim ke awuutku tɔ kuëër piny.

¹¹ Piŋ luɔi teer ë kɔc cï mac, ku në riɛldu luönyë kɔc cï mäc thuɔɔu bei!

¹² Bɛ̈nydït riɔp juöör kɔ̈kë raandhorou, në biäk de lɛ̈ɛ̈t kedhie, lɛ̈ɛ̈t cï kek Yïn läät.

¹³ Ku wook, wok kɔcku, wok thök ke lunydu, Yïn buk aa leec aɣet athɛɛr, ku piɔnyku Yïn në akööl bɔ̈ yiic kedhie.