Diɛt 78 - JAM DE NHIALIC 2011

Nhialic kekë Kɔcke

¹ Piɛŋkï wëëtdï wek kɔckï, ku yak kë bä lueel döt,

² Yɛn bï jam ë kääŋ de pɛlënɔm, ku waar ka cï thiaan ɣɔn thɛɛr yiic,

³ ka cuk ke piŋ ku ŋicku ke, ka cï kuarkuɔ ke lëk wook.

⁴ Acuku keek bï thiaan në mïthkuɔ, abuk keek lëk rem däŋ bï bɛ bɛ̈n abuk keek lëk riɛl de Bɛ̈nydït, ku kadït cï looi ku göökdït ke käŋ cï ke looi.

⁵ Acï lööŋ gäm kɔc ke Yithriɛl, ku mɛc löŋ ke kuat de Jakop. Acï kuarkuɔ yɔ̈ɔ̈k an, bïk mïthken wɛ̈ɛ̈t në lööŋke,

⁶ ago rem bï bɛ bɛ̈n keek ŋic, ku bïk keek bɛ lɛ̈k mïthken.

⁷ Në ë kueerë keek ayadäŋ, abïk Nhialic aa ŋɔ̈ɔ̈th, ku cïkï nïïm bï määr ë kë cï looi, ku abïk lööŋke aa riëëu aköölnyïïn.

⁸ Acïkï bï ciët kuarken, kɔc ee gäm rɛɛc ku cïnkï riëëu, kɔc wään cïï Nhialic ee ŋɔ̈ɔ̈th aril, ku cïkï piɔ̈ɔ̈th ee adöt në Yen.

⁹ Kɔc ke Eparaim de nïïm dhɛ̈ŋ ku wiɛth, acïk kat ë kööl ë tɔŋ.

¹⁰ Akënkï löŋ cïk mac në Nhialic döt, gokï löŋde kɛ̈n riëëu.

¹¹ Acïk nïïm määr në kë cï looi, kadït ke gäi cïk keek tïŋ ke ke looi.

¹² Të wään woi ë kuarken Nhialic ke loi kake gäi në riaaŋ de Dhowan yic piny de Rip.

¹³ Acï wɛ̈ɛ̈r tekic, ku tɛ̈ɛ̈k keek në yeyic, go pïïu tɔ kääc cït man ë päny.

¹⁴ Të ye piny aköl aye keek caath në luät, ku në wɛ̈ɛ̈riic ëbɛ̈n aye keek caath në ɣɛɛr de mac.

¹⁵ Acï kuur rɛɛtic piny ë jɔ̈ɔ̈ric, ku gëm keek pïïu në kolic.

¹⁶ Acï nyin tɔ bɔ̈ bei ë kuuric, ku tɔ pïïu riŋ cït man ë kiir.

¹⁷ Ku acïk bɛ̈n ŋoot ke ke reec Nhialic, gokï gɔ̈th ë Bɛ̈nydït Awärjäŋ në jɔ̈ɔ̈ric.

¹⁸ Acïk Nhialic tääu ë thëmic ë gök, në baŋ cï kek kuïn kɔɔrkï thiëëc.

¹⁹ Acïk Nhialic jääm guöp, ku luelkï, an, “Duëër Nhialic kuïn bɛ̈ɛ̈i ë jɔ̈ɔ̈ric?

²⁰ Ee yic acï kuur tɔɔŋ kɔ̈u go pïïu bɛ̈ɛ̈i ë lilic ku duëër wook miɔɔc ayadäŋ në këcam ku gëm kɔc ke rïŋ?”

²¹ Ago Nhialic piɔ̈u diu ɣɔn cï en keek piŋ, go kɔcke mak në mac, ago agönhde bɛ̈n dït aläl ë kegup,

²² në luöi cïn kek piɔ̈ɔ̈th gäm në ye yic, ku akënkï gam nɔn duëër En keek luök.

²³ Go jam kekë tënhial nhial, ku yɔ̈ɔ̈k keek bïk kethook liep.

²⁴ Acï keek gäm aɣar de paannhial, ku tuc keek mana (yen aye ŋö në thoŋda) bïk cam.

²⁵ Agokï kuïn ke tuucnhial cam, ago Nhialic ke gäm ka kɔɔrkï kedhie.

²⁶ Yen ayadäŋ acï yom de aköl amiäk tɔ put paannhial, ku në riɛlde acï yom de wöuwic tɔ put,

²⁷ ku tooc amɔ̈r piny yïn ke kɔcke, amɔ̈r juëc aläl cït liɛɛt nu ë wɛ̈ɛ̈r yɔu,

²⁸ gokï lööny në pɛɛnyken yiic cil ku në pɛɛny kɔ̈ɔ̈th kedhie.

²⁹ Ago kɔc jɔ cam ku kuethkï, acï Nhialic ke gäm kë kɔɔrkï.

³⁰ Ku të ŋoot kek, ke ke kën guɔ kuɛth, ku ŋootkï ke ke cäm,

³¹ wään cï ë Nhialic gɔ̈th ke keek, ku nɛ̈k kɔc rilken, dhuök piɛth ke Yithriɛl.

³² Ku në ee ka cï röt looiyë kedhie, go kɔc ŋoot ke ke loi karɛc, ku në ee kake gäi cï looiyë, akënkï Nhialic bɛ̈n ŋɔ̈ɔ̈th.

³³ Ago aköölken tɔ thök cït man ë wëi, ku yïn pïïrden nuan ëthiäu.

³⁴ Të ye yen kɔc kɔ̈k nɔ̈k në keyiic, kuut däŋ ee rɔt pɔ̈k en, ayek karɛcken pɔ̈l ku lɔ̈ŋkï në piɔ̈n piɛth.

³⁵ Ayek tak nɔn ye Nhialic Raan ee keek gël, ku Nhialic aa bɔ̈ bïï keek bɛ̈n kony.

³⁶ Ku wëlken aake ye tör kedhie, acïn töŋ cïk lueel ke ye yic.

³⁷ Acïkï piɔ̈ɔ̈th de Yen, akënkï löŋdɛn cïk mac döt në yen.

³⁸ Ku Nhialic aaye piɔ̈u kok kekë kɔcke. Acï keek päl awɛ̈ɛ̈cken, ku akën keek riɔ̈ɔ̈k. Aköölnyïïn kedhie aa agönhde dɔ̈m kɔ̈ɔ̈c, ku tɔ ŋeenyde tɔ lir.

³⁹ Aye tak ë Yenɔm nɔn ye kek kɔc tei, acïtkï yom ee pɔ̈t ku tɛ̈ɛ̈k.

⁴⁰ Ee raandï yen cï kek agɔ̈th looi në yen ë jɔ̈ɔ̈ric, ee raandï yen ye kek En tɔ göth!

⁴¹ Raan kithic acïk Nhialic tääu në thëmic, ku tɔkï Nhialic Ɣeric de Yithriɛl rem piɔ̈u.

⁴² Acïk nïïm määr në riɛldɛn dït, ku kööl ë kony en keek në kɔc ke aterden,

⁴³ Ku looi göökke kekë kakɛn ke gäi, në riaaŋ de Dhowan yic piny de Rip.

⁴⁴ Acï kiɛɛrken puk ke ye riɛm ago kɔc ke Rip nïïm ciën pïïu ke dëk.

⁴⁵ Acï keek tuöc luaŋ cï keek bɛ̈n yɔŋ, ku aguek cï pinyden bɛ̈n riɔ̈ɔ̈k.

⁴⁶ Acï keek tuöc kɔyɔm bï rɛɛpken cam, ku riɔ̈ɔ̈k duumken.

⁴⁷ Acï tiim ke enapken nɔ̈k në deŋ kɔi ku riëëk tiimken ke olip në roprop.

⁴⁸ Acï ɣɔ̈kken nɔ̈k në deŋ kɔi, ku riëëk luunyken në wil de deŋ.

⁴⁹ Acï keek yiɛ̈n gökdïït de riääk, wën wɛ̈l en agönhde në ŋeeny dït aläl, ŋeenydɛn ë bɔ̈ cït tuny de thuɔɔu.

⁵⁰ Yen akën agönhde dɔ̈m kɔ̈ɔ̈c, ayï wëiken akën ke both, acï keek bɛ̈n nɔ̈k në agɔ̈th.

⁵¹ Acï mïth kɛ̈i röör bɛ̈n nɔ̈k në ɣööt ke Rip thook kedhie.

⁵² Na wën, ke jɔ kɔcke bɛ̈ɛ̈i bei cït man ë tiit, ku jɔ keek wat në jɔ̈ɔ̈ric.

⁵³ Acï keek wat apiɛth, ku akënkï bɛ̈n riɔ̈ɔ̈c, ku wɛ̈ɛ̈r ë bɛ̈n bɛ̈n ke dal ë kɔckɛn ke ater kɔ̈ɔ̈th.

⁵⁴ Acï keek bɛ̈ɛ̈i pinydɛn ɣeric, të nu kuurdɛn ë rum në yen.

⁵⁵ Acï juöör ceŋ wut bɛ̈n cieec ɣɔn lee ë kɔcke ke ke bɔ̈, go pinyden tɛ̈k dhiëën ke Yithriɛl, ku gëm ɣöötken kɔc ke.

⁵⁶ Ku acïk bɛ̈n gɔ̈th ë Nhialic Awärjäŋ, ku tɛ̈ɛ̈ukï në thëmic, akënkï lööŋke riëëu,

⁵⁷ ku yek gɔ̈th, ku cïkï Nhialic riëëu cït man ë kuarken, acïï keek ee ŋɔ̈ɔ̈th cït man ë dhaŋ ŋɔl kɔ̈u.

⁵⁸ Acïk yen tɔ gɔ̈th, në biäk de ɣäänkɛn ye kek yiëth lam thïn, ku yiëthken acïk en tɔ diu piɔ̈u.

⁵⁹ Nhialic acï piɔ̈u diu wën tïŋ En en, go kɔcke rɛɛc taitai.

⁶⁰ Go paanyde nyääŋ piny në Cilo, paan ë rɛ̈ɛ̈r en thïn kekë wook.

⁶¹ Acï kɔc ke aterda tɔ peec athänduŋ de mät, kïn de riɛlde ku dhuëëŋde.

⁶² Acï piɔ̈u diu kekë kɔcke, go keek tɔ nɛ̈k ë kɔckɛn ke ater.

⁶³ Dhuökken acï keek nɔ̈k ë tɔŋic, ku diäär kor acïn raan töŋ thiak keek.

⁶⁴ Ku bänykɛn ke kake Nhialic acïk thou në akuöörkuöör, ku diëërkɛn abɛɛr acï keek pɛ̈n dhiëëu.

⁶⁵ Na wën ke Bɛ̈nydït ë jɔt rɔt cït man ë kë nin, aa cït mony ril cï mɔ̈u tɔ mitpiɔ̈u.

⁶⁶ Go kɔc ke aterde cuɔp ciëën, në cum dït ku tiëm de ayäär.

⁶⁷ Ku acï kuat de Jothep rɛɛc, ku akën dhiën de Eparaim lɔc.

⁶⁸ Go dhiën de Juda lɔc, ku kuur de Dhiɔn ee yen nhiɛɛr aläl.

⁶⁹ Ëtɛ̈ɛ̈n yen aa yïk En tëdɛn ɣeric, cït man ë baaide paannhial, acï looi aril cït man ë piny guöpde, ku acïï duëërë luek anande.

⁷⁰ Acï lïmde Debid lɔc, go nööm të ee yen ɣɔ̈k tiit,

⁷¹ Të ee yen lunyde tiit, ku tɔ ye melik de Yithriɛl, raan ee kɔc ke Nhialic tiit.

⁷² Go Debid ke tiit në piɔ̈n lɔ wai, ku wɛt keek në tëët.